حد ما التقيتها عيني فوراً اصطدتها بونبونايه ملبساية بسكوتاية حلوة من كل الزوايا قصة حب فؤاد المهندس وشويكار أشهر ثنائي في السينما المصرية
ثنائي الفن والحب قصة حبهم بدأت ب تتجوزيني يا بسكوتة وانتهت ب ربنا زي ما أراد يجمعنا ببعض بيقول كفايا كان في تفاهم بينهم والنظرة واللمسة والحركة كمان
استمر زواجهم ٢٠ سنة اطلاقا ولكن استمر التواصل بينهم لآخر لحظة في عمر الفنان فؤاد المهندس تعالوا احكيلكم النهاردة عن قصة حب الاستاذ للفنانة شويكار .
اول مرة شاف فيها فؤاد المهندس شويكار كانت بتمثل في مسرحية مش معروفة وعرض عليها تمثل معاه في مسرحية السكرتير الفني وبدأ الإعجاب بينهم لكن معترفلهاش بحبه
وعرض عليها الزواج في مشهد مسرحي في مسرحية أنا وهو وهي فجأة بصلها وقالها تتجوزيني يا بسكويتة تفاجئت شويكار لان الاستاذ عمره ما بيخرج عن النص ابدا وده مش مكتوب في النص
مبقتش عارفة هو بيكلمها هي ولا بيكلم الشخصية في المسرحية فسكتت لحد ما عاد السؤال تاني وقالها تتجوزيني يا شويكار وهنا عرفت انه بيكلمها هي وردت عليه وقالت له مستنياها من زمان يا فؤاد واتجوزوا . .
الفنان فؤاد المهندس والفنانة شويكار قدموا مع بعض افلام سينمائية ومسرحيات كتير جدا وصل عددهم تقريبا ل ١٦٠ عمل فني
ولما انفصلوا بعد ٢٠ سنة زواج انفصلوا في هدوء محدش عارف ايه هي اسباب طلاقها ومن كتر حب فؤاد المهندس لشويكار رغم أنه عند مبدأ دايما أن الفن اولا وبعده العلاقات الشخصية
إلا أنه كان دايما بيفضلها عليه وبيهتم بدورها قبل دوره لدرجة أن فؤاد المهندس ادي لشويكار دور البطولة في مسرحية سيدتي الجميلة مع أن دورها كان أكبر من دوره وهو كان بيعمل ده بكل حب ليها وخلاها بطلة عليه حتى الصحافة كتبت وقتها وقالت تفوق التلميذة علي الاستاذ
ولكن هو بيعبر عن حبه ليها بالطريقة دي أنه بيفضلها على نفسه و بعد كل الحب ده ٢٠ سنة زواج انفصل الثنائي في الحياة وفي الفن كمان وكان أول مسرحية لفؤاد المهندس بعد انفصالهم
هي مسرحية سك علي بناتك ولكن كانت معاه بصوتها في المسرحية في مكالمات التليفون وفرحنا جدا بوجودها في المسرحية فؤاد المهندس كان عنده ولدين من زوجته الأولي احمد ومحمد وشويكار كان عندها بنت اسمها منه الله
ولكن هو بيعامل بنت شويكار كأنها بنته بالظبط وهي كمان بتعامله ولاده كأنهم ولادها
حتى طلع محمد فؤاد المهندس لي برنامج تلفزيوني وقال إنه زعل جدا هو وأخوه وكمان منه بنت شويكار على قرار انفصالهن وحاولوا يخلوهم يتراجعوا ولكن مترجعوش وكملوا حياتهم كأصدقاء ….
الفنانة شويكار مخلفتش من الفنان فؤاد المهندس ولكن كانت حريصة جدا انها تكون أم لأولاده ومتفرقش بينهم وبين بنتها وكأنهم كلهم عيالها
حب كبير جمع الثنائي الفنان فؤاد المهندس والفنانة شويكار
وحتى بعد الانفصال كانوا دائما على تواصل لحد اخر لحظة في حياة الفنان الراحل فؤاد المهندس
قالت عنه شويكار كان لي الحبيب والصديق والزوج والاخ والمعلم وأعتقد أنني كنت الحب الاول والاخير في حياته حتى عندما انفصلنا استمرت علاقتنا لآخر لحظة في حياته …
بعد شويكار خطب فؤاد المهندس مرة بس مكملش ومتجوزش بعدها خالص ولكن شويكار تزوجت ولكن هي كمان انفصلت
وفي فترة مرضه فضلت ترعاه وتطبخ له الاكل اللي بيحبه وتهتم بيه والآخر عمره فضلوا علي تواصل دائما ودي قصة الحب الكبير اللي جمع الثنائي فؤاد المهندس وشويكار
