فنان اتلسع بالسجاير وفنانه اتجوزت بالاجبار.. اغرب مواقف الفنانين مع المعجبين

 

 

احضان بوس وسيلفى وبوكس.. ولسع بالسجائر.. وجواز بالاجبار.. أغرب مواقف الفنانين مع المعجبين على المسرح.. 

 

 

هوس المعجبين

 

 

القاعدة الجماهيرية لاي فنان ومعجبيه هما السبب الأهم وراء شهرتهم ووجودهم في المكان اللى هما فيها.. وزي ما دايما اغلب الفنانين بيقولوا ان الفنان من غير معجبين زي الممثل اللي واقف على خشبة المسرح يمثل قدام كراسي فاضية.. 

 

 

وفعلا لولا المعجبين وجماهير كل فنان.. مكانش هيبقى معروف مكانش هيحقق جماهيرية ولا هيبقى ليه اسم وقيمة تسويقية.. خاصة ان النجوم الكبار اللي شعبيتهم جارفه.. وفي منهم شعبيته بتوصل لاكتر من شعبية رؤساء دول.. لكن احيانا هوس المعجبين بالصور مع المشاهير.. بيخليهم يحطوا نفسهم والمعجب في موقف محرج.. الل بتوصل احيانا الشخص المشهور لحد التهور.. توصل بيه انه يضربه بالقلم على وشه علشان بس شدوا من الجاكت علشان صوره.. 

 

 

اليومين اللي فاتوا دول الدنيا مقلوبة بسبب المعجب الل انضرب بالقلم على وشه.. وبدأ الجمهور على السوشيال ميديا.. يسترجعوا مواقف لبعض الفنانين مع المعجبين واللي كانت اصعب من كده.. ومفيش تقريبا اكثر من ميسي وكريستيانو رونالدو الل حرفيا في أوقات الأمن يخلصهم من الجمهور بالعافية.. ودايما بيتعاموا معاهم بمنتهى التواضع.. لأنهم مدركين قد ايه هما بيحبوها.. وده ميمنعش انهم في أكثر لحظاتهم غضب ردود فعلهم كانت بتبقى بس انهم يبعدوا او يرفضوا يتصوروا بس..

 

 

تامر حسني 

 

أتعرض تامر حسني لمواقف كتير مع المعجبين واشتهرت حفلاته.. بالازدحام الشديد والانهيارات من المعجبات الل نفسها تتصور معاه.. منهم اللى اقتحم المسرح ومنهم اللى جري وراه.. وفي مره راحت بنت قدام بيته وفضلت تصرخ وتطلب منه يخرج.. ولما فشلت كل محاولاتها.. هددت بالانتحار قدام بيته.. 

 

 

تامر مطلبش البوليس وقلق عليها.. وخلى الأمن يدخلوها الفيلا وقضت معاه هو وعيلته وقت طويل واتصور معاه وبعدها مشيت.. 

 

 

وكان في موقف تاني مع تامر حسني لما معجب رماله الموبايل على المسرح تامر اخد الموبايل وكان بيرن رد عليه واتكلم مع الل بيتصل وكان موقف مضحك جدا لكل الموجودين..  

 

 

تامر عاشور 

 

ومن المواقف الغريبة والمضحكة اللي حصل مع تامر عاشور لما معجب يقتحم المسرح وهو يغني وحاول يحضنه.. ويتصور معاه.. تامر عاشور اتصور معاه وشاله وهزر معاه كأنه هيرميه بس في الاخر يعني نزله.. 

 

 

احمد شيبه

 

 

وواحد من اغرب المواقف اللي اتعرض لها فنان كانت مع احمد شيبه.. في احد الافراح الشعبية.. وفضل الراجل قاعدله وكل شوية ياخد منه المايك ويشكر فيه.. شوية ويحضنه ويبوسه.. ولما انفعل اوي.. قام خابطه بالبوكس من غير ما يقصد وبعدها حضنه وباسه مرتين.. كل ده واحمد شيبه هادي جدا وساكت وماخدتش ناحيته أي موقف.. 

 

 

شيرين عبد الوهاب 

 

أما شيرين عبد الوهاب ف مواقفها مع المعجبين مبتخلصش.. وصلت لحد انها اتجوزت واحد منهم.. كان حرفيا مجنون بها ويطاردها في كل مكان.. وقالها انه هنتحر لو ماتتجوزهاش.. وفعلا خضعت شيرين واتجوزته بس مكملتش معاه اكتر من شهرين وقدرت تطلق منه.. 

 

 

ومؤخرا مع كل الضغط الذي تتعرض له شيرين.. وهي في واحدة من حفلاتها فضلت معجبة تصرخ وتنده عليها.. ف انفعلت عليها شيرين وقالتلها انتي بتصرخي كده ليه.. قلتلها بحبك.. فردت شيرين وقالتلها انتي كرهتيني في الحب.. وبعدها طلبت شيرين من المنظمين انها تيجي علشان تتصور معاها.. 

 

 

كاظم الساهر 

 

 

ومن الفنانين اللى المعجبات مهووسه بيه لابعد حد الفنان كاظم الساهر.. واتعرض لمواقف كتير مع هوس المعجبين.. منها لما اقتحمت معجبة المسرح علشان تتصور معاه صورة سيلفي.. وحاولت تحضنه وتقرب منه.. ورغم ان كاظم بان عليه انه متضايق من تصرفاتها.. لكنه خضع لطلبها في الاخر واتصور معاها.. قبل ما يجي الامن وينزلها.. 

 

 

سامح حسين

 

 

ومن المواقف الغريبة والصعبة جدا الل اتعرض لها فنان.. كان الل حصل مع النجم سامح حسين.. وقت تصويره لمسرحية في منطقة الجمالية.. وبعد العرض المسرحي وهو بيغير هدومه تفاجأ بمجموعة اطفال.. عايزين يسلموا عليه.. وهو بيمد ايده عشان يسلم.. اتفاجئ بواحد بيسمكه والثاني بيلسعوا بالسيجارة..