بدأها محمود حمدان وتبعه أكثر من شخص.. فنانين اتهموا كبار النجوم بالغرور

كتبت: أميمة أحمد

تصدر المؤلف والفنان محمود حمدان مؤشرات البحث عبر مواقع التواصل الاجتماعي بعد كشفه عن موقف صعب جمعه بالفنان أحمد آدم في بدايته الفنية.

 وكنت حمدان عبر حسابه الرسمي بـ فيسبوك:” سنة 2007 أخدنا الدكتور جلال الشرقاوي علشان نمثل في مسرحية لأحمد آدم، كنا مجموعة من شباب أكاديمية الفنون ولسه في بداية طريقنا، أحمد آدم كان مغرور ومتعالي بشكل غريب”.

وأضاف حمدان: “كنا قبل العرض بيوم وبنعمل بروفة جنرال، ودخلت أعمل دوري ومن حظي السيئ إن اللي كانوا قاعدين في الصالة ضحكوا، أحمد آدم وقف البروفة، وقدام كل الناس سمعني أسوأ كلام يقوله فنان محترف لشاب لسه بيشق طريقه، (أنت هتاخد فرصتك بس مش معايا مع حد تاني، تقف مكانك متتكلمش) ولم يكتفي بذلك، قالي مش هتشتغل يلا أمشي”.

وواصل: “خرجت من المسرح والدموع مكتومة جوايا، وأصحابي بيحاولوا يواسوني، (مصطفى أبو سريع، وحسني شتا، وإبراهيم السمان، ومحمد العمروسي)، روحت صليت ودعيت على أحمد آدم وأنا منهار من البكاء، ومن 5 سنين كلمني منتج صديقي علشان أكتب فيلم لآدم، وقولتله لو هتديني 100 مليون مش هكتبله، الآن بدعيله ربنا يفك كربه ويسامحه ويكرمه، وأنا مسامح”.

أما ياسر عزت فقال:”بمناسبة البوست بتاع الكاتب والمؤلف محمود حمدان بخصوص الفنان أحمد ادم، مره زمان كنت بعمل مسرحية اسمها كاليجولا وجه الفنان محمد لطفي يتفرج وعجبه العرض وصارت صداقه علي الضيق كده، وكان الفنان محمد لطفي بيصور فيلم وقتها فيه نجوم كتير أوي وأخراج مخرج كبير طلبت منه ان اروح أزوره في التصوير واهي فرصة يمكن يكون فيه نصيب لشغل يعني”.

وأضاف:” مطولش عليكم قولولي طول روحت اللوكيشن واستقبلني الفنان محمد لطفي كويس جدا مع اني مكنتش صاحبه اوي بصراحة، وصادفت ان الكاست كله كان متجمع وقاعدين مع بعض ، نجوم الفيلم كلهم ،

 فخدني من إيدي ودخل قالهم ده ياسر عزت ممثل وشوفته بيعمل كاليجولا وممثل جامد جدا، فكان موجود نجم كبير ، اكبر الموجودين سنا ، رد عليه قاله يا سلام .. ممثل جامد جدا ، هي المشرحة ناقصه قتلا يعني ، ايه جامد جدا دي”.

واختتم:” مفهمتش ساعاتها هو بيتكلم بجد واللا بيهزر واللا ايه بالظبط بس خدت الكلمتين ومن اللوكيشن علي بيتنا وحتي مقابلتش المخرج، النجم الكبير مش بس كبير بنجوميته لا ده كبير باحتوائه للأصغر منه في الشغلانة والدعم للصغير ده واجب علي اي نجم كبير ، حتي لو مشجعوش ميحبطوش لأنه بسبب كلمه أو تصرف ممكن يبطل الشغلانه اساسا، طبعا أنا مش هقول إسم النجم الكبير ده ، احسن الناس الكيوت الملايكة ام جناحات تشتمني واطلع قلبي اسود ومبسامحش وربنا مش هيكرمني ابدا”.

أما ربنا ممتاز فقالت:” أنا لو حكيت عن الظلم اللي اتعرضت له في الشغلانة هكتب كتاب”.