![](https://onetakeeg.com/wp-content/uploads/2024/07/IMG-20240718-WA0150.jpg)
زارها في بيتها وأهداها مصحف.. ظهور مميز بعد فترة غياب.. تفاصيل زيارة الأب بطرس دانيال رئيس المركز الكاثوليكي للسينما للنجمة شريهان في بيتها..
مصحف هدية
كعادة المعهد الكاثوليكي للسينما دايما مهتم بالفن والفنانين.. ويتابع أخبارهم ويداوم على التواصل معهم على كل الأصعدة.. كان حريص الأب بطرس دانيال رئيس المركز الكاثوليكي للسينما.. على زيارة الفنانة الكبيرة شريهان في بيتها.. وكان واخد معاه مصحف هدية ليها..
ونشر دانيال مجموعة من الصور على حسابه بموقع فيسبوك.. وعلق عليها.. زيارة خاصة للفنانة الأسطورة والرائعة شريهان.. متواضعة وبسيطة وعارفه كويس أصول الفن واحترام جمهورها..
مش مجرد فوازير
وخلال الجلسة دي اتكلمت شريهان عن الجايزة اللي اخدتها من المركز.. وقد ايه هي بتحترم وبتعشق المركز الكاثوليكي للسينما.. وأكدت شريهان أن فنها كان له هدف ورسالة وتعليم.. ومكانش بس مجرد فوازير ترفيهية.. يالعكس كان ليها مضمون ومغزى للاستفادة منها..
وكان الهدف الأساسي من الزيارة.. تسليم شريهان رواية لكاتبة شابة.. اسمها دينا مصطفى.. كان نفسها تبعت نسخه للفنانة شريهان وتواصلت مع الأب بطرس دانيال علشان يساعدها.. وفعلا كلم شريهان واستقبلت طلبه ده بكل ترحاب واحتفظت بنسخة من الرواية..
الراقي النبيل
اللى كتبت للمركز على نسخة منها رسالة خاصة.. قالت فيها.. المركز الكاثوليكى فى نفسى وقلبى تاريخى الفنى.. مكانة عظيمة ومكان أشرف بهما فى وطنى وبلادى العظيمة مصر وشعبه الكريم.. تشرفت وأنا صغيرة بتكريمه لى.. واليوم تشرفت أكثر من جدا بتشريفى بزيارة الإنسان الراقى الرائع النبيل والعزيز الأب بطرس دانيال المحترم.. كل الاحترام والتقدير منى..
اخر ظهور
ويعتبر ظهور شريهان ده الاول بعد فترة غياب طويل وصلت لـ 3 شهور… وكانت في آخر تدويناته هنت الفنانة جميلة عوض على زفافها من المونتير أحمد حافظ.. ونشرت وقتها صورة لجميلة في طفولتها وهي معاها.. وكتبت عليها..
في قلبي أنتي يا جميلة أكثر من كونك جميلة.. كيف أعبر عن فرحتي في ليلة زفاف جميلة عادل محمد عوض.. حَبيبَتي والتي ولدت في أجمل أيام عمري وأصبحت أجمل عروس جميلة عوض.. واليوم ستتزوج ابنة قلبي جميلة مِن مَن أحب واختار واطمأن له قلبها المحترم الجميل أحمد حافظ..
لا للاحتفال
وكانت شريهان من فترة وبالتزامن مع عيد ميلادها أعلنت رفضها الاحتفال بعيد ميلادها بأي شكل من مظاهر الاحتفال سواء مع اسرتها او جمهورها.. وده بسبب الأحداث المؤسفة في القطاع..
ونشرت شريهان ده في تدوينة على حسابها بموقع إكس.. قالت فيها.. مش عايزة اضايقكم وتحديدا في اليوم ده اللى بقي يومكم.. وحاسه جدا بالتقصير ناحيتكم كلكم في التواصل.. ولكن اعذروني وسامحوني.. أخجل من أي نوع من الاحتفال حاليا.. ولو حتى لمجرد ساعات محدودة في اليوم ده.. لأن التوقيت ده صعب جدا على نفسي..
وكملت شريهان وقالت.. رسائلكم جميعاً غالية.. ولكنها فى وقت صعب أعيش فيه أصعب وأقسى أيام وساعات ولحظات عُمرى التى عشتها.. ولن أكون سعيدة إن احتفلت.. سواء مع أسرتي وعائلتي الكبيرة.. أو أسرتي وعائلتي الصغيرة.. وهى أنتم.. محبو شريهان.. (الشريهانيون) كما تحبوا أن أقول لكم أو أتكلم معكم وأناديكم.. وأنا سأظل أكثر من متشرفة..
واوضحت ان اللي باقي لها هو عدم التناقض.. وقلبها وعقلها مش مستوعبين اللي بيحصل في العالم.. وأعلنت رفضها للابادة واللي بيحصل للشعب الغلبان ده على مدار حوالي سنة مع الصمت الدولي المخزي..
واكدت ان مبقاش عندها امل غير في أن معجزة تحصل من معجزات ربنا.. علشان تنصر الحق والانسانية..