حفل راقص في الاهرامات.. زحمة وطيارات خاصة وتذاكر بتتباع بالدولار.. شارك فيها 8 آلاف معظمهم أجانب.. شارك فيها عمرو دياب واقل تذكرة كانت بـ 5 آلاف جنيه.. أيه الحكاية؟!
حفلة على سفح الهرم
فجأة الدنيا اتقلبت والعالم كله بيتكلم عن حفلة حصلت على سفح الأهرامات.. رقص ومزيكا وزحمة.. واجانب ماليين الفنادق.. وفيديوهات على السوشيال ميديا العالمية بتتكلم عن ضخامة الحفلة وإعجابهم الشديد بمكانها.. وانه مفيش اجمل من ان الحاضر يعانق الماضي في أعظم مكان حكى عنه التاريخ وأحد عجائب الدنيا السبعة.. أهرامات الجيزة..
وعلى الرغم من الانتقادات الكتير اللى اتعرضت لها الحفلة من المصريين.. بسبب بعض التصرفات غير الاخلاقية وغير اللائقة الل كانت من الحضور في الحفلة.. الا ان الجانب الإيجابي كان مهم جدا.. الحفلة دي عملت دعاية عالمية للسياحة في مصر.
لو كانت حملة مدفوعة كانت كلفت مصر ملايين الدولارات.. بالعكس الحفلة عملت دعاية ودخلت لمصر فلوس سواء من الفنادق اللي كانت متفوقه بالأجانب أو الحراك الا اكيد عملوه بعد وقبل الحفلة على كل المستويات في القاهرة والل منهم راح مدن تانية..
امن وامان
جانب تصديرها صوره مهمة جدا عن ان مصر امان وقادرة انها تواكب العالم وتطورات حتى في ظل الازمات الطاحنة لل بتعيشها البلد والمنطقة كلها.. ده غير طبعا ان مصر بتاخد نسبة من بيع التذاكر دي اللي هتوصل لـ 35٪.. وضرائب من الرعاة.. غير رسوم إقامة الحفلة نفسها في منطقة الأهرامات..
الحفلة كانت في منطقة بانوراما 2.. وكانت لفرقة ألمانية مشهورة جدا اسمها keinemusik ( كين ميوزيك).. واشتهرت الفرقة دي بأدائها المميزة في موسيقى التكنو.. وتضم عدد من منسقي وموزعي الاغاني المشهورين.. بيقعدوا يدمجوا بين الموسيقى والألحان وعملوا كده في اكتر من اغنية مصرية وعربية خلال الحفلة..
عمرو دياب
ومن أبرز الحضور في الحفلة كان الفنان المصري عمرو دياب اللي شارك بالغنا.. واحتفل الجمهور بوجوده بشكل كبير.. واتعرض لانتقاد لوجوده في حفلة زي دي من البعض.. الل شاف ان حفلة زيها زي حفلة ترافس سكوت الل اتلغت لنفس الاسباب تقريبا.. والحفاظ على عراقة المكان وتاريخه.. لكن قطاع كبير شاف ان الاهرامات لازم تستغل بشكل أوسع يناسب التطور الذي يعيشه العالم كل ثانية.. ومش لازم نتوقف عند التاريخ والذكاء الاصطناعي يغزو العالم..
https://www.instagram.com/reel/C6XREVrL0xu/?igsh=cjNnamtrMHpvaXhj
برعاية وزارة السياحة
الحفلة كانت تحت رعاية وزارة السياحة والآثار ممثلة في الهيئة المصرية العامة للتنشيط السياحي.. اللي شايفه ان الحفلات اللي زي دي مهمه جدا ومن أهدافهم زيادتها الفترة الجاية.. ومن ناحيته قال عمرو القاضي الرئيس التنفيذي للهيئة.. إن رعاية الحفلات دي ضمن إطار استراتيجي الهيئة للترويج للسياحة في مصر.. وان جزء من أهدافها أن مصر تكون وجهة حديثة ومعاصرة نابضة بالحياة بتجمع بين العراقة والحداثة.. وان التجربة السياحية فيها مش مقتصرة على التاريخ والحضارة بس.. لكن دايما هيكون في الجديد والمعاصر الل هيخلي تجربة السائح ثرية ومختلفة ومتنوعة..
وده اللى حصل مع الزوار خاصة أعضاء الفرقة نفسها.. الل الهيئة نظمت لهم برنامج زاروا من خلاله منطقة أهرامات الجيزة والمتحف المصري الكبير وقلعة صلاح الدين الأيوبي..
اكتر من 8 آلاف
الحفلة حضرها أكثر من 8 آلاف شخص أغلبهم اجانب.. والتذاكر تم حجزها من خارج مصر.. وتراوح سعرها ما بين 100 و 200 دولار ووصلت بعض التذاكر لـ 750 دولار.. كل الأجانب اللي حضروا من برا مصر تواجدوا من خلال حجز طيران خاص..
وعن تصرفات بعض الحضور الل ضايقت الناس.. قال رئيس الهيئة.. إن من الصعب التحكم في نوعية لبس الحضور.. لان اغلبهم اجانب ومن خارج مصر.. واكد ان الهيئة مالهاش ضوابط معينة بخصوص اقامة الحفلات وكل مهمتها.. تسهيل الإجراءات للفرقة والحفلة.. وان أي ضوابط اللي بيحطها المنظم وادارة الحفلة..
وقال.. محدش هيقدر يرضي كل الناس.. اللي حضر الحفل مبسوط بالمكان.. وإنه في مصر.. والبعض اعترض ودي وجهات نظر.. وأكد ان في ناس كتير مكانش عندهم فرصة يحضروا كانوا مبسوطين ونفسهم مصر تعمل فعاليات زي دي كتير..
خاصة ان استضافة حفلات الأجانب بيكون ليها رسايل كتير.. منها أن مصر فيها امن وامان.. وحفلة الفرقة الالمانية مش هتكون الاخيرة.. وخلال الفترة الجاية هتكون في حفلة الراب الأمريكي مترو بومين..
