تامر حسني يتحدث لأول مرة عن أزمة نجله: آدم حبيبي عمل عمليتين صعبين ادعولنا يعدى مرحلة الخطر

كتبت: أميمة أحمد

تحدث الفنان تامر حسني لأول مرة عن الأزمة الصحية التي مر بها طفله آدم ووجه رسالة تحذير للآباء.

وكتب تامر عبر حسابه الرسمي بـ فيسبوك:”أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا و على تليفوني و تليفونات كل المحيطين بيا هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس، و بقولكم كده عشان تبقوا حريصين مع نفسكم أكتر ولولادكم”.

وتابع:”مش كل سخونية تقولوا ده شوية برد وخلاص لا روحوا اكشفوا كويس و اعملوا سونار على البطن والزايدة مرة و٢ عشان برضو ساعات مش بيبان و لازم الدكتور يضغط بطريقة معيّنة، تقريباً أقوى شوية عشان يعرف لإني سمعت كتير اليومين دول إن الزايدة خادعة”.

وأضاف:” اطمنوا كذا مرة قبل لحظة انفجارها عشان بجد مشاكل بتحصل بعدها كبيرة و محزنة أوي، وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب و يعدي مرحلة الخطر يارب، بحق “كن فيكون”، اشفيه وعافيه، هو و كل ولادنا بس هو راجل و هيتحمل وإن شاء الله ربنا يكرمه و يعافيه و يحفظه هو و إخواته ويحفظ كل ولادكم يارب”.

واختتم:” وأحب أقول تاني شكراً من كل قلبي على دعواتكم، أنا شايف قلب كل حد فيكم و هو بيدعي بصدق متشكر أوي يا جماعة شكراً لكل اللي اهتم وسأل عن ابني و دعاله هنا أو على التليفون، واللي طلعوله صدقات لشفائه من غير ما يعرفونا شخصياً أنا مش لاقي كلام أشكركم بيه و أنا برضو بدعيلكم وبقول لكم مثلها وأضعاف أضعافها، وربنا يحفظكم ويحفظ أولادكم قادر يا كريم”