![](https://onetakeeg.com/wp-content/uploads/2024/07/IMG-20240724-WA01351.jpg)
اللي مش قادرة تتخطى الإكس.. واللي قابلت رجالة منفصمة.. عقدتها.. واللي اتقالها ريحتك بصل.. فنانات متجوزوش رغم جمالهم ونجاحهم.. أبرزهم مي عز الدين وإليسا..
فنانات كتير اختاروا انهم يعيشوا حياتهم احرار من غير أي مسؤوليات، وفي منهم اللي كان الفن وكارير هم أهم من إنهم يشاركوا حد حياتهم.. ممكن يعطلهم عن اللي هما عايزين يوصلو له في طريقهم.. ولو بصيت هتلاقي إن كتير من جميلات الفن متجوزوش وعايشين حياتهم سناجل..
مي عز الدين
مي عز الدين كسرت سن الأربعين ولسه متجوزتش لحد دلوقتى.. رغم انها طول الوقت تصرح بأنها نفسها تتجوز وتكون أسرة.. بس مي بتحاول تتجوز بقلبها مش بعلقها.. وانها مستحيل تتجوز من غير حب.. ويقال ان مي مش قادرة لحد دلوقتي تتخطى علاقتها بالنجم محمد زيدان نجم منتخب مصر وبروسيا دورتموند الألماني.. اللى اتخطبت له في 2006 بس علاقتهم مكملتش وانفصلوا بسرعة..
منة شلبي
أما الفنانة منة شلبي فمن مواليد 1982.. متجوزتش لحد دلوقتى رغم نجاحها الفني الكبير.. وارتبطت منه مرة واحدة بس بالمخرج خالد يوسف.. ومعروف ان منة كانت تحب خالد يوسف جدا.. وقالت ان عندها احلام انها تحب وتتجوز بس مش هتجوز ابدا لمجرد الجواز.. غير لما تلاقي الراجل المناسب..
إليسا
من وقت للتاني بيظهر كلام عن جواز النجمة اللبنانية إليسا في السر.. الكلام اللي عمره ما اتأكد ولا مره.. وعلى الرغم من أنها وصلت سن 52 سنة.. إلا أنها متجوزتش.. وأكدت إن قرار عدم الزواج هو القرار الصح اللي اخدته في حياتها.. لان مش لازم كل انسان يكون اتخلق علشان يتجوز ويخلف..
حورية فرغلي
والفنانة حورية فرغلي بكل اللى مرت بيه في حياتها بسبب المرض.. كمان على الجانب العاطفي بتعاني حورية فرغلي.. خاصة وأنها لحد دلوقتى ملقتش الشخص المناسب اللي تتجوز.. وكان ليها تجارب عاطفية صعبة.. فـ حورية اتخطبت مرتين.. مرة كان من شخص سابها بعد مشهد لها في فيلم كلمني شكرا.. من غير ما يديها فرصة تتناقش معاه.. والثاني توفي ليلة فرحهم.. وبقى بالنسبالها الجواز خطوة مؤجلة.. قبل ما تدخل في رحلة مرضها الشاقة جدا..
نيرمين الفقي
وبالرغم من جمال نرمين الفقي الساحر.. اللي مبيتغيرش ابدا مع تقدمها في العمر.. إلا انها لسه متجوزتش لحد دلوقتى.. ووصلت لسن 52 سنة.. واتكلمت نيرمين كتير قبل كده.. عن رغبتها في الجواز.. واتقدملها ناس كتير.. وشافت رجاله كتير مختلفه وملقتش فيهم الشخص المناسب.. لحد دلوقتي.. ومن المواقف اللي اتعرضت لها ان عريس كان يجي يتقدم لها وكان عاجبها وهي عجباه و مامته جات وهي في المطبخ وقالتلها انتي ريحتك بصل.. من هنا قررت انها ترفض العريس.. وواحد تاني اتقدملها على اساس انه مهندس معماري واكتشفت بعد كده انه مقاول ومزور شهاداته..
ميس حمدان
وصلت الفنانة ميس حمدان لسن الـ 42 سنة وقالت انها بتدور عن الحب الحقيقي وعن الراجل المناسب اللي يحسسها بالامان والحب.. ويكون مستواه الاجتماعي كويس..
ميسرة
وتعتبر الفنانة ميسرة هي أكبر فنانة في الوسط متجوزتش.. فهي من مواليد 1967.. وقالت انها متجوزتش في سن صغير لأنها قابلت رجاله كتير مصابين بانفصام الشخصية بيقولوا حاجات مبيعملهاش.. ولما وصلت الـ 42 كان عندها قناعة ان قطار الجواز فاتها.. وان فرصتها في الانجاب ضعفت فقررت انها مش هتتجوز..