امتى هتعرف امتى اني بحبك انت 80 سنة على رحيل صاحبة الصوت الساحر من القمر المطربة أسمهان
هي ايه حكاية العداوة بينها وبين كوكب الشرق ام كلثوم
تعالوا نعرف ايه القصة
اسمهان مش مجرد مطربة موهوبة وبس لا دي كانت صاحبة الصوت الساحر من القمر عملت ثورة في عالم الغناء العربي من كتر تميزها كانت توصف بأنها من معجزات الغناء بالعالم العربي
اسمهان اتولدت يوم 25 نوفمبر عام 1912 م هي سورية الاصل اسمها الحقيقي أمال فهد فرحان إسماعيل الأطرش
عاشت وسط أسرة فنية اخوها المطرب والموسيقار المعروف فريد الأطرش اللي ليه بصمات واضحة جدا في الموسيقى والغناء العربي
أما عن بداياتها الفنية الأولى كان بيزور بيت فريد الأطرش في يوم من الايام للملحن المصري داود حسني هو واحد من كبار الموسيقيين في مصر وأثناء زيارته سمعها تغني في اوضتها فطلب انها تطلع له ولما طلعت طلب منها تغنى قصاده فغنت وأعجب جدا بصوتها، ولما خلصت غنا أطلق عليها اسم أسمهان اللي هو الاسم اللي اشتهرت به طوال حياتها
اسمهان اميرة من الشام ظهرت الموهبة الفنية عندها من صغرها بدأت تغني في البيت والمدرسة أغاني أم كلثوم وعبد الوهاب وطبعا اغاني أخيها فريد الاطرش وفي عام 1931 شاركت فريد الغناء في صالة ماري منصور في شارع عماد الدين بعد تجربتها مع والدتها في حفلات الأفراح والإذاعة المحلية، وفي عام 1941 مثلت أول أفلامها “انتصار الشباب” بمشاركة شقيقها فريد الأطرش، وفي عام 1944 شاركت في فيلم “غرام وانتقام” وسجلت فيه مجموعة من أحلى أغانيها-
أما عن العداوة بين أسمهان وأم كلثوم السبب فيها بيرجع للصحافة اللي فضلت تعمل مقارنات كتير بينهم سواء في الشكل أو الصوت
وكمان كانوا بيشتغلوا مع نفس الشعراء والملحنين
اسمهان عملت اغاني صعبة جدا ان حد يغنيها بكمية الاتقان اللي قدمته اسمهان والاغاني حققت نجاح كبير جدا لدرجة ان الموسيقار رياض السنباطي الذي هو من أهم الموسيقيين العرب ولحن الحان قوية جدا لام كلثوم قال ان مفيش حد يقدر ينافس ام كلثوم غير اسمهان
والد أسمهان هو أحد زعماء جبل الدروز في سوريا، ووالدتها هي الأميرة والمطربة “علياء حسين المنذر”، وبعد وفاة والدها عام 1925 اضطرت أسمهان للسفر هي ووالدتها وشقيقيها فؤاد وفريد الأطرش من سوريا إلى القاهرة هربانيين من الفرنسيين اللي كانوا عايزين يعتقلوها هي وعائلتها لنضال والدها ضدهم.
تزوجت أسمهان عام 1934 من الأمير حسن الأطرش (ابن عمها) وعاشت معاه في سوريا كأميرة للجبل مدة ست سنوات وخلفت ابنتها الوحيدة كاميليا، لكن حياتها في الجبل انتهت على خلاف مع زوجها، وعادت إلى الفن في مصر، بعدها تزوجت من المخرج أحمد بدرخان لكن زواجهم انتهي بسرعة بعدها تزوجت أحمد سالم اللي كانوا دايما في مشاكل مع بعض حتى يوم وفاتها كانت متخانقة معاه قبلها
وفاة أسمهان كانت قصة كبيرة وأثارت جدل واسع جدا اتوفت غرقانة في ترعة الساحل الموجودة حاليا في مدينة طلخا، كانت في طريقها إلى رأس البر في يوم 14 يوليو عام 1944 عشان تقضي اجازة الصيف مع صديقتها ومديرة أعمالها ماري قلادة، وفي الطريق السواق مقدرش يسيطر على الفرامل ووقعت العربية في الترعة وماتت اسمهان هي وصحبتها وكان عمر اسمهان 32 سنة، أما السواق محصلوش حاجة هرب لما لقي العربية بتقع في الترعة ومن يومها اختفى خالص محدش يعرف عنه حاجة
وده اللي زود الشكوك ان الحادثة مدبرة وتم اتهام كذا اسم وكل اسم لسبب معين
أول اسم ام كلثوم واتهموها انها قتلتها بسبب غيرتها الفنية منها
اسم الملكة نازلي والدة الملك فاروق لانها كانت بتغير من اسمهان لانها كان في اعجاب بين اسمهان وبين احمد حسين باشا رئيس الديوان الملكي
واتهموا المخابرات البريطانية لانهم فعلا حاولوا يقتلوه اكتر من مرة
واتهموا كمان زوجها احمد سالم لانهم متخانقين قبل وفاتها على طول
واتهموا اخوها فؤاد هو كمان لانه كان دايما مش مقتنع ان اميرة زيها تكون فنانة وكان بيكره جدا شغلها في الفن
وفجاة فريد الاطرش اخوها اللي معروف انه قريب لاسمهان جدا فجأة طلب من النيابة إن كل التحقيقات تتوقف ووافق علي قفل الملف في المحكمة واتقفلت التحقيقات بأن سبب وفاة أسمهان اهمال السائق —
ولحد لحظتنا دي مفيش دليل يؤكد أن الحادثة مدبرة
وفاة أسمهان كانت قصة كبيرة وأثارت جدلاً واسعاً، إذ توفت غرقاً في ترعة الساحل الموجودة حاليا في مدينة طلخا، حيث كانت في طريقها إلى رأس البر في 14 يوليو عام 1944 لقضاء إجازة الصيف برفقة صديقتها ومديرة أعمالها ماري قلادة، وفي الطريق فقد السائق السيطرة على السيارة فانحرفت وسقطت في الترعة ولقت مع صديقتها حتفهما عن عمر ناهز 32 سنة، أما السائق فلم يصب بأذى واختفى بعد الحادثة.
عاشت «أسمهان» حياة الأميرات، وعرفت طعم الفقر، كانت صاحبة أجمل ضحكة.. لكن عينيها كانت مليانة دموع وأحزان، كانت حياتها قصيرة ولكن كلها قصص ومغامرات، مليانة بالمآسي والغرائب والغموض اميرة الغناء ربنا يرحمها
