مرتبطين من فترة.. كتبوا الكتاب في جو عائلي والفرح الخميس.. أشهر مونتير في الوسط الفني.. ويشتغل من وهو 16 سنة.. اشتغل في مارڤل.. وأهم أعماله الفيل الازرق واشتباك.. معلومات عن احمد حافظ عريس جميل عوض..
عقد قران جميلة عوض
فاجأت النجمة جميلة عوض جمهورها بإعلان عقد قرانها على المونتير أحمد حافظ.. في أجواء عائلية خاصة جدا بحضور عدد من الأصدقاء المقربين وبعيدا عن عدسات الكاميرات..
وكشف والدها إن جميله اتخطبت لحافظ من فترة طويلة.. وكتبوا الكتاب والفرح هيكون يوم الخميس 6 يونيو 2024.. والفنانة جميلة عوض بعادتها مش منفتحه بحياتها الشخصية على السوشيال ميديا.. علشان كده في حياتها اسرار كتير محدش يعرفها..
مونتير شهير
وعريس جميلة عوض من الوسط الفني.. وهو المونتير أحمد حافظ واحد من أشهر المونتيرين.. والل قدر يحقق نجاحات كبيرة جدا مؤخرا.. على مستوى الدراما والسينما.. ومن أبرزها فيلم كيرة والجن.. مسلسل تحت الوصاية.. فيلم إن شاء الله ولد.. وفيلم ليلة قمر 14.. فيلم العارف.. فيلم فوي فوي فوي.. مسلسل هجمة مرتدة، فيلم الفيل الأزرق 2.. وعلشان كل الأعمال الجامد اللي عملها دي.. تم اختياره لواحد من أضخم الأعمال.. مسلسل مون نايت من انتاج شركة مارڤل..
وأحمد حافظ هو ابن المهندس محمود حافظ وكان بيشتغل مدير استديوهات الأهرام.. عنده 42 سنه.. وبيكبر عن جميلة عوض بـ 9 سنين.. لان هي عندها 33 سنة..
بداية مشواره
حافظ بدأ مشواره الفني في سن صغير جدا.. وكان عنده وقتها 14 سنة.. بعد ما خد كورسجرافيك وهناك شاف استديو للمونتاج فأثار فضوله.. وحب يعرف ازاي اللقطات بتتقطع وبتتعمل.. ف بقى يغيب عن دروس الجرافيك ويروح يحضر دروس مونتاج..
وبعد سنتين بالظبط الصدفة لعبت دورها بعد ما غاب مونتير كان شغال على عمل ما وكانوا محتاجين يعدلوا بعض المشاهد.. وهنا كانت الفرصة.. اقترح حافظ انه يعملها بنفسه لكنه رفضوا في الاول.. بس بعدها فكروا وقالوا له اعمل التعديلات.. وعملها وعجبتهم.. ومن وقتها بقى مونتير وعمره لسه 16 سنة..
مارڤل
حب حافظ يدرس مونتاج السينما في معهد السينما.. بس منجحتش في اختبارات القبول.. غير أن أهله مكانوش قابلين اصلا من البداية.. وقالوا له خد الشهادة واشتغل اي حاجه انت عايزها بعد كد.. وفعلا تخرجت من كلية التجارة الخارجية قسم ادارة الاعمال..
والنقل اللى حصلت لحافظ من السينما المصرية لمارڤل.. جات من خلال انه كان شغال مع المخرج محمد دياب على فسلم اميرة.. وكان بيكلمه عن فيلم مون نايت.. بس مجابلوش سيرة انه يشتغل معاه.. وبعد ما خلصوا شغل اميرة.. بعتلوا دياب رسالة بخصوص مارڤل وبعد اسبوع.. جاتله رسالة على الميل وعمل مكالمات على زوم مع الشركة.. الموضوع بالنسباله كان صعب لان مبيعرفش يتكلم انجليزي كويس..
وعمل مجموعة اختبارات على زوم.. وبعتلهم أعمال هو اشتغل عليها زي الفيل الازرق وتراب الماس.. واشتباك واميرة.. ومكانش متوقع انهم هيقبلوه.. لانهم اصلا بيشتغلوا مع اهم اتنين مونتيرين في العالم.. سيدريك نيرن سميث وجون سوبيل..
بس قدر حافظ يعجبهم خاصة بفيلم اشتباك وفيلم اميرة.. وبيقول حافظ.. الافلام دي عجبتهم علشان فيها مشاعر كتير وهما كانوا عاوزين حد بوجهة نظر جديدة وأسلوب مختلف ومن خلفية تانية..
واشتغلت جميلة عوض مع حافظ في عدد من الأعمال.. منها فيلم الضيف ومسلسل لا تطفئ الشمس وهيبتا.. ولسه محدش فيهم كشف بالظبط امتى بدأت قصة حبهم..
