اعتزل الفن وتبرأ من أغانيه.. من هو علي قدورة مغني المهرجانات المعتزل

اعتزل الفن بسبب موت صاحبه.. وقرر يبعد عن الوسط ويشتغل حاجه حلال.. حاول يمسح كل أغانية من اليوتيوب ومش عارف.. سر اعتزال علي قدورة للمهرجانات.. 

تصدر اسم مغني المهرجانات على قدورة خلال الساعات اللى فاتت التريند.. بعد اعلانه اعتزال الفن.. وقرر انه يحذف كل اغانيه من كل حته.. علشان ميشيلش ذنب اللى يسمعوا الأغاني.. ومع كل محاولاته معرفش يمسحها.. 

ونشر قدوره فيديو ليه على تيك توك.. قال فيه.. أنا اعتزلت الغنا.. علشان مش حمل أشيل ذنب الناس اللي بتسمع الأغاني بتاعتي.. وبحاول أحذفها من على يوتيوب ومش عارف.. 

وكمل وقال.. كلوشة مات ومعرفش مصيره.. وكان قدورة وكلوشه قدموا مع بعض اغاني.. وبيتمنى ان ربنا يغفرله.. وهو متأكد ان باب التوبة مفتوح.. ونصح الشباب وقال.. إعمل اللي انت عايزه وصلي.. صلاتك هتنهيك عن الغلط.. والحلال بين والحرام بين.. وأنا اكتفيت وشبعت الحمد لله.. 

وما اكتفاش باللي قاله فقرر يتكلم تاني في الموضوع.. واتكلم عن نفسه.. وقال أنا كنت مغني قبل النهارده.. فيه حاجة حصلتلي مش عارف إيه هي بس الحاجة دي هي اللي بتخليني اتكلم دلوقتي.. أنا بريء من كل عمل أو مزيكا عملتها في حياتي وبعلن اعتزالي مجال الأغاني لحد ما يفتكرني ربنا.. 

وكمل وقال.. ربنا يسامحني على أي حاجة أنا عملتها في حياتي.. أو أي حاجة صدرت مني دون قصد.. يا رب قربني ليك وافتحلي باب رزق يرضيك.. ومفيهاش حاجة لو بدأت من جديد في أي شغل بالحلال.. وأي فلوس معايا هسيبها لـ أهلي.. 

على قدورة مغني مهرجانات.. بدأ مشواره الفني مع حمو بيكا وفيجو الدخلاوي بتكوينهم فريق باسم “VIP”.. وحقق نجاح من مهرجان كان بعنوان “أنا حبيتك وجرحتيني”.. 

شارك  قدورة في أغنية “وداع يا دنيا وداع” مع حمو بيكا وحسن شاكوش.. والل حققت ملايين المشاهدات  على “يوتيوب”.. وبسبب نجاح المهرجان ده كانت حصلت بينه وبين حسن شاكوش مشكلة.. 

وكان حصل قدورة على عضوية نقابة المهن الموسيقية في 2021.. قبل ما يتفكك فريق VIP ويحصل خلاف بينه وبين حمو بيكا..قبل ما يرجع يغني معاه مرة ثانية.. وكانت آخر أغنية.. نفديك يا فلسطين.. 

وتعتبر أغنية رب الكون ميزنا بميزة هي الانطلاقة الحقيقة لـ علي قدورة.. وبعدها عمل اكتر من اغنيه.. أشهرها لو الخد كاستر وحرقك ياه وقمر التيك توكاية وهاتي فوتيكا وجيفار..

على قدورة مش اول واحد يسيب المهرجانات ويعتزل نهائيا ويبعد عن الوسط الفني ويتبرأ من أعماله الفنية تحت شعار الفن حرام.. ف من أشهر المطربين النجوم اللى سابوا الفن مؤخرا.. كان المطرب الاردني ادهم نابلسي.. اللى فاجأ كل جمهوره بالاعتزال وقال ان هدفه إرضاء الخالق وليس الخلق.. وحبه لربنا يتعارض مع وجوده في مجال الغناء..

 وكمان مؤدي المهرجانات فارس حميدة.. اللي اتحول الابتهالات والتواشيح.. وقال بالتزامن مع العام الهجري الجديد..  بداية جديدة في عالم مليء بالخير والصالحين وهو عالم الدعوة إلى الله.. ونسأل الله الإخلاص في العمل..