هيدي كرم تتحدث عن عمليات التجميل وتوجه رسالة للفتيات: كفاية هوس بالكمال وارجعوا لطبيعتكم

كتبت: أميمة أحمد

عبرت الفنانة هيدي كرم عن رأيها في عمليات التجميل وهوس الكمال في الشكل.

ونشرت هيدي فيديو لها عبر حسابها الرسمي بـ إنستجرام قالت من خلاله:” أنا تعبت أوي من فكرة الفيك على السوشيال ميديا، ومن فكرة إننا لازم نطلع على السوشيال ميديا معندناش حبوب ولا نمش في وشنا، ونفسي نطلع طبيعيين”.

وتابعت:” إحنا بني آدامين عندنا نمش وعيوب ومشاكل وحبوب وتجاعيد، ونفسي نتقبل عيوبنا ونتصالح معاها، وأنا مش ضد عمليات التجميل، ولكن بحب الحاجات اللي تخليني شكلي فريش أكتر، ومش كلنا عندنا دريسينج روم رهيبة وشنط وجزم، وإضاءة رهيبة”.

وأضافت:” وكلنا بقى لبسنا كتير أوي مرة واحدة، ومع كل هذه الإحباطات من جمال البنات على السوشيال ميديا كأنهم مفيهمش غلطة، وفي وسط كل هذه الاحباطات من الشعر والاكسسوارات، والهدوم الكتير والتريندي، وعملنا إحباط لبعض غير طبيعي، وأصبح عندنا عدم رضا”.

واختتمت:”وحاسين طول الوقت إننا ناقصنا حاجة عشان مش عندنا كل المحتويات اللي على السوشيال ميديا، وأنا تعبت وناس كتير أوي تعبت، وأنا قررت أشجعكم وأشجع نفسي وأشجع الجميع، إننا نرجع للطبيعي والحقيقي، ونحسس بعض إننا شبه بعض، ونرجح لحياتنا الطبيعية ونحسس بعض إن مفيش حد أحسن من حد”.