كان مروح بيته بعد ما خلص حفلته في المعادي.. ودهس شاب على الدائري.. واتقبض عليه بتهمة القتل الخطأ.. القصة الكاملة لـ اتهام عصام صاصا بـ دهس شاب على الدائري.. والتسبب في وفاته !
تصدر اسم عصام صاصا حديث مواقع التواصل الاجتماعي.. خلال الساعات اللي فاتت.. ودا بعد انتشار أخبار القبض عليه.. بعد حادثة دهسه لـ شاب على الدائري.. واللي انتهت بوفاة “الشاب”.. فيا ترى ايه هى تفاصيل الحادثة.. وهل فعلا عصام صاصا هيتحبس بتهمة القتل ؟ ..
كان راجع من حفلة في المعادي
الموضوع بدأ بإحياء مطرب المهرجانات لـ حفلة في المعادي.. فبعد ما عصام صاصا خلص الحفلة.. خد عربيته عشان يروح البيت.. وأثناء ما كان سايق عربيته على طريق دائري المنيب قبل نزلة المريوطية بمنطقة الهرم.. اتفاجئ بـ “شاب” ظهر قدام العربية.. ورغم إن “عصام” حاول يتفاداها لكن العربية خبطته بقوة.. لدرجة إن الشاب طار بعيد عن العربية بأمتار من قوة الخبطة..
وفاة الشاب بسبب الإصابات
وبعد الحادثة.. اتلم الأشخاص المتواجدين في المكان.. وطلبوا الإسعاف المصاب.. وطلبوا الشرطة.. أما عصام صاصا فمحاولش الهروب وانتظر لحد ما الأجهزة الأمنية وصلت لمكان الحادثة.. وانتقل الشاب للمستشفى لكنه توفى بسبب الإصابات البالغة.. وقبضت الأجهزة الأمنية على عصام صاصا بتهمة القتل الخطأ والتسبب في وفاة شخص.. وبدأت النيابة تحقيقاتها عشان يعرفوا ايه اللي حصل بالظبط..
https://www.facebook.com/share/v/XspHvR1GsEqydn4Y/?mibextid=oFDknk
مكنش قاصد وارتكب الواقعة بالخطأ
وأثبتت التحقيقات إن الشاب عدى على طريق الدائري من مكان غير مخصص لعبور المشاه.. وإنه ظهر قدام عصام صاصا فجأة.. وإن “عصام” مكنش قاصد يخبطه .. وكان بيحاول يتفاداها لكنه فشل وخبطه بالعربية.. وأكد عصام صاصا كلامه في الأقوال بإنه ماكنش قاصد.. وإنه اتفاجئ بظهور الشخص فجأة قدامه وهو سايق.. وحاليًا لسة عصام صاصا متواجد في القسم عشان التحقيقات..
رد فعل مدير أعماله
ورغم اتهام عصام صاصا بـ الواقعة.. لكن مدير أعماله حاول يجمل الواقعة.. وقال إن عصام صاصا كان راجع من الحفلة وشاف عربية صاحبه على الدائري وهى مقلوبة .. فراح عشان يشوف حصله ايه ويطمن عليه.. وجدت الجهات الأمنية وخدت “صاصا” كشاهد مش متهم.. لكن الجهات الأمنية أكدت إن كلامه مش صحيح وإن مدير أعماله بيقول كدا عشان يجمل الحقيقة مش أكتر.. ويحاول يتفادى ردود الفعل العنيفة من الجمهور.. بعد اتهام عصام صاصا..
انقسام الجمهور وهجوم على الكروان
وطبعًا ومن وقت الإعلان عن اتهام عصام صاصا بجريمة القتل الخطأ.. والجمهور ما بين مدافع عن عصام صاصا وما بين الهجوم عليه.. ففي كتير من الجمهور شاف إن “عصام” ماكنش يقصد وإن اللي حصل غصب عنه لأن الشاب هو اللي عدا من مكان غلط.. وظهر قدامه فجأة وضيع نفسه وضيع عصام معاه.. وفئة ثانية شافوا ان عصام كان المفروض يكون حريص أكتر من كدا.. وإنه لازم يتحاسب عن إنه التسبب في إن شخص يفقد حياته..
هيدفع الدية ويخرج
كمان في كتير من المتابعين توقعوا إن عصام صاصا ممكن يوصل لاتفاق مع أهالي المتوفي.. ويدفع معاهم على دفع الدية والمبلغ اللي يرتضوه.. خاصة إن القتل خطأ ومش عن عمد.. وممكن يقبلوا فيه الدية.. ووقتها عصام صاصا ممكن يخرج من السجن .. لو أسرته اتنازلت عن حق ابنهم وقبلت الدية.. لكن لحد دلوقتي مفيش أي حاجة مؤكدة.. ولا أسرة الشاب ظهروا أو اتكلموا في اللي ناويين يعملوه.. فيا ترى عصام صاصا هيعمل ايه في الأزمة الكبيرة التي يواجهها حاليًا ؟ ..
