خريج كلية تجارة.. واشتغل موظف في البنك.. والزهر لعب معاه.. وفيديو واحد حوله لـ يوتيربر معروف.. وبقي عنده متابعين بالملايين.. والفيديوهات بقت بدخله دولارات .. وبقا مليونير ونجم إعلانات لـ البنوك.. والمتحدة تعاقدت معاه عشان بودكاست جديد يقدمه..
مفيش شك إن إسلام فوزي يعتبر حاليًا واحد من أشهر اليوتيوبرز على السوشيال ميديا.. واللي بتحقق فيديوهات ملايين الفيوز على اليوتيوب والسوشيال ميديا بشكل عام.. فبسبب خفة دمه تحول “إسلام” ليوتيوبر مفضل عند المتابعين.. بيحبوا يتابعونه ويتفرجوا على فيديوهاته.. ويسمعوا تعليقاته على اللي بيحصل.. فيا ترى ايه حكاية اليويتوبر “إسلام فوزي”.. وازاي الزهر لعب معاه وبقا مليونير؟ ..
من موظف بنك لـ يوتيوبر معروف
إسلام فوزي شاب زي اي شاب تخرج من كلية تجارة.. واشتغل موظف في البنك.. وفي يوم قرر يعمل فيديو يعلق فيه على فيديو غريب شافه بشكل كوميدي,, ونشر الفيديو على اليويتوب.. والغريبة إن افيديو عمل مشاهدات ضخمة جدًا.. بسبب طريقة إسلام فوزي وتعليقه بشكل كوميدي ومميز حبوا فيه المتابعين.. ويوم عن يوم وفيديوهات جديدة نشرها وبتعليقات كوميدية.. بقا عنده ملايين المتابعين اللي بيستنوا فيديوهاته.. مش بس على اليوتيوب.. لا كمان على الفيسبوك والتيك توك.. وبقا بيدخله فلوس بالدولار من الفيديوهات والزهر لعب معاه..
نجم إعلانات معروف
وطبعًا بعد شهرة “إسلام” في الفيديوهات اللي بيعملها.. بدأت شركات الإعلانات تحاول تتعاقد معاه.. عشان يعملهم إعلانات لـ “البنوك”.. وفعلا إسلام بقا مش بس بيقدم فيديوهات كوميدية لا كمان بيقدم إعلانات.. وبقا دخله بيزيد أكتر.. وكمان بقا بيعمل فيديوهات كوميدية مع مراته ويعلقوا على الأغنيات الغريبة ويحللها.
ورغم إن “إسلام” قدر في فترة بسيطة يكون يوتيوبر معروف وناجح.. لكن رفض يسيب شغله كـ “موظف بنك”.. وشايف إن تقديمه الفيديوهات ميتعرضش مع شغله ابدًا.. فسبق وعلق على الموضوع وقال: “عملي في أحد البنوك لا يمكن أن يشغلني عن السوشيال ميديا،، أو ترك منصات التواصل الاجتماعي،، ولكني أحاول التوازن بينهما، خاصة أنني تعودت على منصات السوشيال ميديا،، وأصبحت جزءا لا يتجزأ من حياتي،، ولا يمكن تركه لأي سبب من الأسباب”..
مش بس كدا.. كمان “إسلام” بيحب يتفاعل مع المتابعين دايمًا.. فبعد كل فيديو ينشره بيطرح فقرة سؤال وجواب على انستجرام.. عشان المتابعين يتفاعلوا معاه.. ويطرحوا عليه الاسئلة اللي حابين يعرفوا اجابتها.. ويكون فيه بينه وبين المتابعين تواصل دايمًا..
تعاقد المتحدة مع إسلام فوزى
والمفاجأة إن الفيديوهات البسيطة اللي عملها “إسلام فوزي”.. وصلته لـ بودكاست مهم جدًا هيقدمه بالتعاون مع الشركة المتحدة للخدمات الإعلامية.. واللي تعاقدت معاه كـ “صانع محتوى” عشان يقدم سلسلة من حلقات البودكاست على المنصات الصوتية.. وعلى مختلف وسائل التواصل الاجتماعي.
واللي هيكون بروح شبابية وعصرية تناسب جيل الشباب.. خاصة أنه دايمًا يتعامل مع المحتوى الرقمي.. ويكون باسم “فيه ايه”.. ويقدم فيه موضوعات شبابية يقدمها بخفة دم.. وكمان هيكون فيه موضوعات اجتماعية “ولايت كوميدي”.. زي قصص الجواز والطلاق.. واساءة استخدام السوشيال ميديا كأداة لتصفية الحسابات.. واللجان الإلكترونية للمشاهير.. وحياة الفنانين والفنانات.. دا غير طبعا الترندات اللي بتظهر ودايمًا “إسلام” بيعلق عليها.. ويستعد “إسلام” حاليًا عشان يقدم البودكاست وكل المتابعين والجمهور متحمسين ليه.. خاصة إن “إسلام” ليه أسلوب مميز جدًا بيقدر يجذبهم بيه.. وكمان هتكون خطوة إضافية ليه إنه يقدم بودكاست..
قولنا ايه رأيك في المحتوى اللي يقدمه “إسلام فوزي”.. وهل بتعجبك فيديوهاته ولا لا ؟
