الناقدة فايزة هنداوي: عصام عمر وأحمد مالك وداش وغزي وطه دسوقي جيل عنده وعي أكتر من جيل السقا وهنيدي
كتبت: أميمة أحمد
كشفت الناقدة فايزة هنداوي عن رأيها في جيل الفنانين الشباب مش عصام عمر وطه دسوقي وأحمد غزي حيث قالت:” جيل عنده وعي وفهم عميق للفن”.
وتابعت فايزة هنداوي عبر حسابها الرسمي بـ فيسبوك:” كلنا لاحظنا إن في جيل جديد من الممثلين الموهوبين زي عصام عمر، أحمد مالك، أحمد داش، وطه دسوقي، وأحمد غزي وعمر رزيق، واللي بدأوا يتربعوا على عرش الساحة الفنية”.
وأكملت:” لكن من وجهة نظري، أكتر حاجة بتميز الجيل ده بجانب الموهبة هي الثقافة والوعي والفهم العميق للفن، والرؤية الواضحة للي بيقدموه الممثلين دول مش بس بيشتغلوا على تحسين مهاراتهم التمثيلية، لكنهم كمان فاهمين قيمة الفن ودوره وعندهم وعي بقضايا المجتمع”.
وأضافت:” ده وضح لي بشكل كبير من خلال متابعتي للقاءات بتاعتهم وتصريحاتهم ومنشوراتهم على مواقع التواصل الاجتماعي”.
وأكملت:” الوعي ده مكنش موجود في الجيل السابق بتاع أحمد السقا، وهنيدي، ومحمد سعد وغيرهم، صحيح إنهم قدموا أعمال مهمة، لكن الوعي اللي موجود دلوقتي مع الجيل الجديد مختلف، لأنه بيعكس فهم أعمق للمسؤولية الاجتماعية والإنسانية للفن”.
واختتمت:”علشان كدة أنا عندي ثقة إن الجيل ده هيقدّم أعمال فنية اهم وابقي وهيكون تأثيرهم أكبر“.
