أول أجر ليه كان 300 جنيه.. وإيرادات أفلامه بقت تعمل ملايين.. ويتصدر إيرادات شباك التذاكر.. وصاحب أعلى أجر في السينما.. وبقى صاحب تركي آل الشيخ.. و يخرج كل الأفلام التي ينتجها ..
مفيش شك إن المخرج مروان حامد.. يعتبر من أشهر المخرجين على الساحة الفنية حالاً.. مش بس كدا.. دا كمان يعتبر أعلاهم اجرًا خاصة في السينما.. فـ “مروان حامد” بقا علامة مميزة في الإخراج.. وبقي اسمه زي الطبل.. لدرجة إنه بقا المخرج المفضل للمستشار تركي آل الشيخ.. وبقي مقرب منه ومخرج كل الأفلام اللي بينجها.. فيا ترى ايه حكاية مروان حامد.. وازاي وصل لـ تركي آل الشيخ ؟ ..
أول أجر ليه كان 300 جنيه
مروان حامد هو ابن الكاتب الكبير الراحل وحيد حامد.. وشرب حب الفن من والده.. وقرر يتجه لـ الإخراج.. ودرس في المعهد العالي للسينما وتخرج منه سنة 1999.. واشتغل أول مرة مساعد مخرج وهو لسة في الكلية.. وأول قبض اخده كان 300 جنيه.. لحد ما جاتله الفرصة إنه يكون مساعد مخرج لـ شريف عرفة.. وقدر يثبت رؤيته كمخرج فيما بعد.. وأخر أول فيلم قصير اسمه “لي لي”.. ولعب بطولته وقتها الفنان عمرو واكد.. وكان مقتبس من قصة قصيرة لـ “يوسف إدريس”.. وفاز الفيلم بجوائز دولية..
بداية النجاح مع عمارة يعقوبيان
ويبدأ بعدها في 2006 إخراج أول فيلم ليه.. وهو فيلم “عمارة يعقوبيان” اللي كتبه والده وحيد حامد.. ويكون معاه مجموعة كبيرة من الفنانين منهم عادل إمام ويسرا وهند صبري ومعالي زايد ونور الشريف.. وغيرهم كتير من الفنانين.. دا غير إنه من أضخم الانتاجات في الوقت دا.. وحقق الفيلم نجاح كبير جدًا.. فاختار “مروان حامد” العمارة اللي تم تصوير الفيلم فيها صدفة.. أثناء ما كان بيتمشي في منطقة وسط البلد… وتم التصوير فيها الفيلم كامل وحقق نجاح كبير..
إيرادات بـ الملايين
وبدأت أفلام مروان حامد تحقق ملايين الإيرادات في شباك التذاكر.. وبقا المخرج الأعلى أجرًا في السينما المصرية.. خاصة أنه أخرج أفلام بقيت متصدرة قائمة أعلى الإيرادات في السينما المصرية.. زي فيلم “الفيل الأزرق”.. وكمان فيلم “تراب الماس”.. وطبعًا فيلم “إبراهيم الأبيض”.. اللي محقق نجاح كبير لحد اللحظة.. وقال مروان إنه اختار سور مجرى العيون عشان يصور عنده مشهد لـ إبراهيم الأبيض بالصدفة.. فأثناء ما كان يصور إعلان.
شاف شكل الموقع واحتفظ بيه في ذاكرته.. واستخدمه بعد كدا في الفيلم.. وبهر الفيلم الجمهور بسبب طريقة إخراجه.. كمان كان عنده أساليب حديثة في الإخراج عن جيله.. فأثناء إخراجه فيلم “كيرة والجن”.. استخدم عناصر الجرافيكس .
وكان خايف الجمهور ميتقبلش دا.. لكن في النهاية الفيلم يتصدر إيرادات شباك التذاكر.. وبقا من أعلى الأفلام تحقيقا للإيرادات في السينما.. وكان جامع اثنين من أكبر النجوم في السينما وهما الفنان كريم عبدالعزيز والفنان أحمد عز.. وغيرهم كمان من النجوم..
صديق مقرب لـ تركي آل الشيخ
ومع زيادة نجاح مروان حامد يوم عن يوم.. اتفاجئ المتابعين إنه بقا صديق مقرب من المستشار تركي آل الشيخ.. رئيس الهيئة العامة للترفيه.. وكمان بقا دراعه اليمين فيما يتعلق بالفن والسينما.. خاصة إن “تركي” أعلن عن عدد من الأفلام المصرية التي هيتم إنتاجها خلال الفترة اللي جاية بإنتاج ضخم.. ويكون “مروان حامد” هو المخرج فيها.. غير إنه كمان بقا واحد من ضمن لجنة التحكيم في جائزة القلم الذهبي للأدب الأكثر تأثيرًا.. واللي أطلقها تركي آل الشيخ.. وبقا مروان حامد واحد من ضمن أعضاء لجنة التحكيم..
وحاليًا بيحضر مروان حامد مع تركي آل شيخ لـ أفلام جديدة.. فيا ترى هيقدروا يحققوا النجاح مع بعض ولا الجمهور هيكون ليه رأي تاني ؟
