عملت عملية تجميل.. بس مقولتش عملتها فين.. بعد ما كانت رافضة تماما.. دلوقتي معندهاش مانع كل فترة تعمل تظبيطات.. فتى أحلامها لازم يكون طموح وبتحب شغلها.. ومنى زكي بالنسبالها نمبر وان..
التجميل
طول عمر الفنانة أمينة خليل بتأكد على حبها لشكلها.. وانها مستحيل تفكر انها تغير اي حاجه في شكلها أو تلجأ لأي عمليات تجميل.. لأنها راضية جدا وشايفه ان ده الشكل المثالي ليه ومتحبش تغييره..
بس مؤخرا وفي آخر تصريحات لها فاجأت أمينة جمهورها أنها عملت تجميل من غير ما تكشف عن أي تفاصيل عن الموضوع.. وقالت أمينة.. عملت عملية تجميل مؤخرا رغم اني كنت رافضة الموضوع تماما زمان.. بس بعدين اكتشفت اننا بنكبر وبنشتغل في السينما.. وطول الوقت وشي يتعرض لمشاكل.. وبقيت دلوقتي منفتحة أكثر على الموضوع.. ف إذا كان في حاجه محتاجه تظبيط وعاملة مشاكل نفسية اكيد بلجأ لتعديلها وهي حاجات صغيرة علشان الراحة النفسية بس…
فتى أحلامها
وازمة امينة خليل كانت دايما في مناخيرها.. ودايما كان بيجيلها كومنتات عليها.. وأنها ليه متعملش فيها تجميل.. ومن بعض الصور.. الل اكيد مش هتكون موضحه اوي.. بس تقريبا امينة عدلت بس الاعوجاج الل كان موجود في مناخيرها.. ودي مش بتحتاج جراحه اكتر حاجه كانت مرعوبة منها امينة.. وبقت الدكاترة بتعمله دلوقتي بالفيلر..
أمينة كمان اتكلمت عن مواصفات فتى أحلامها.. واللى كان ابرزها انه يكون طموح لان هي طموحة جدا.. ويكون ذكي يعرف يحقق طموحاته وأهدافه.. وقالت امينة انها ساعات كانت بتتكسف من شغلها علشان الشخص الل مرتبطه بيه ميحسش انها احسن منه.. وبدأت تبقى مشكلة عندها لحد ما وصلت لقناعة انها لازم تكون فخورة قدامه ومفيش حد يستاهل تعمل كد علشانه..
وقالت أمينة.. الشخص اللي هييجي ويحبني بجد وتكون علاقتنا صالحة.. يحبني بكل ما فيا و يحب نجاحي.. ويكون واقف بدرجة كافية من أن نجاحي مش هيهز ثقته بنفسه.. وهيكون فخور بيا مش العكس.. ولو حد خيرني بينه وبين التمثيل هختار التمثيل..
التنمر
وبخصوص التمثيل.. اتكلمت أمينة عن القضية اللي تحب انها تقدمها في عمل فني قريب.. وهي قضية التنمر.. نفسها تناقش الموضوع جدا.. لانه موجود بقوة ومحدش اتكلم فيه كفاية.. ومحدش فكر يستخدم سلاح الفن.. الل لازم يتم استخدامه في القضايا الل بتحصل في المجتمع.. وهي مش عاوزة تتكلم عن تنمر شخص على شخص.. لا التنمر بشكل عام.. بداية من الأطفال في المدارس والكوارث اللي بنسمعها.. مرورا بالتنمر على السوشيال ميديا وتأثيره على الأشخاص الذين يتعرضون للمعاناة دي.. وممكن توصل حد للانتحار..
واهتمامها بالقضية دي.. جي من ان الموضوع بالنسبالها كمان شخصي.. لانها بتتعرض للتنمر من على السوشيال ميديا ومن ناس حواليها..
منى زكي
أما النجم اللى تتمنى امينة انها تشتغل معاه في الفترة الجاية.. بدون تفكير قالت ان نفسها تمثل مع منى زكي واقدم معاها فيلم.. لانها بحترمها جدا كفنانه.. خطواتها تبهرها ودايما شغلها بيكون نمبر وان.. خاصة انها من الفنانات النوادر تاا قدروا يعملوا عيلة وحياة خاصة وينجحوا في شغلهم.. وقالت كمان انها نفسها تشتغل مع كريم عبد العزيز.. رغم ان كان ليها الشرف بالشغل معاه في مسلسل الحشاشين.. لكن تحب تشتغل معاه تاني..
