أحمد عز بمهرجان القاهرة : مسلسل ملك روحي غير حياتي الفنية بالكامل وأتمنى أفلامي تظل في ذاكرة الجمهور

في ندوة تكريمه في مهرجان القاهرة السينمائي الدولي في دورته الـ45، أحمد عز كشف عن أهم محطات في مشواره الفني وبدأ يتكلم عن المسلسل اللي غير كل حاجة في حياته، مسلسل “ملك روحي”.

 قال إنه كان نقطة تحول كبيرة ليه في عالم الفن، واعتبره بداية انطلاقته الحقيقية.

واتكلم عن كيفية ترشيحه للمسلسل بعد ما اعتذر عنه أحد النجوم، وقال إنه في أول أيام تصويره حس إنه مش قادر يكون بنفسه قوة الفنانة الكبيرة يسرا.

 لكن بعد الحلقة السادسة، المخرج مجدي أبو عميرة قاله إنه هينجح بشكل كبير، وفعلاً كان المسلسل سبب رئيسي في نجاحه وكان بداية لمرحلة جديدة في مشواره الفني

و كمل أحمد عز كلامه وقال كان المسلسل وش السعد عليا، وبعد نجاحه، اتصل بيا المنتج وائل عبدالله وتعاقد معايا على ثلاثة أفلام، وبدأت أفهم معنى السينما بشكل جديد”. 

كمان قال إنه في البداية كان الناس بيختاروه لأدوار معينة علشان شكله، لكنه مع الوقت اكتشف إن التمثيل مش بس شكل، وأنه بقي بيركز أكتر على الشخصية والأداء، وبيفكر في الناس اللي هتنزل تتفرج على الفيلم وتدفع فلوس عشان تعيش التجربة دي.

ووجه عز شكر خاص للمخرجين اللي اشتغل معهم زي دكتورة سميرة محسن، واللي شجعته على الالتحاق بمعهد الفنون المسرحية. وقال إنهم كانوا السبب في نجاحه ووصوله للمكانة دي. كمان اتكلم عن فيلم “مذكرات مراهقة” اللي كان له دور كبير في تطوره ونجاحه.

وفي الندوة، وجه نصايح للشباب اللي عايزين يدخلوا مجال التمثيل، وقال إن أهم حاجة هي الاجتهاد، وملوش علاقة باليأس أو الإحباط. كمان نصحهم إنهم يسمعوا لخبراء المجال، واختيار الأدوار المناسبة لقدراتهم، و “التعلم من الخبراء والالتزام هو الأساس”.

أما عن عادل إمام، فقال أحمد عز إنه بيعتبره قدوة ونجم ملهم للجميع، وإنه اتعلم منه نصيحة مهمة هي الالتزام بالسيناريو وتقديم أفلام تفضل في ذاكرة الجمهور.

 وقال: “عادل إمام هو اللي خلاني أفكر في تقديم أفلام تعيش في الذاكرة وتحقق إيرادات. 

وأتمنى تفضل أفلامي في ذاكرة السينما المصرية زي عمالقة الفن”.

و شكر عز الفنان القدير الراحل نور الشريف، وقال إنه اتعلم منه كتير، خصوصًا في موضوع احترام الاسم وتقديم الأعمال بعناية، وأشار أنه استفاد جدا من العمل معاه في فيلم “مسجون ترانزيت” واتعلم منه ازاي بيكون احترام المهنة والعمل بأعلى مستوى……

واتكلم كمان عن أدوار الاكشن وأنه من بدايته كان متحمس جدا أنه يعمل مشاهد الأكشن بنفسه زي فيلم الرهينة ….