![](https://onetakeeg.com/wp-content/uploads/2024/06/IMG-20240625-WA0005.jpg)
حبس نفسه في شخصية اللمبي سنين طويلة.. ورغم موهبته الفنية الكبيرة اقتصر على الأدوار الكوميدية.. بيدخل في شغل المخرجين.. وبقوا ينسحبوا من المسلسلات اللي بيعملها.. واتخانق مع فريق العمل في الحرفيين.. وقالهم ألفاظ خارجة.. وقرر يرجع للسينما بعد ما غاب عنها 5 سنين..
مفيش شك إن اسم الفنان محمد سعد.. من أكثر الأسماء المثيرة للجدل على الساحة الفنية.. فبالرغم من موهبته الكبيرة.. واللي كل المؤلفين والمنتجين بيشهدوا بيها.. لكنه دايمًا في مشاكل مع فريق العمل بتاعه.. ودا اللي بيخلي دايمًا فيه جدل كبير حواليه.. لكن اخيرا “محمد سعد” قرر يرجع للسينما بفيلم جديد.. فيا ترى هيكون زي أفلامه القديمة .. تعالوا نشوف .
إيرادات أفلامه تفوقت على الزعيم
محمد سعد بدأ الطريق من أوله خالص.. ماكنش لا عنده واسطة ولا محسوبية.. وبدأ بأدوار صغيرة في نهاية التسعينات.. لحد ما جاتله الفرصة الحقيقة في فيلم “الناظر صلاح الدين” سنة 2002.. واللي شارك فيه بشخصية “اللمبي” .. اللي اتحولت لشخصية كوميدية بعد كدا شارك بها في كل أفلامه.. بالمنتجين اتسابقوا عليه وعمل مع “السبكي” فيلم “اللمبي” وحقق نجاح كبير جدًا .. لدرجة إن إيرادات فيلمه كانت أعلى من إيرادات أفلام “الزعيم” وقتها.. مش بس كدا.. “الزعيم عادل إمام” نفسه قال إن أفلام “محمد سعد” بتضحكه جدًا.. وعمل بعدها “اللي بالي بالك” .. و “عوكل” و”بوحة” و”كركر” و”بوشكاش”.. وحققوا نجاحات كبيرة وإيرادات ضخمة..
حبس نفسه في شخصية “اللمبي”
ورغم موهبة “محمد سعد” الكوميدية.. لكنه بدأ في الانهيار بالتدريج.. ودا لأنه حبس نفسه في شخصية اللمبي وقت طويل جدًا لحد ما الجمهور زهق.. فلما كرر التجربة في فيلم “اللمبي 8 جيجا” فشل الفيلم ومتحققش إيرادات في السينما.. كمان عمل مسلسلات كوميدية كرر فيها نفس الشخصيات في محققتش نجاح مع الجمهور.. وشاف النقاد السبب في دا إن “محمد سعد” موهبته أكبر من شخصية اللمبي.. لكن المنتجين حصروه فيها.. وكمان هو استسهل النجاح من خلالها وعشان كدا مستمرش نجاحه.. فقالت المخرجة “كاملة أبوذكري” إنها تتمنى تشتغل مع محمد سعد لكن في أي شخصية غير اللمبي.. وقالت في تصريحاتها:
“أنا نفسي اشتغل مع محمد سعد؛ لكن هيقدم شخصية مختلفة كليا.. أما اللمبي لا،، لأن محمد سعد فنان عظيم وموهبة فنية مهمة،، وكنت هشتغل معاه في فيلم ملك وكتابة بس هو رفض،، لأنه كان عايز أفلام كوميدية،، هو أهم بكثير من اللمبي، أتمنى يخرج من دور اللمبي، فيلم الكنز كان دوره عظيم”..
يدخل في شغل المخرجين
وأزمة محمد سعد مكنتش بس في شخصية “اللمبي”.. لكن كمان مخرجين كتير كانوا بينسحبوا من الشغل معاه.. ودا بسبب إنه بيدخل في شغلهم.. كمان بيعمل مشاكل مع فريق العمل.. زي ما حصل مع فريق عمل مسلسل “الحج اكسلانس” في منطقة الحرفيين,, والتي تسببت ليه في انتقاد وهجوم من الجمهور..
التعاقد مع فيلم دكتور عدوه
والظاهر إن محمد سعد قرر يبعد عن الدراما فترة.. ويرجع للسينما مرة تانية واللي حقق فيها بدايات نجاحه.. اتعاقد على فيلم “دكتور عدوه” بعد غياب 5 سنين عن السينما.. ونشروا صورة له وهو يمضي العقد.. وكتب المنتج: “بسم الله توكلنا على الله، فيلم دكتور عدوه النجم محمد سعد إخراج وائل إحسان”.. وحاليًا يستعد محمد سعد لتصوير الفيلم.. فيا ترى هيقدر يكمل بيه سلسلة نجاحاته في السينما.. ولا الجمهور هيكون ليه رأي تاني ؟