![](https://onetakeeg.com/wp-content/uploads/2024/06/IMG-20240626-WA0040.jpg)
الجو حر اسقطوا.. الشهادات مالهاش لازمة.. الشاطر دلوقتي اللي بيجيب فلوس.. التعليم مش بيجدد ولا مصير ولا نيلة.. نصائح سمية الخشاب لطلاب ثانوية عامة..
اسقطوا
رجعت الفنانة سمية الخشاب لاثارة الجدل من جديد من خلال حسابها على موقع إكس.. الل اتعودت من الوقت للتاني تنشر عليه تغريدات مثيرة بتعلق عليها الأحداث الجارية..
استغلت الفنانة سمية الخشاب وجود امتحانات الثانوية العامة في مصر.. ونشرت مجموعة من التغريدات الغريبة بتنصح فيها الطلبة بأنهم مبيهتموش بامتحانات الثانوية العامة..
وبدأت سميه الخشاب تغريداتها الغريبة بواحده بتقول فيها.. يا حبايبي الجو حر.. ملخصات إيه؟!.. أسقطوا وخلاص.. وكتبت بعدها تغريدة قالت فيها.. اللي في الثانوية العامة اليومين دول. الشاطر اللي بيجيب فلوس..
الشهادة قرطاسها
ومكتفتش سميه الخشاب بكل اللي قالتله ونزلت تغريدات تانية بتكلم فيها طلاب الثانوية العامة.. وكتبت سمية فيها.. التعليم مش بيحدد لا مصير ولا نيلة.. بتعرف تجيب فلوس هتعرف تتجوز وتسافر متعرفش يبقى الشهادة قرطاسها وتحط فيها طعمية..
وتكون حريصة سمية الخشاب كل سنة قبل امتحانات الثانوية العامة من كل سنة.. انها تكتب عدد من التغريدات على حسابها تدي فيه جرعة من التفاؤل للطلاب قبل الامتحانات لكن المرادي كلامها اتغير شوية وقالت لهم ان الشهادة مالهاش لازمة..
ومن وجهة نظر سمية الخشاب.. التعليم مبيحددش لا مصير ولا نيله.. وان اللى بيعرف يجيب فلوس هيعرف يتجوز ويسافر مبيعرفش يبقي الشهاده هيقرطسها ويحط فيها طعمية..
طلاب حقوق وصيدلة
ودي مش المرة الاولى اللي بتنشر فيها سمية الخشاب تغريدات بتتكلم فيها عن امتحانات الثانوية العامة والجماعات.. ونشرت السنة اللي فاتت بعض التغريدات قالت فيها.. حبايبي اللي في حقوق.. القانون المدني والقانون الدولي دول احفظوهم كويس عشان بيخبطوا.. تاريخ القانون المصري مش صعب اوي هو وسكاشن مدني هتعرفوا تسلكوا فيها وادعيلكم..
ووجهت نصيحة لطلاب كلية صيدلة.. قالت فيها.. حبايبي بتوع صيدلة احفظوا الكلام بحاجات مشابهة يعني مثلا تحليل ELISA ده افتكروا ملكة الإحساس.. والـ CBC مثلا ممكن سفرة وممكن العادية والـ DHEA افتكروا سكينة وهي بتقول روح جاتك داهية.. وكملت وقالت.. وبالنسبة لحبايبي اللي في هندسة أنا مش ملمة بهندسة أوي بس ذاكروا ماشيينز كويس عشان عارفة إنها أصعب من كلمة (بشمهندس)..
100 راجل
وكانت آخر أعمال سمية الخشاب مسلسل “بـ 100 راجل”.. من تأليف محمود حمدان.. وإخراج إبرام نشأت.. والذي تدور أحداثه.. في إطار من الإثارة والتشويق عن ست بتمر بظروف كتير بتحاول تتخطاها من خلال عملها.. وبتقدم سمية الخشاب ضمن أحداث المسلسل شخصية غالية أبو الدهب وهي شخصية جديدة عليها تماما..
ومؤخرا اتعرضت سمية الخشاب لاصابات بالغة بعد مشاركتها في برنامج رامز جلال.. وكانت كشفت سمية اخر تطورات أزمتها مع رامز.. بسبب الاصابات الل اتعرضتلها في برنامج رامز جاب من الاخر..
إصابات بالغة
وقالت في تصريحات صحفية أنها عانت جدا من الإصابات وانها لسه في مرحلة العلاج الطبيعي.. وبالنسبة لمراضاتها لرامز جلال قالت انها مش هتنازل عن حقوقها القانونية لأنها تعرضت لضرر كبير بالرغم من كده.. شافت منهم لامبالاه من رامز وادارة البرنامج وانهم محاولش يطمنوا عليها ولا اهتموا..
وقالت ان اللي بيعمله رامز جلال مع الفنانين شئ مؤذي بدليل أن عدد من المشاهير تعرضوا لإصابات كتير غير ان رامز بيبقى فاكر ان النوع ده خفة دم وان برنامجه مضحك وهو عكس كده تماما..
وقالت إنها عاشت ايام صعبة بسبب الاصابات اللي اتعرضت لها دي.. نتيجة مشاركتها في البرنامج وأنها بسبب اللى حصل فيها مبقتش بتعرف تنام بشكل طبيعي.. وده بسبب اصابتها بكدمات وكسور في دراعها.. ورجلها..