نهال عنبر نشرت خبر وفاته بالغلط.. وهو قاعد في بيته بياكل بطيخ.. وبعد ما الدنيا اتقلبت نزلت نهال عنبر بيان اعتذار.. أول تعليق من محي اسماعيل بعد شائعات وفاته..
اشاعات
في الوقت اللى هو قاعد في بيته يحتفل بالعيد وبياكل بطيخ.. جدل كبير أثارته الفنانة نهال عنبر بعد بوست نزلته عن الفنان محي إسماعيل على حسابها بموقع انستجرام.. واللى بيه قلبت الدنيا عليه.. بعد ما كتبت على صورته الفنان الراحل.. خاصة أن كلام الفنانة نهال عنبر موثوق جدا.. بما انها ماسكة ملف الصحة في نقابة المهن التمثيلية..
الخبر انتشر زي النار في الهشيم.. على كل مواقع التواصل الاجتماعي.. قبل ما تلحق الفنان نهال عنبر نفسها وتعدل البوست.. علشان يتضح بعد كده ان اللي نزل البوست حد من فريق السوشيال ميديا عندها..
ونشر الحساب الرسمي للفنان نهال عنبر بيان رسمي.. اعتذرت فيه عن الخطأ الكبير اللي حصل.. وقال البيان.. بصفتي مدير فريق السوشيال ميديا لمنصات السوشيال ميديا.. أعتذر للفنان الكبير محيي إسماعيل.. عن الخبر الخطأ غير المقصود بالتأكيد.. والفنانة نهال عنبر لم تعلم أبدا بنزول الخبر لانشغالها بالمسرح في الإسكندرية.. والخطأ من أحد فريق العمل..
وبرأ مدير السوشيال ميديا الفنان نهال عنبر من الخطأ ده.. بعد ما تعرضت لهجوم كبير من الجمهور الذي اعتبره تصرف غير مسؤول.. منها وفريق عملها..
حي يرزق
تواصلت منصة one take مع الفنان محي إسماعيل.. علشان تطمن عليه.. ورد الفنان وأكد أنه حي يرزق.. وبيرد على كل الصحفيين وتليفونه مبطلش رن.. وقال القيصر انه مش فاهم سبب نزول الخبر ده.. وقال.. ومش فاهم عايزين يموتوني ليه برضو..
وعن سؤاله عن العودة من جديد للساحة الفنية قال.. مستني يتعرض عليا حاجه كويسه اقدر اقدمها.. وكان فيه مشروع فيلم عن حياة معمر القذافي لكن أتوقف الشغل عليه مؤقتاً وربنا يسهل إن شاء الله..
ليلة الدموع
ومن فترة وتحديدا في حفلة ليلة الدموع في السعودية.. فاجأ الفنان محي إسماعيل جمهوره بقصيده خلال مشاركته..
وقال فيها.. مين اللي قالك تقلعه.. حط عقلك وارزعه مطرح ما كان.. وساعتها هلف الدنيا ليكم والشهد اجيبها ليكم.. والدنيا هتفرح بيكم.. الحب الحقيقي ليه تكثر فيه الدموع.. مع إن قوة الحب أكبر من أي دمعة.. ولما نتعب شوية يقوينا هو.. نحن حزانى لأننا نبكي.. أنا القيصر أنا القيصر..
والقصيدة دي انقسم الجمهور عليها ما بين معجبين منتقدين.. البعض قال انها مفتعلة ومتلقش باسم فنان كبير زي محي اسماعيل.. والبعض عادي عجبته.. وكعادته محي اسماعيل مهتمش بالجدل المثار والتزم الصمت..
آخر أعماله
وكان آخر أعمال محيي اسماعيل مشاركته فى فيلم «الكنز 2» سنة 2019.. وشارك في بطولته عدد كبير من الفنانين من بينهم محمد سعد، محمد رمضان، هند صبري، أحمد حاتم، أحمد رزق ونهى عابدين، إخراج وتأليف شريف عرفة..
على مدار سنين طويلة.. تألق الفنان محي الدين اسماعيل .. في أدوار كثيرة.. خاصة أدوار السايكو.. واللي قدر فيها يحقق نجاح كبير.. برغم قلة ظهوره.. واتولد محي اسماعيل في مدينة كفر الدوار في محافظة البحيرة.. في أسرة مصرية بسيطة.. والده كان واحد من كبار رجال التربية والتعليم بالمحافظة.. ومعاه شهادة العالمية.. أما والدته فكانت بنت عمدة القرية.. وطلع “محي الدين” زيهم يحب الفلسفة .. ودرس في المعهد العالي للفنون المسرحية.. واشتغل لفترة في المسرح القومي.. وقدم مسرحيات كتير.. وبعدها بدأ مشواره في السينما ..
