اخو البنات ودكتور السينما المصرية.. عاش طفولته مع عفريت يهودي.. ويسرا رمت نفسها من الشباك بالبيجامة بسببه.. محطات في حياة عزت أبو عوف
ذكرى عزت أبو عوف
وحشتني جدا.. ارجوكم ادعوله بالرحمة والمغفرة بقدر طيبة قلبه.. دي كانت كلمات أرملة الفنان الراحل عزت ابو عوف… أميرة أبو السعود.. الل كانت حريصه انها تحي ذكراه.. وتخلي كل الناس تدعيله..
والفنان عزت ابو عوف كان بمثابة ايقونة فنية وكلمة السر في نجاح اعمال كتير.. دكتور السينما المصرية وأخو البنات.. ومعروف ان الفنان عزت ابو عوف اتخرج من كلية الطب جامعة الأزهر وفضل يشتغل دكتور 5 سنين قسم نساء وتوليد.. لحد ما قرر ياخد خطوة الدخول للوسط الفني.. من خلال فرقة بلاك كوتس.. وبعد حلها.. أسس فرقة مع اخواته البنات وسماها الفور إم.. واللي كان لها الفضل الكبير في شهرته هو واخواته.. مها ومنى ومنال وميرفت.. لكن الفرقة وقفت فجأة في أوج نجاحها وشهرتها.. بعد زواج واحده من اخواته.. وتحول الثانية للتمثيل بدل الغناء..
ايس كريم في جليم
عزت أبو عوف من مواليد محافظة القاهرة.. سنة 1948.. بينتمي لأسرة عريقة فـ والده أحمد شفيق أحد الضباط الأحرار.. الل شاركوا في ثورة يوليو كمان كان عميد معهد الموسيقى العربية..
بدايته الفنية كانت مع الفنان عمرو دياب في فيلم «آيس كريم في جليم».. وانطلق بعدها وشارك في عدد كبير من الأفلام والمسلسلات خلته من النجوم الأقرب لقلوب الجماهير..
ساعدته وسامته وأناقته على لعب أدوار الرجل الأرستقراطي ده غير اتقانه لأدوار الشر في اعمال كتير.. اتولى منصب رئيس مهرجان القاهرة السينمائي الدولي لأكثر من دورة.. وساهم في نجاحه بشكل كبير.. كمان على مستوى الإعلام قدم برنامج القاهرة اليوم لكذا سنة مع الاعلامي عمرو اديب..
فاطيما
اتجوز عزت أبو عوف من السيدة فاطيما في بداية حياته الفنية وعاش معاها أغلب حياته وكانت بينهم قصة حب عنيفة جدا..
واتشهر بولائه الكبير لزوجته الأولى فطيما.. وبالرغم من زواجه مرة ثانية.. الا انه فضل يحتفظ بحبه لفاطيما بيتكلم عنها طوال الوقت وفي كل مكان.. وقال عنها عزت أبو عوف.. ولا جيه ولا هيجي في نبل اخلاقها.. وحكى عن قصة جوازهم.. وقال.. أكتر حد برتاح في وجوده.. عمري ما حبيت ولا هحب زيها ولا غيرها.. هي دايمًا اللي برجع ليها في كل وقت.. حبها عمره ما اتغير من وأنا عندي 19 وهي عندها 14 سنة لحد ما توفيت.. كنت بحس أنها جزء مني وكل دنيت.. وفضل لابس دبلة جوازهم لحد وفاته.. ومحتفظ بصورتها في اوضته..
وبعد وفاتها ساءت حالته الصحية جدا.. وجاتها صدمه كبيرة مكانش مصدق.. وفضل كده سنين.. قال ان قوته انهارت تماما بعد وفاتها وانه كان بيعيط كتير وبيحس انه ضعيف.. بشكل غريب بعد وفاتها..
الزوجة الثانية
بعد 3 سنين من وفاة فاطيما اتجوز أبو عوف من صاحبة عمره أميرة اللي كان يعرفها ليه 18 سنة.. وقال ان هي الل اهتمت بيه في محنته المرضية بذات في سنينه الاخيرة.. لدرجة انها كانت بتنام على الارض جنب سريره علشان تهتم بيه وترعاه خاصة في الفترات الصعبة جدا في مرضه.. وفضلت جنبه لحد ما اتوفي في 1 يوليو 2019..
وخلف ابو عوف ولد وبنت هما الفنانة الشهيرة مريم ابو عوف وأحمد أبو عوف.. وحكت مريم عن علاقتها بوالدها.. وقالت مريم.. علاقتي ببابا كانت شديدة.. كان متحمس بيا دايمًا وكان بيزقني لقدام من وأنا في المدرسة.. ودخلني الجامعة الأمريكية وكان نفسه دايمًا يشوفني في أحسن الأماكن.. وهو السبب خلاني أدرس التمثيل والسينما كان واثق ومصدق فيا على طول.. وبحس دايمًا أنه حاسس بيا.. وكان بيحب الشغل ومتقن وده حاولت أتعلمه منه .
العفريت سلفادور
وللفنان عزت ابو عوف حكايات كتير منها موقف العفريت.. اللي كان عايش معاه في البيت لسنين.. وكان اسمه سلفاردو شيكوريل.. وده راجل يهودي وشخصية تاريخية.. اشترى والد أبو عوف الفيلا الخاصة بيه بعد ما اتقتل فيها بكام سنة و مكانوش يعرفوا..
كان عفريت مش مؤذي وكان بيظهر على هيئة رجل خمسيني.. في كل حته في البيت.. وفي مرة كان قاعد ابو عوف ومها يعزفوا على البيانو.. واللى كان ملك العفريت بردو.. وقفوا عزف فجأة ولقوا راجل واقف عند الباب.. مها جريت بسرعة وعدت من جسمه.. وبالرغم الرعب ده إلا أنهم تأقلموا مع وجوده.. ومرة يسرا راحت تبات معاهم ومحدش حكالها.. بس حست بيه.. وراحت ناطه من الشباك بالبيجامة..
