![](https://onetakeeg.com/wp-content/uploads/2024/07/IMG-20240724-WA0134.jpg)
اتصور مع أشهر الفنانين في هولييوود.. وكمان مع أشهر فنانين مصر ومنهم الزعيم وشويكار ومحمد رشدي ومنى زكي.. كيم كارداشيان بتحبه وسلفستر ستالوني بيهزر معاه بالضرب.. ومحمد صلاح طلب منه طلب غريب.. ومثل مع منى زكي..
فيديوهات وصور كتير يشاركها “عم يايا” مع المتابعين على انستجرام.. واللي بيظهر فيها دايمًا مع أشهر الفنانين والفنانات في العالم.. سواء في هوليوود أو مصر.. مش بس كدا .. دا كمان اتصور مع فنانين قدام جدًا.. وكأنه شخص عابر للقارات واكب القديم والحديث.. وقابل كل الفنانين والفنانات من مختلف أنحاء العالم.. فيا ترى ايه حكاية “عم يا يا” .. وازاي قدر يوصل للعدد دا من المشاهير ؟ ..
اسكندراني وهاجر لـ أمريكا
“عم يايا” اسمه الحقيقي “يحيى” ومعروف بـ “يايا”.. مذيع مشهور جدًا خاصة في أمريكا.. وعلى علاقة بعدد كبير من الفنانين.. وبدأ حياته من الصفر.. فكان شغال على مركب في اسكندرية .. وبعد ظروف صعبة مر بيها.. قرر يسافر على أمريكا ويشوف رزقه هناك.. فاشتغل في البداية “سباك”.. واشتغل كمان كعامل في مهن كتير.. لكن “يايا” كان عنده شغف التصوير مع المشاهير.. وبعد اجتهاد كبير منه.. قدر يكون مذيع مشهور هناك.. فاشتغل فترة في البرنامج الكوميدي المعروف “Jimmy kimmel”.
فظهر مع الإعلامي الأمريكي “جيمي” أكتر من مرة.. لحد ما اتشهر واتعرف في أمريكا كلها سواء بين الفنانين أو الجمهور الأمريكي.. بسبب خفة دمه وطريقته في التقديم وكمان نطقه للغة الإنجليزية.. فبقي “مذيع معروف” هناك.. ويقدم فقرة ثابتة عن الأفلام اللي بتتعرض في الصالات الأمريكية..
التصوير مع النجوم
وبعد ما بدأ “يايا” يقدم فقرة ثابتة بقا أشهر مصري في أمريكا بعد عمر الشريف.. وبقي يتصور مع أشهر الفنانين هناك.. وبيتصور مع نجوم كبار ومعروفين سواء في مصر أو حتى في أمريكا.. واتصور أكتر من 11 ألف صورة مع مشاهير الفن والسياسة والرياضة في أمريكا.. زي مايكل جاكسون ومحمد علي كلاي وبراد بيت وجوني ديب.. وفنانين كتير سواء قدام أو حتى لسة شباب.
وكمان اتصور مع فنانين مصريين قدام.. زي الفنان الراحل محمد رشدي.. والزعيم عادل إمام.. وكمان الفنانة شويكار.. وغيرهم من الفنانين.. دا غير إن عدد المتابعين ليه على انستجرام أكتر من 66 ألف متابع.. وليه “فانز” كتير بيحب يتفرج عليه…
علاقته بـ مو صلاح
كمان “عم يا يا” على معرفة بعدد كبير من النجوم والمشاهير المصريين والأجانب.. ومنهم الفنانة منى زكي.. واللي ظهر معها في الحلقة الأولى من مسلسل “لعبة نيوتن”.. وظهر بدور المسؤول عن رحلة الوفد اللي سافر لأمريكا عشان يحضروا المؤتمر الزراعي.. ولما بيحضر المهرجانات بتحب منى زكي تعمل معاه اللقاءات وكمان بتهزر معاه.. مش بس كدا.. كمان النجم المصري محمد صلاح سبق وطلب من “يايا” إنه يتصور معاه وبعتله الصورة وشكره وقاله: “شكرًا يا عم يحيي”.. خاصة إنه معروف جدًا بينهم بخفة دم.. ويقول عم يحيى عن شهرته وحب المتابعين ليه:
“أنا خدت بعضي ورحت أمريكا وتعبت جامد لغاية ما وقفت على رجلي،، الموضوع مجاش بالساهل،، الأمريكان نفسهم نايمين في الشارع،، وأنا ليا علاقات كويسة بفنانين كتير،، مثلا سيلفستر ستالوني ماكنش طايقاني وبعدها بقى يحبني ويقف يهزر معايا بالأيد،، ونفسه يعمل فيلم في مصر ما بين الأهرامات والصحراء،، وأرنولد بيسلم عليا واداني جاكيت،، كيم كارداشيان بتحبي واتصورت معاه قبل ما تتشهر،، وجوني ديب وبراد بيد عارفني وبيسلموا عليا،، وكتير من الفنانين بيحبوني وبيحبوا يجوا يتصوروا معايا،، وليا متابعين من كل حتة،، وده نعمة من عند ربنا،، لأني بعمل شو بيضحك الناس وكوميدي “,,
قولنا بتحب تتابع “عم يايا” ولا لا.. وشايف ممكن يقدم برنامج فن معروف في مصر .. ولا هيكون حابب الاستمرار في أمريكا ؟