من طرف واحد.. اسماء جلال تحكي قصة حبها لوائل جسار: طلبته للجواز

 

 

 

كانت بتروحلوا كل الحفلات.. معلقة صورته في كل حته في اوضتها.. قالتله انا هتجوزك ورد فعله احرجها.. قصة حب اسماء جلال لوائل جسار من طرف واحد..

 

 

 

اسماء جلال ووائل جسار

 

 

اتصدر اسم الفنان وائل جسار التريند على مواقع التواصل الاجتماعي.. بعد تصريحات النجمة اسماء جلال عنه.. والل اتكلمت عن قصة حبها الكبيرة للمطرب اللبناني من وهي صغيرة..

 

 

 

وحكت اسماء جلال عن اعجابها الشديدة بيه.. وانها كانت دايما بتحتفظ بكل اغانية وفي فترة من الفترات كانت معلقة كل صوره في كل مكان في اوضتها وكانت حريصه على حضور كل حفلاته..

 

 

 

صورته في اوضتها

 

 

 

وبتقول اسماء.. كنت الشخصية الملزقة اللي بحط صوره في الدولاب وفوق السرير والموضوع تطور.. وبقيت بحضر كل حفلاته.. وأكون أول واحدة أعرف هي فين واحجز ترابيزة وأنا بس واقعد أبص له.. وابقى لابسة فستان وعايزاه يشوفني مع إنه متجوز.. مش عارفة كنت بعمل إيه..

 

 

 

وعن اول موقف بينها وبينه.. والل كان محرج جدا بالنسبالها.. قالت.. في مرة وأعتقد هو خاف مني بعدها.. رحت كنت عايزة أتصور معاه واتصورت ولفيت له وقلتله انت عارف إننا هنتجوز قالي لا والله.. ومبقتش بحضر حفلاته تاني عشان محرجش نفسي بحبه بس مش زي زمان وربنا يباركله في مراته..

 

 

 

رد وائل جسار

 

 

ورد وائل جسار على تصريحات اسماء جلال.. وقال.. أسماء جلال ممثلة موهوبة.. وأنا فوجئت بحديثها وأشكرها من كل قلبي على محبتها.. ولكني مش فاكر الموقف الل جمعنا اتكلمت هي عنه في الإعلام..

 

 

وكمل وقال.. هي أكيد هتكون بتهزر في الكلام.. لأنها تعرف أني رجل متزوج.. وربنا يوفقها في حياتها ويرزقها بالإنسان اللي يستحقها..

 

 

وقال ان عمرهم ما اتقابلوا بعد المرة دي.. ووقتها اصلا كان في ناس كتير عاوزين يتصوروا معاه.. ومش فاكرها للاسف..

 

 

 

مايكل چاكسون

 

 

اسماء كمان نفت خضوعها لأي عمليات تجميل.. واتكلمت عن تشبيهها بمايكل چاكسون.. قالت ان الصورة مضايقتهاش.. وعندها مبدأ اللعبة الحلوة نصقفلها..

 

 

 

وكملت وقالت.. مش عارفة إيه بداية الموضوع بس لقيت الدنيا كلها بتقول أسماء جاكسون أو مايكل جاكسون الغلابة وافتكرت ان عشان بحبه.. وبعدين لقيت صورة بالذكاء الاصطناعي دمج صورتي في صورت.. الصورة لذيذة بتضحك..

 

 

 

وقالت انها كانت حساسه جدا وكل موقف بتتعرضله بيأثر فيها.. بس بهد شويه اكتشفت انها مش بتأكل عيش.. ف قررت انها تستقبل الامور دي عادي.. لدرجة انها دلوقتي بقت بتتشتم وعادي بتضحك وتقول للناس عندكم حق الل انتو شايفينه.

 

احمد ابو هشيمة

 

 

وعن الاشاعات الل انتشرت الفترة الل فاتت وربطتها بعلاقة مع رجل اعمال مصري شهير.. قالت اسماء انها دلوقتي مش مرتبطة بحد خالص ولا بتعيش اي قصص حب لا مع رجل اعمال ولا مع غيره..

 

 

 

وكانت في اشاعات كتير ربطت بين اسماء جلال ورجل الاعمال المصري احمد ابو هشيمة.. والل زاد من النكهنات سكوت الاتنين مع كل التأكيدات الل كانت منتشرة عن الموضوع ده..

 

 

وبتعيش اسماء الفترة دي مرحلة توهج فني بعد نجاح دورها في فيلم اولاد رزق 3 بشكل كبير.. وكل الجمهور خارج من السينمات متأثر بالشخصية الل قدمتها.. غير انها بتواصل تصوير فيلمين جداد حاليا.. الاول هو شمس الزناتي مع الفنان محمد امام.. والتاني فيلم بطولة غادة عادل وماجد الكدواني اسمه وفيها ايه يعني..

 

 

 

غير انها في انتظار طرح 3 افلام ليها.. آل شنب والفستان الابيض وبضع ساعات.. الل انتهت من تصويره السنة الل فاتت بس تم تأجيله من العرض..
غير ان فريق عمل مسرحية ميمو اعلن انضمام اسماء جلال ليهم خلال الفترة الجاية.. والمسرحية هتتعرض لاول مرة في القاهرة بعد نجاحها الكبير في موسم الرياض.. وتحقيقها إيرادات عالية..