تامرحسني عن ألبومه” لينا معاد”: ذاكرت سنتين قبل تقديمه ودخلت مستشفيات
تصدر الفنان تامر حسني التريند وذلك بعد طرحه ألبومه الجديد” لينا معاد “.
وكشف تامر من خلال حسابه الشخصي بموقع التواصل الإجتماعي: إنستجرام ” عن أسباب نجاح ألبومه قائلا: عشان ألبومي يدخل التريند ويعجبكم مشيت مشوار طويل.
وأضاف : كنت بقرأ كل تعليقاتكم حتي السلبية ، لأني عارف قد إية بتحبوني وده خلاني أركز واوعد نفسي إني أفرحكم ، احترمت ذكرياتكم على صوتي وتعبت جدا ودخلت مستشفيات في نص السنة ومكنتش بحب أتكلم عن ده .
وتابع : أنا بحبكم أوي ومن يوم ظهوري وأنا واحد منكم وعارف إن في ألبومات مكنتش قد التوقعات وفي ألبومات عمرها ما هتننسي بس هي دي الحياة.
حاولت أطور من أدائي، وأذاكر جوة الاستوديو مع مهندسين صوت لمدة سنتين، وأجتهد مع الموزعين والملحنين والشعراء اللي بشتغل معاهم في تقديم أجدد شيء، ويمكن زعلوا مني كتير من كتر ما أنا عمال أغير وأعدل وأعيد من أول وجديد.. بس دلوقتي فرحتي بالدنيا وهم بيشكروني قدامكم وعلى تليفوني من الإشادات اللي سامعنها منكم في حقهم”.
واستكمل : اشتغلت الألبوم ده وأنا جوايا عناد رهيب إن الألبوم كله يعجبكم.. أكيد هيكون في تفاوت في الإعجاب، بس المهم إنكم قدرتوا مجهودي والتنوع اللي قدمته في الأوديو والڤيديو”.
واختتم حديثه قائلًا لجمهوره: متشكر من قلبي لكل حد نصحني، وكل حد نقدني عشان بيحبني.. أنا سمعت كلامكم وتعبت أوي، وانتوا أكيد شايفين، تعبت عشانكم، وعشان برضوا أحاول أكون واجهة فنية موسيقية جميلة لمصر، بحكم إني بسافر كتير أغني قصاد العالم، واسمي مطرب مصري عربي.. شكرا شركة TH، أنتجتوا ألبوم كامل محترم، شكراً صنّاع الألبوم عن… ألبوم لينا معاد، وكل الشكر ليكم يا أغلى الناس، ربنا يفرحكم زي ما انتوا مفرحني دلوقتي بكلامكم الجميل”.
