كان عايز يخش مع زوجته في جلسة الكيماوي.. واتخانق مع فرد الأمن.. اضرب بالقلم قدام الناس واتقهر على نفسه.. ووقع من طوله في المستشفى ولفظ أنفاسه الأخيرة..
تفاصيل صعبة وحزينة عاشها المخرج تامر ضيائي قبل وفاته.. فكانت وفاته صدمة كبيرة للجمهور وكمان لأسرته.. خاصة إنها جت فجأة,, وكان مرافق لزوجته المريضة في جلسة الكيماوي.. ومحدش كان يتوقع ولا يخطر على باله إنها هتكون اللحظات الاخيرة ليه.. فيا ترى ايه الحكاية.. وايه اللي حصل للمخرج تامر ضيائي ؟ ..
كان مع مراته في جلسة الكيماوي
البداية كانت مع اصطحاب الفنان تامر ضيائي لـ “زوجته” لـ المستشفى.. عشان يكون معاها في رحلة علاجها بالكيماوي.. لكن أثناء تواجدهم في المستشفى.. حصل خلاف بين “تامر” وبين فرد الأمن.. وفجأة اتحول الخلاف لخناقة كبيرة بينهم.. فضرب “تامر” فرد الأمن بالقلم واتعدي عليه.. وبادله فرد الأمن الضربة على وشه.. ودا اللي خلى “تامر” في حالة ذهول وصدمة.. وكمان شعور بالقهر بعد ضربه على وشه.. وانفعل بشدة.. وفجأة وقع على الأرض واغمى عليه.. ولفظ أنفاسه الاخيرة في المستشفى..
مفاجأة في وفاة تامر ضيائي
وطبعا بعد الإعلان عن وفاء تامر ضيائي في المستشفى.. حصل جدل كبير إن فرد الأمن اتسبب في وفاة “تامر” بعد ما ضربه بالقلم على وشه.. لكن المفاجأة الجديد اللي ظهرت إن صديق “تامر” المقرب أكد إن “تامر” كان تعبان وفي أزمة نفسية قبل الخناقة بفترة.. ودا لأنه اتعرض للاضطهاد أثناء توليه منصب أمين عام بكلية صيدلة بجامعة القاهرة.. وقال في تصريحاته عن الأزمة النفسية اللي كان بيعاني منها صديقه:
“تامر كان عنده شد عصبي وقلبي،، حاجة زي موضوع اللاعب أحمد رفعت،، وهو كان أمين عام كلية صيدلة جامعة القاهرة،، وجت عميدة جديدة اضطهدته وشالته من منصبه، ومن بعد واقعة الجامعة دي وهو متأثر نفسيًا،، وجاله أزمة قلبية ودخل المستشفى وأجرى عملية قبل كدا،، الدكتور قاله أي انفعال خطر عليه،، وسبب وفاة تامر فرد الأمن، هو اللي دخله في حالة انفعال كبير”..
إنكار فرد الأمن تعديه عليه
وبالرغم من كلام صديقه إن “تامر” عاني من أزمات قبل الخناقة ما تحصل بينه وبين فرد الأمن.. لكنه تم القبض على فرد الأمن.. عشان يتم التحقيق معاه.. باعتباره المتسبب في وفاة “تامر” بعد الخناقة اللي حصلت بينهم.. وكمان تعديهم على بعض.. لكن فرد الأمن انكر تمامًا تعديه على تامر.. وأكد إن الخناقة حصلت بينهم.. بسبب إصرار تامر ضيائي إنه يخش العيادة هو وزوجته في دور غير دوره.. ودا اللي خلى الخناقة تكبر بينهم وتوصل لـ الضرب ومد الايد..
كان حاسس إنه هيموت
أما الأصدقاء المقربين لـ “تامر” فكشفوا إنه كان حاسس إنه هيموت قبل وفاته بأيام بسيطة.. وعشان كدا كان حريص يتقرب من الناس حواليه في الفترة الأخيرة.. وكمان يكون قريب من ربنا.. وقال واحد من أصدقائه المقربيين:
“ضياء كان حاسس إنه هيموت،، بطل تدخين من حوالي شهر أو ربما أكتر،، ومكنش بيسيب فرض وكل صلواته كانت في الجامع،، لو رايحين نحضر عرض لمسرحية كان يروح يصلي الأول،، ربنا يرحمه كان شخص طيب وعمره ما أذى حد”…
ولحد دلوقتي بيتم التحقيق مع “فرد الأمن” عشان يوصلوا لحقيقة اللي حصل مع “تامر ضيائي”.. فيا ترى نتيجة التحقيقات هتكون ايه ؟
