طفولته كانت قاسية.. واشتغل حاجات كتير علشان يعرف يعيش.. عدت عليه ايام صعبة كان إفطاره وسحوره بطاطس محمرة.. بدأ مذيع اطفال وعاطف كان النقلة في حياته.. ودلوقتي الأعلى أجرا في الوطن العربي.. محطات من حياة البرنس احمد حلمي..
احمد حلمي
مشوار طويل للفنان أحمد حلمي مليان بالنجاحات.. بقى من نجوم الصف الاول وتصدر شباك الإيرادات كتير.. وعلشان يبقى ملك متوج على عرش الكوميديا.. لسنوات متتالية.. ووصل دلوقتي لانه يكون من الأعلى أجر في مصر والوطن العربي..
لكن مشواره ده مكانش سهل والنجاح فيه مجاش بسرعه.. ومر حلمي بمحطات كتير.. في بداية ظهوره مكانش بطل.. بمعني اصح كان عاطف.. لحد ما قدر يفرض نفسه على الساحة ويبقى برنس السينما المصرية..
مذيع اطفال
اتعرف احمد حلمي بكر مقدم برامج اطفال.. كان نفسه يمثل.. بس الموضوع مكانش ماشي.. لدرجة انه اختفى سنين بعد مشاركته الاولى في مسلسل ناس ولاد ناس.. سنة 1993.. قبل ما يرجع تاني ويظهر في شخصية سعيد في عبود على الحدود سنة 1999.. الدور ده مهد له الطريق.. وكان من الادوار الايقونية والل تعتبر محطات مهمة في حياته..
بعد فيلم “عبود على الحدود”.. شارك حلمي في أفلام “ليه خلتني أحبك” مع كريم عبد العزيز فيلم “عمر 2000”.. لكن الخطوة الأهم تقريبا والل لفت بيها كل الأنظار.. في شخصية عاطف من فيلم الناظر.. واللى تحولت لأيقونة.. في السينما المصرية..
انا عاطف معاكم
أنا عاطف معاكم.. الجملة الأبرز في شخصية عاطف والل تتلخص هو مين.. الشخص المهمش بين صحابه.. وعلى الرغم ان الدور صغير الا انه لفت الانظار اليه وكان من اهم ابطال الفيلم..
خفة دم أحمد حلمي وإلقاء للإيفيهات بسهولة ودون تكلف.. تخلي المشاهد يخرج من الفيلم وهو فاكره.. مينفعش ينساه.. لحد ما بقى النجم الاهم في الكوميديا والجمهور بقى بيروحله مخصوص.. علشان يبقى دلوقتي من ضمن أعلى الفنانين أجرا في تاريخ الوطن العربي..
الاعلى اجرأ
وده بحسب تصريحات تركي آل شيخ اللى قال في برنامج الحكاية.. من خلال الأفلام التى نقدمها، عندنا 3 ممثلين مصريين وصلوا إلى أعلى أجر سيسجل في تاريخ الوطن العربي، اللي هما أحمد عز وكريم عبد العزيز وأحمد حلمي.. وده خلال اعلانه عن عدد من الأفلام الضخمة للسينما المصرية.. الل حلمي ليه منها نصيب بحوالي 5 افلام.. واحدة مع كريم عبد العزيز وواحد اسمه النونو بطولته لوحده.. والباقي لم يتم الإعلان عنه لحد دلوقتي.. علشان تكون واحدة من المحطات المهمة في حياته..
طفولة قاسية
محطات صعبة عاشها حلمي على المستوى الانساني في حياته.. وقال انه عاش ظروف مادية قاسية جدا في طفولته.. والده كان بيشتغل في السعودية.. 10 سنين ورجعوا لمصر والده حاول الاستثمار في فلوسه وخسرها..
ويقول.. اعتمدت على نفسى واشتغلت أكتر من شغلانة وقت دراستي وكنت برسم على قزاز المحلات وبعمل ديزاينات وديكورات المسرح واشتغلت في مطبعة للملابس.. وكمل وقال.. عمري ماتخيلت إني هيبقى معايا فلوس وأبقى مشهور..
البطاطس
وعن جوازه بيقول.. اتجوزت منى زكي في 2002.. والجواز حياة مختلفة وأهم شيء في الزواج هو الوصول للغة التالتة لأن الراجل عنده لغة يتكلمها والست عندها لغة يتكلمها وزي ما يكون هو بيتكلم إنجليزي وهي فرنساوي وفي لغة تالتة مشتركة وهي إن الاتنين يتعلموا لغات بعض..
وفي آخر ظهور ليه في برنامج بيت السعد مع احمد سعد وعمرو سعد.. قال حلمي ان ايام الكحرتة والعزوبية كانت حلوة بس صعبة.. خاصة في الغسيل وفي الأكل وفي النظام وفي كل حاجه..
قال إن وهو عازب لما كان يدخل عليه رمضان ومفيش فلوس كانت بتبقى صعبة اوي.. صايمين وعاوزين يشبعوا ومفيش اكل.. ف كانوا بيجيبوا كيلو بطاطس ولتر زيت ويحمر وها وياكلوا في الإفطار والسحور.. الفلوس كانت يدوب يكفي إيجار الشقة واكل ع القد..
