حب من أول نظرة بدأ بـ مسلسل.. واتحولت العلاقة بينهم لـ صداقة واعجاب وحب أسطوري.. صمم يتجوزها واتحدى المجتمع عشانها.. ودافع عنها لما الجمهور انتقدها.. وقالها: “انتي كتير عليا وأنا بصغر معاكي”..
عمرو يوسف وكندة علوش من أشهر الكابلز في الوسط الفني.. اللي بيحبهم الجمهور وبيحترموا علاقتهم العاطفية والزوجية جدًا.. وبيشوفوهم مثال لـ الأزواج الدعم والسند لبعض.. واللي دايمًا واقفين مع بعض على الحلوة والمرة.. لكن اللي ميعرفوش كتير من الجمهور إن رغم إعجاب الجمهور بعلاقة عمرو يوسف وكندة علوش حاليًا.. لكن في بداية جوازهم كانوا بيتعرضوا لانتقادات عنيفة جدًا من الجمهور.. خاصة “كندة” لأنه سبق ليها الجواز قبل عمرو.. فيا ترى ايه حكاية قصة حبهم.. وكان ايه رد فعل عمرو يوسف بعد الانتقادات والهجوم اللي اتعرضت ليه “كندة” في بداية جوازهم
قصة حب بدأت بـ مسلسل
قصة حب عمرو يوسف وكندة علوش بدأت بتعاون فني ليهم.. وقتها “كندة” جت على مصر وبدأت تشارك في مسلسلات وأفلام مصرية.. وكان أول عمل يجمع بينهم في 2011.. وقت مشاركتهم في بطولة فيلم “برتيتا”.. أما تاني فيلم شاركوا فيه مع بعض فكان فيلم “واحد صحيح”.. وفي 2013 كان التعاون الثالث بينهم في مسلسل “نيران صديقة”.. فبدأت علاقة الصداقة بينهم تبقا أقوى.. لحد ما شرارة الحب بدأت بينهم في مسلسل “عد تنازلي”.. واللي كانوا بيلعبوا فيه دور زوجة وزوجه بيحبوا بعض جدًا.. واتحولت قصة الحب من شاشة التلفزيون للحقيقة.. وقرر عمرو يوسف يتجوز كندة.. واتجوزوا فعلا في فرح كبير عمله ليها في 2017..
ليه اتجوز واحدة مطلقة
وقتها قابل عمرو يوسف وكندة علوش هجوم من المتابعين والجمهور.. اللي شافوا إن “كندة” مش مناسبة لـ “عمرو”.. لأنه سبق ليها الجواز من فنان سوري ومٌطلقة.. على عكس عمرو يوسف اللي مسبقلوش الجواز ولا مرة.. ووقتها اتعرضت “كندة” لـ حملة انتقادات وهجوم كبيرة جدًا.. لكن “عمرو” كان بيدافع عنها.. وكان شايف نفسه هو اللي كتير عليها مش العكس.. وقال في تصريحاته عن الفترة ده:
“كندة مش ناقصها أي حاجة،، بالعكس ولله العظيم ده هي إلي كثيره عليا لدرجه انها ساعات تقولي انت ع طول محسسني اني لسه بنت في العشرينات،، قولتلها دي حقيقه،، أنا معاكي أنا اللي بصغر،، وبعدين انا عايز اقول حاجه هو الراجل محتاج ايه من الست غير الاهتمام والاخلاص والحب،، هو احنا ليه دايمآ مستكترين ع الست اننا نقدرها ونشلها ع راسنا وده اقل ماتستحقه بجد”..
أكتر تعليق ضايقني عن كندة
كمان عمرو يوسف في بداية جوازه من “كندة”.. كان بيجيله تعليقات كتير بتضايقه على “كندة”: “اكتر حاجه نرفزتني بجد كتبت جريدة شهيرة كلام مش صحيح عننا،، والناس استكتروا ان مهمنيش نفسي ودافعت عن كندا،، طيب ماده الطبيعي ان ربنا أمرني بكذا،، ورجولتي امرتني بكدا اني اعيش عشان احميها بعد ربنا،، هو الحب ليه بنسبالنا ماشي ف حاجات وحاجات لا” ..
“وفي مرة انا كنت ف مطعم شهير مره انا وكندا ف برجعلها الكرسي عشان تقعد ويبوس راسها،، فجأه شوفت نظرات من الناس وكأن إلي بعمله ده شئ مش طبيعي ومستكترينه عليها،، والاغرب ان الرجاله مستغربه اكتر من البنات ،، علي فكره انا بحبها واي حاجه بعملها معاها ده تلقائي من نابع حبي ليها”..
ورغم إن الجمهور والمتابعين وقتها قالوا إن عمرو يوسف بيقول مجرد كلام .. وإن لما يعدي الوقت هيحصل بينهم خلافات.. لكن حصل العكس وحبهم بدأ يزيد ويقوى مع مرور الوقت.. مش بس كدا.. دا كمان عمرو يوسف وأهله كلهم.. بقوا أكبر دعم وسند لـ “كندة” في محنة مرضها وصراعها مع سرطان الثدي.. وحاليًا بيدعمها وواقف جمبها لحد ما تتعافى .. ربنا يشفى الفنانة الجميلة كندة علوش وترجع لـ أسرتها ولـ جمهورها بصحة وعافية ..
