رجل أعمال معروف ورافضة تقول اسمه.. خرجها من الاكتئاب بعد انفصالها عن حسام حبيب.. واتخطبوا بعد 6 شهور بس من طلاقها.. وبيشتغل رجل أعمال وملوش علاقة بالفن.. وهيكتبوا كتابهم قريب ..
جدل كبير أثارته الفنانة شيرين عبدالوهاب.. بعد إعلان خطوبتها رسميًا.. فقررت “شيرين” تعمل موفينج أون وتبدأ حياتها مع شخص جديد.. وكمان تنسى علاقاتها مع حسام حبيب بعد كل اللي اتعرضت ليه في علاقاتها معاه.. والاكتئاب اللي حصلها ..وكمان مشاكلها مع أهلها .. فيا ترى مين هو عريس شيرين الجديد .. وهتتجوز امتي ؟ ..
رجل أعمال معروف ومن خارج الوسط
البداية كانت مع إعلان “شيرين” خطوبتها النهاردة من رجل أعمال مهم.. ودا بعد 6 شهور بس من انفصالها عن حسام حبيب.. فقالت “شيرين” في إعلانها: “أنا بعيش أحلى قصة حب،، وهكون زينة العرايس”.. فالظاهر إن علاقة شيرين الجديدة خليتها تتحسن وتتخلص من حالة الاكتئاب اللي عندها بعد انفصالها عن حسام حبيب.. ووقف جمبها كتير.. وعشان كدا قرروا انهم يكونوا مع بعض.. فاتخطبت ليه شيرين وكمان هيكتبوا الكتاب قريب..
عايز يحافظ على خصوصية علاقتهم
أما”شيرين” فبالرغم من إنها أعلنت خطوبتها بشكل رسمي.. لكنها رفضت تقول اسمه أو أي معلومات خاصة بيه.. ولا حتي نشرت صورة ليهم من الخطوبة.. فخطيب “شيرين” حابب إن علاقتهم الخاصة تكون بعيدة عن الإعلام والسوشيال ميديا.. وتكون علاقتهم خاصة بيهم هما بس.. خاصة بعد الانفصال اللي حصل بين حسام حبيب وبينها.. والانتقادات والهجوم اللي اتوجهت لـ حسام حبيب.. وفشل علاقتهم أكتر من مرة.. فكل ده أسباب خليته يتمسك بإنه ميعلنش عن شخصيته للجمهور..
رد فعل غريب من حسام حبيب
أما حسام حبيب وعكس ما كان الجمهور متوقع.. فكان ليه رد فعل غريب على خطوبة شيرين.. فبالرغم من إنه كان دايمًا بيعبر عن حبه الكبير وتعلقه بيها حتى بعد الطلاق.. لكنه كان سعيد إنها بدأت حياة جديدة مع إنسان بتحبه.. وكمان باركلها وبارك لـ خطيبها على الجواز.. وقال حسام حبيب في كلامه: “ألف ألف ألف مبروك يا شيرين، وبتمنالك أحلى حياة في الدنيا، والحمدلله رب العالمين إنها سعيدة وأشوفها سعيدة على طول، وربنا يفرحها دائما، أنا علاقتي بيها ملهاش علاقة بموضوع الجواز والكلام ده، بالعكس أنا أتمنى أنها تكون أسعد واحدة في الدنيا، ليها ولـ خطيبها”.. ومش بس كدا.. دا كمان حسام حبيب وعدهم إنهم هيقدملهم أغنية مخصوص ليهم في البومه الجديد واللي المفروض يتم إصداره خلال الايام الجاية.. وقال: “وأنا هعملهم أغنية مخصوص في ألبومي الجديد هدية ليهم،، لأن خطيبها رجل محترم جدا جدا، وبحترمه جدا”..
والأغرب إن خطيب شيرين رد عليه ووصفه بـ إنه “راجل نبيل”.. فالظاهر إن حسام وخطيب شيرين الجديد يعرفوا بعض كويس.. خاصة إنه “حسام” كان عارف الخبر من قبل حتي ما تعلن عنه.. وعارف مين هو.. لكن لحد دلوقتي الجمهور ميعرفش ازاي يعرفوا بعض ولا هو مين خطيب شيرين..
نبوء ليلى عبداللطيف عن شيرين
كمان الأغرب في خطوبة “شيرين”.. إن خبيرة الفلك اللبنانية ليلى عبداللطيف.. توقعت خطوبة شيرين قبلها بفترة .. وأكدت إنها مش هترجع لحسام حبيب.. فقالت في اخر توقعات ليها مع عمرو أديب عن علاقة “شيرين وحسام حبيب”: “حبيبة قلبي شيرين هتستقر عاطفيًا، وستعود شيرين اللى احنا بنعرفها أول ما ابتدت،، شيرين عبدالوهاب هتتغير،، وبالمستقبل لا مش هترجع لـ حسام حبيب”..
وفعلا شيرين حاليًا بتحضر لكت كتابها مع خطيبها الجديد.. فيا ترى الصداقة بينها وبين حسام حبيب هتستمر .. ولا العلاقة هتنقطع بينهم ؟
