الركنة بـ 2000 جنيه والسايس بياخد 200 جنيه.. والجرين برجر بـ 700 والفريسكا بـ 250.. أما بقا الشاي بلبن وزاة الماية فسعرهم مفاجأة مش هتتوقعها.. والفنانين عايزين يصيفوا هناك.. ونجيب ساويرس بيشتكي من أسعاره ..
عمرك كنت تتخيل إن أسعار المصيف ممكن توصل لـ 2 مليون جنيه.. أيوة دا بالظبط اللي حصل في الساحل الشمالي.. أو زي ما المتابعين بيسموه “الساحل الشرير”.. فالأسعار هناك تخطت كل توقعات المتابعين .. وبقوا بيسموها بـ “الأسعار المجنونة” فمفيش حاجة هناك سعرها بيقل عن الـ 200 جنيه.. فيا ترى ايه حكاية أسعار الساحل الشرير ؟..
الركنة بـ 2000 جنيه
البداية كانت مع انتشار مقطع فيديو على السوشيال ميديا.. لـ مجموعة من الشباب بيركنوا عربيتهم في “الساحل الشرير”.. واتفاجئوا بإن السايس بيقولهم إن الركنة هنا بـ 2000 جنيه.. وإن السايس مبياخدش أقل من 200 جنيه.. ولما الشباب استغربوا واعترضوا على الأسعار.. لكن “السايس” قالوهم إن ده تسعيرة محطوطة من ملاك المكان.. وإن سعر الركنة في موسم المصايف والاجازات بتكون 2000 جنيه.. أما بقا في الأيام العادية فبتكون 1000 جنيه.. وطبعًا الأسعار ده عملت صدمة كبيرة للمتابعين.. فلو ركنة العربية لوحدها بـ 2000 جنيه ,, امال باقي الأسعار عاملة ازاي..
الشاب بلبن بـ 700 جنيه
وفعلا بدأ الناس اللي بتصيف في الساحل يتكلموا عن الأسعار هناك.. واللي تقريبًا لقوها بأسعار خيالية.. فمثلا سعر ازازة الماية المعدنية بـ 200 جنيه.. وسعر كوباية الشاب بـ لبن 700 جنيه.. أما بقا الطعمية هناك فحكاياتها حكاية.. هناك بيسموها “الجرين برجر”.. وسعرها 700 جنيه.. دا غير الفريسكا واللي الناس متعودين بيشتروها بسعر معقول .. هناك سعرها بـ 200 جنيه.. أما بقا لو هتاكلها بالشوكلاتة فهتكون بـ 250 جنيه.. وأسعار متخطرش لا على البال ولا الخاطر..
نجيب ساويرس بيشتكي من أسعار الساحل
وطبعًا بعد الأسعار الغريبة اللي بقوا المتابعين بيسمعوا عنها عن الساحل.. بقوا يتريقوا على الأسعار هناك.. وفي “متابع” قرر يكتب “بوست” لـ نجيب ساويرس يطلب منه فيه فلوس كتير عشان يصيف في الساحل الشرير.. فرد عليه “ساويرس” وقاله: “ولا يكفوك 2 مليون جنيه عشان تصيف هناك”.. فاستغرب المتابعين إن نجيب ساويرس اللي يعتبر واحد من أغنى رجال الأعمال هو كمان بيشتكي من أسعار الساحل.. لكن “ساويرس” أكد بعد كدا إنه بيهزر.. لكن كتير من المتابعين شافوا إن الرقم اللي قاله “ساويرس” مش هزار ولا مبالغة.. وبأسعار الساحل الموجودة حاليًا.. فعلاً الـ 3 شهور مصيف مش هيكيفيهم 2 مليون جنيه..
الفنانات بيشتكوا من أسعار الساحل
ومش بس الناس اللي بقوا بيشتكوا من أسعار الساحل الشمالي.. دا كمان الفنانين .. وكمان بقوا بيعملوا فيديوهات يتريقوا فيها على الأسعار هناك.. ومنهم ليلى زاهر وملك زاهر.. واللي قالوا إن ازازة الماية مش بـ 200 جنيه زي ما الناس قالوا.. لكن بـ 150 جنيه بس… وكمان الفنانة “جوري بكر” هى كمان كانت من الفنانات اللي اشتكوا من أسعار الساحل الشرير خلال المصيف بتاع السنة اللي فاتت.. وقالت في فيديو ليها:
“أنا مضايقة من اللي بيحصل في الساحل.. ولولا إن جوزي بيحب يروح هناك مكنتش جيت،، أنا بكره الساحل أو الأصح اللي بيحصل في الساحل،، فيه قلة أدب بتحصل، وفيه ناس قليلة الأدب، وفيه قلة أدب في الأسعار،، أنا أي مكان هدخله مش هيعجبني أسعاره هفضحه على السوشيال ميديا،، لأن إنتوا حرفياً بتسرقوا الناس،، عشان يومين تلاتة جايين ينبسطوا فيهم،، فيالا تعالى أستغلك،، وأطلع كل الفلوس اللي في جيبك،، يعني إيه عيل صغير يروح يجيب إزازة مياه بـ200 جنيه، هي ماية من الجنة” ..
وبقوا المتابعين مستغربين من شكوة الفنانات من أسعار الساحل الشمالي.. وحاسين إن المصيف في الساحل الشرير خلاص بالنسبالهم بقا حلم.. فيا ترى ده الاسعار الحقيقية فعلا ولا المتابعين بيبالغوا ؟
