قلدته في فيديو على التيك توك.. وقالت إنها نفسها تمثل معاه.. ووافق على طلبها.. ووعدها تكون معاه في رمضان 2025.. و “أم جاسر” طلبت منه تعمل دور إغراء زي هند رستم ..
فاجئ الفنان أحمد العوضي الجمهور والمتابعين.. بإعلانه مشاركة التيك توكر “أم جاسر” معاه في مسلسل جديد ليه.. خاصة بعد ما أظهرت موهبتها في فيديو جديد عملته ليه وهى بتقلده على “التيك توك”.. فيا ترى ايه الحكاية.. وازاي “العوضي” و”أم جاسر” هيمثلوا مع بعض ؟ ..
أم جاسر قلدت “العوضي”
“أم جاسر” تيك توكر بتقدم فيديوهات ليها على التيك توك بتقلد فيها النجوم والفنانين بطريقة كوميدية.. وبسبب أسلوبها العفوي والظريف.. بقا ليها متابعين كتير جدًا على “التيك توك” بيستنوا فيديوهاتها وبيتابعوها.. فشايفين إن عندها موهبة كوميدية في تقليد الفنانين.. منهم الفنان حمادة هلال ومحمد رمضان.. وكمان الفنان أحمد العوضي.. واللي قلدته بشكل كوميدي على التيك توك بتاعها.. والمفاجأة إن “العوضي” شاف الفيديو وعجبه تمثل “أم جاسر” تقليدها.. خاصة بعد ما قالت في الفيديو: “هو أنا هقدر أمثل امتي”.. وتتفاجئ برد “العوضي” عليها وبيقولها: “هتمثلي معايا المسلسل اللي جاي يا أم جاسر يا عسل”..
شروط “أم جاسر” عشان تمثل
واتوقع المتابعين والجمهور إن موافقة “العوضي” إن “أم جاسر” تمثل هيكون خبر حلو ليها جدًا.. خاصة إنها بتعمل الفيديوهات اللي على التيك توك لأنها بتحلم بالتمثيل.. لكن “أم جاسر” فاجأت المتابعين و”العوضي” بإنها حطت شروط عشان توافق تمثل وردت عليه وقالتله: “أنا بحبك أوي يا أحمد يا عوضي، بس مش بقبل بأقل من أدوار الإغراء زي هند رستم وماري منيب، وهاخد 3 ملايين جنيه، وعايزة ريجيسير وباديكير ومانيكير، انت وعدت ولازم توفي”..
هجوم وانتقاد من المتابعين
ورغم إن “أم جاسر” ليها شعبية كبيرة على “تيك توك”.. وعندها متابعين كتير بيحبوا فيديوهاتها.. لكن مش كل المتابعين شافوا إن تصرف “العوضي” صح.. وشافوا إن ظهور التيك توكرز في الأعمال الفنية مش مناسب.. خاصة إن مش كلهم عندهم الموهبة.. وقالوا في تعليقاتهم: “ليه هتخليها تمثل معاك،، مش كل اللي يعملك فيديو تخليه يظهر معاك”.. “أنت عايز تفرح جمهورك،، بس مش بالطريقة ليه أم جاسر تطلع في عمل درامي،، وفيه ممثلين تعبوا عشان يوصلوا لـ دور ولو بسيط”..
تعامل العوضي مع جمهوره
أما “العوضي” فتجاهل التعليقات السلبية.. خاصة إنه بيتعامل مع جمهور بطريقة خاصة جدًا.. ومش بيعتبرهم جمهور بس لا بيعتبرهم أهله وأسرته.. ودايمًا بيقول عليهم “اخواتي”.. دا غير المسابقات اللي دايمًا بيعملها ليهم.. عشان هما كمان يشاركوه نجاحه ويسعدهم زي ما هما كمان اسعدوه.. فسبق وقال “العوضي ” في تصريحات ليه:
“اتعلمت من أبويا الشهامة والجدعنة وإنه عمره ما ينسى أصله مهما حصل.. فسبق وقال “العوضي” في تصريحاته عن أصوله الشعبية: “أنا معتز جدًا بنشأتي،، وطالع بأصول وأخلاق عين شمس،، وبحس إني سفير للطبقة الشعبية،، وفخور إني من عين شمس،، وشخصيًا أنا منتمي ليهم جدًا،، وبنزل عالطول عين شمس أشوف ردود أفعالهم على أدواري،، وعمري ماقولت كلمة جمهوري أقول إخواتي” ,,
وفعلاً “العوضي” أثبت دا أكتر من مرة.. وآخرهم موقفه مع التيك توكر “أم جاسر” وتفاعله معاها.. وجبر بخاطرها ووعدها تمثل معاه في مسلسله الجديد.. فيا ترى الجمهور هيقبل دا ولا هيرفضه ؟
