بساطة العروسة وفستان أخت العريس الأحمر.. مشاهد من عقد قران نجل الفنان محمد فؤاد

العروسة خطفت الانظار ببساطتها وجمال فستانها.. واخت العريس خطفت القلوب بجمالها وفستانها الأحمر.. كتبوا الكتاب في قصر محمد علي.. بحضور أبرز وأهم نجوم الفن.. مشاهد من عقد قران نجل الفنان محمد فؤاد.. 

عقد قران ابن محمد فؤاد

احتفل النجم محمد فؤاد بعقد قران ابنه عبد الرحمن.. بحضور عدد كبير من نجوم الفن.. والعائلة والاصدقاء.. في قصر محمد علي بالمنيل.. ومن أبرز الحضور كان حميد الشاعري ومصطفى قمر وخالد عجاج ومحمد لطفي ومصطفى كامل ودنيا عبد العزيز.. وغيرهم من الفنانين.. اللي شاركوا فؤوش فرحته بابنه الكبير.

وخطفت زوجة عبدالرحمن الأنظار بإطلالتها الجميلة.. اللي اتميزت بالبساطة والرقي.. ولبست العروسة فستان زفاف طويل.. نسقت معاه طرحه من نفس قماشة الفستان.. واعتمدت تسريحة شعر بسيطة ومكياج هادي متناسق مع لون بشرتها.. وده اللي زاد من جمالها وتميزها في يوم مهم زي ده.

 جمال بنت محمد فؤاد

ومش بس العروسة اللي خطفت الأنظار كمان بنت الفنان محمد فؤاد واخت العريس.. كانت من اكتر الناس اللي لفتت الانتباه بجمالها وفستانها الأحمر.. وظهرت في أكثر من صورة وهي تحتضن فؤش وبتبوسه واقفه جنبه.. وظهرت في بعض الفيديوهات وهي بترقص معاه على اغنية قصة حب لرامي عياش.

 وحاول فؤش يهزر مع المصورين.. ويقولها خبي وشك خبي وشك الله اكبر.. في اشارة يعني لانه خايف عليها من الحسد.. والصراحة أه تتحسد.. وظهرت زوجته المحجبة كمان معاهم في الصور ولفتت الانتباه كمان بجمالها الطبيعي.. 

واكتر حاجه عجبت الجمهور في فرح عبد الرحمن.. البساطة التي كانت مسيطرة على الأجواء واللي واضح انها سمة العيلة كلها.. اللي ظهروا بإطلالات جميلة وبسيطة.. من غير مغالاة ولا بهرجة زائدة عن اللزوم.. ومع تداول صور الفرح على منصات مواقع التواصل الاجتماعي.. الناس بقت مهتمة أكثر تتعرف على أسرة الفنان محمد فؤاد.. وكان فؤاد اتكلم عنهم في لقاءات سابقة ونشر صور ليهم على صفحته بموقع فيسبوك. 

اسرة محمد فؤاد

وزوجة الفنان محمد فؤاد هي مروة حنفي.. اتعرف عليها في 1993 في واحدة من الحفلات.. وقفتها خطفت قلبه من أول نظرة.. وكان من بين الحضور  في فرحهم الفنان عمرو دياب اللي قال في فيديو نادر.. عايز أقول حاجة صغيرة محمد فؤاد بالنسبة لي أقرب وأحب وعشرة وسن واحد بعتبره توأمي أو أخويا ومفيش مناسبة مجاليش فيها.. 

وفي 26 يوليو 1997.. خلف محمد فؤاد ابنه الأول عبد الرحمن وهو عريس الليلة.. ومن صغره عبد الرحمن بيحب الفن زي والده وشارك معاه لو تفتكروا الولد الصغير في فيلم غاوي حب 2005.. مسلسل أغلي من حياتي في 2010.. 

اما بنته اللي كانت لابسه فستان أحمر وخطفت الانظار بجمالها.. فهي بسملة بنته الثانية وتخرجت من الجامعة في 2016.. وكان فؤش حاضر في حفلة تخرجها.. والاخيرة بقى هي ألاء ودي أصغر بنات محمد فؤاد..