تعرفوا أن الفنانة عايدة رياض لما شاركت في بطولة مسلسل “حالة عشق” كانت مصابة بالسرطان وبتاخد جلسات كيماوي وقتها ومخبية عن الجمهور لحد ما تتعافى وقالت في آخر تصريحاتها تعافيت وبشكر ربنا على المرض — تعالوا نعرف قصة قوة وصمود للفنانة الكبيرة عايدة رياض قصتها مع السرطان وأنها رغم صعوبة مرضها كانت بترقص وتغني وتضحك دايما لان عندها امل كبير في الشفاء وكونت صداقة مع ممرضات المستشفى والصداقة استمرت لحد دلوقتي-
عايدة رياض الفنانة اللي أسعدتنا بأدوارها المميزة على مدار السنين كانت في مواجهة غير مرئية وصامتة مع مرض السرطان كان خلف ابتسامتها القوية كانت عايدة تخوض معركة كبيرة
صحيح إن حياتها الشخصية كانت دايمًا بعيدة عن الأضواء، لكن رحلتها مع المرض كانت تحدي صعب جدا اتكلمت عنه بس بعد ما أخفت عن الجمهور مرضها لمدة 3 سنين وواجهت المرض في صمود وقوة وصبر وارادة قوية
كشفت الفنانة القديرة عايدة رياض عن إصابتها بمرض السرطان في المثانة، كان الورم في حجم الزيتونة أجرى ليها الطبيب جراحة بالمنظار، وبعد التحليل، تبين أنه ورم خبيث
تعرضت عايدة رياض لعلاج الأورام مع طبيب مصري شهير، وطلب منها الطبيب المعالج انها متوقفش عملها ورجعت فعلا للعمل بعد ثلاث جلسات كيماوي وطلب منها الطبيب ترتدي باروكة بعد تساقط شعرها بعد جلسات الكيماوي. وقتها كانت تصور دور أخت بوسي في مسلسل حالة عشق مع النجمة مي عز الدين.
وطلبت عايدة رياض إجازة ثلاثة أيام كل شهر من غير ما فريق العمل يعرف عن إصابتها بالمرض. ولما انتهت عايدة رياض من جلسات الكيماوي، طلب الطبيب منها إجراء عملية إزالة المثانة وتركيب مثانة صناعية. وعلى الرغم من صعوبة العملية وتوصيات الأطباء بالسفر إلى فرنسا، فضلت عايدة رياض الثقة بالله والصمود في مواجهة المرض. وقالت عايدة ان أصعب لحظة في حياتها لما فقدت شعرها بسبب الكيماوي
ووقت ما كانت عايدة رياض بتتعالج وبتاخد جرعات الكيماوي بدأت في تكوين صداقات مع الممرضات في المستشفى وكلهم كانوا عارفين بمرضها وقالت عايدة أنه “على الرغم من صعوبة مرضها لكنها كانت بتضحك وترقص وتغني معاهم دايما وكان عندها أمل كبير في الشفاء” واكدت ان لحد دلوقتي صداقتها مستمرة مع الممرضات في المستشفى
وقالت عايدة رياض الحمد لله أنا دلوقتي كويسة جدًا، وبشكر ربنا على المرض وكل شيء، وكانت أزمة ومرت والمرض متجددش معايا الحمد لله، وبشكر الجمهور على سؤاله عني.
وعبرت عايدة رياض عن أن مرورها بتجربة الإصابة بمرض السرطان كانت الأصعب في حياتها؛ لأنها حست أنها قريبة من الموت، لكنها في نفس الوقت متخلتش عن الأمل.
وأكدت الفنانة عايدة رياض علي انها تعافت من السرطان بالكامل، وتخضع إلى عدد من الفحوصات الطبية بانتظام، عشان تتأكد أن المرض الخبيث ميرجعش تاني بنقول للفنانة الكبيرة عايدة رياض حمد لله علي السلامة
