ليهم نفس تاريخ الميلاد.. ورفض دخولها عالم الفن.. قرر مع العيلة يتخلص منها.. وعاشت أصعب فترات حياتها بعد وفاته.. سر خلاف هدى سلطان مع شقيقها الفنان محمد فوزي..
العصر الذهبي
في 5 يونيو 2006 رحلت عن عالمنا النجمة الكبيرة هدى سلطان.. واللى تعتبر واحدة من أهم وأشهر النجمات في العصر الذهبي.. واللى كتير ميعرفوش ان هدى سلطان هي الاخت الصغيرة للفنان الراحل محمد فوزي.. واللى كان معارض بطريقة فظيعة لشغلها في الوسط الفني..
وقالت إنه كان بالنسبالها اب واخ وام كمان.. لأنه كان يرعاها من وهي طفلة صغيرة.. وكان صديقها المقرب وحامل اسرارها الوحيد من بين اخواتهم.. وبتقول.. “كان أب وأخ وحتى أم ليا، كنت بعتبره صديقي وبقوله أسراري، ولما خاصمنى ومبقاش يكلمني ده أثر عليا نفسيا وصحيا..
أزمة كبيرة
واتخاصموا بعد أزمة كبيرة حصلت بينهم.. بسبب انها قررت تدخل مجال الفن.. وسابت بيتهم في طنطا واتنقلت على القاهرة.. وده وقتها كان تقريبا في الخمسينات.. وحاولت انها تندمج مع الوسط الفني.. علشان تلاقي لنفسها فرصة لدخول عالم السينما..
وقتها عارض فوزي بشدة قرارها ده.. رغم انه عارف انها تعشق الغناء من وهي صغيرة.. ودايما كانت بتغني في الحمام وبين أصحابها.. ولما لقاها مصممة على رأيها بدأ يحاربها في الأدوار التي ترشح لها.. وعلى سبيل المثال.. لما طلبها الفنان محمد عبد الوهاب.. لدور بطولة معاه.. فطلبه محمد فوزي وقاله.. مالوش لزوم.. وكان دايما بيعمل كده.. لحد ما وقفله المنتج جبريال نحاس.. واداها شخصية البطولة في فيلم ست الحسن..
ولما فوزي لقى نفسه مش عارف يمنعها.. حاول انه يفرض سرية شديدة على الموضوع وبعت للمنتج جبريال نحاس.. وحاول انه يستعين بزميله المنتج حلمي رفلة.. لكن النحاس رفض بشدة وقاله.. البنت حلوة وصوتها كويس لو أنا مجبتهاش أي منتج تاني هيجيبها.. ليه أنا مكسبش.. وهنا بقى حصلت مشكلة كبيرة جدا بينهم.. وقرر فوزي يبعد عنها تمام وفضل الخصام بينهم لسنوات حاولت كتير تحله ومعرفتش..
واجتمع بمجلس العيلة وقالهم انها تسيء لسمعتهم وهتجبلهم العار وقرروا يتخلصوا منها وكان اول واحد اتحمل مسؤولية عقاب قتلها هو محمد فوزي.. ولكن مع نهاية المجلس قرروا يدوها فرصة ثانية..
ولعب القدر لعبته ووقع محمد فوزي فريسة المرض الذي عانى منه سنين..
وبعد سنين طويلة مرض فوزي مرض شديد.. وكانت بتطمن عليه من زوجته الفنانة مديحة يسري يوميا.. لحد ما عرضت عليها مديحه تروح تزوره حتى لو رفض.. وقالتلها.. تعالي زوريه حتى لو رفض يقابلك أقعدي معانا.. وراحت فعلا ولما دخلت عليه اوضته.. مقدرش يعمل حاجه غير انه يفتح ايده ليها ويحضنها..
نفس تاريخ الميلاد
height=”169″ />
وبتحكي هدى سلطان عن علاقتها بمحمد فوزي وبتقول.. معارضة فوزي لـ انشغالي بالفن كانت خوف عليا.. الفنان زمان مكانش له المكانة والتقدير زي دلوقتي.. النهاردة الفنان لا يقل عن وزير أو سفير.. لما بيسافر برة مصر بيكون سفير لبلده وتصرفاته لازم تكون محسوبة..
وبيتشرك الشقيقين في تاريخ الميلاد.. يوم 15 اغسطس لكن كل واحد فيهم في سنة.. محمد فوزي مواليد 1918.. وهدى سلطان اتولدت في 1925.. الاثنين تميزوا بحنجرة ذهبية.. وصوت من السماء ومواهب عبقرية في الفن بشتى أنواعه
وفاة محمد فوزي
اتولد الثنائي في مدينة طنطا.. محمد فوزي كانت موهبته طاغية وظهرت بدري.. ف انتقل للقاهرة.. علشان يبدأ مشواره الفني.. بعد ما حط رجله بقوة وثبات في عالم الفن والنجومية.. واتفاجئ باخته هدى سلطان بتاخد نفس خطواته.. وزي ما قولنا هو مكانش طايق دخولها عالم الفن..
وكانت فترة مرضه فارقة جدا في علاقتهم.. وبعد تعافيه شوية لقي نفسه مدين لها بالعرفان.. وكان الصلح بينهم واعترافه الكامل بموهبتها.. والتعاون معها في الالحان والافلام..
اصعب موقف في حياة هدى سلطان.. كان يوم 19 اكتوبر 1966.. لما رحل توأم روحها الفنان محمد فوزي.. وأصيبت بانهيار شديد بعد سماع الخبر.. وكانت من اصعب لحظات حياتها لأن علاقتها بيه مكانتش علاقة اخ بس.. لكنها كانت دائما تقول احنا روح في جسدين..
