كنت عليه كتير.. رد فعل تامر حسني على أغنية بسمة بوسيل الجديدة 

قال في حقي كل خير.. واني كنت عليه كتير.. جاب اللوم على نفسه.. وقلبه حن ومال.. بسمة بوسيل تطرح اغنية جديدة وتامر حسني يعلق.. 

 قال في حقي 

طرحت الفنانة المغربية بسمة بوسيل تاني اغنياته بعد انفصالها عن الفنان تامر حسني.. والاغنية الجديدة كلماتها اثارت تفاعل كبير جدا على السوشيال ميديا وفتحت ابواب كتير للنقاشات بين محبي الثنائي.. سواء تامر حسني او بسمة بوسيل.. 

والبعض اتعامل مع الموضوع على أنه مباراة بين بسمة وتامر حسني في اثبات ان النهايات اخلاق.. والبعض التاني شاف ان الاغنية كلها تلقيح على تامر.. الل بمنتهى الذكاء قدر يتعامل مع الموضوع ورد بطريقه توقف اي جدل او باب لخلافات جديدة.. 

بعد الانفصال 

ونشرت بسمة جزء من الاغنية الل عنوانها قال في حقي.. ف تامر شير الاغنية عنده على الاستوري وكتب عليها.. أغنية حلوة أوي يا بسوم، ربنا يوفقك واختيار فعلًا راقي.. 

وبتتكلم الاغنية عن اتنين انفصلوا والشخص التاني رجع ندمان وحن انه يرجعلها.. وقال في حقها كلام كتير هي مستغرباه.. وتحديدا إجابته عن سؤال سبتوا بعض ليه.. وأنه بالرغم من كل اللي حصل انه قال في حقها كلام خير كتير.. وكان عاقل.. وانه اعترف أن سبب الخلافات انها كانت عليه كتير.. وانه مشافش زيها طول عمره.. وانها هتفضل في قلبه الحب الاول والاخير.. 

ويقول جزء من كلمات الأغنية.. من إجابته عن سؤال.. انتوا سبتوا بعض ليه ؟؟.. قلبي حن له ومال.. إني أرجع تاني ليه.. كان في رده على كان.. حزنة باين من عينيه.. والغريبة إنه كمان.. جاب اللوم والعيب عليه..

مينفعش تفرط فيه

وفي الاخر بتقول ان قلبها لامها انها ازاي فرطت فيه.. وبيرجع شريط الذكريات قدام عنيها وتوحشها لمسة ايده وبتستغرب ازاي ماقدرتش تشوف قيمته عندها غالية قد ايه.. مهما كانت الظروف ده شخص مينفعش تفرط فيه.. 

الاغنية دي من كلمات أحمد عبد العزيز ولحن وتوزيع شريف قاسم و تسجيل ومكس وماستر مصطفى رؤوف.. 

وبعيدا عن تكهنات الجمهور.. تامر حسني يدعم بسمة بوسيل انها ترجع تغني من وقت انفصالهم.. وده اللي بيبان في اغنيتها الاولى.. البدايات.. الل في الاساس كانت بتاعة تامر وهو اتنازل عنها لبسمة.. وتصدرت بيها تريند جوجل.. 

 اغنية تيمو 

وقالت بسمة في بوست الإعلان عن طرح الاغنية.. على فكرة الاغنية دي بتاعت تيمو.. ولما قلت له إن أنا عايزة أعمل أغاني بتاعتي.. على طول شجعني.. وقالي طب أول أغنية ليكي انا هعملهالك.. وطلبت منو دي عشان كنت بحبها أوي.. ومتترددش لحظة إنه يديهالى..

ورد تامر عليها ع طول وقال.. الدنيا كلها متغلاش عليكي يا بسوم.. ألف مليون مبروك.. وغنيتيها غُنا عظيم بجد.. أيوا أنا المدرب والمنتج.. بس إحساسك هو الموضوع كله..

وكمل وقال.. من اليوم ده كل أيامك في نجاح وفرح وانتصارات.. وشكرًا لصناع الأغنية المؤلف الكبير أيمن بهجت قمر والملحن الكبير محمد يحيى والموزع الكبير فهد ومهندس الصوت الكبير مصطفى رؤوف.. 

وبالرغم من ان علاقة بسمة وتامر طول الوقت كان بيتصدر عنها مشاكل واشاعات انفصال بسبب المعجبين وغيرة بسمة المبالغ فيها.. الا انهم بعد الانفصال أدوا للناس صورة عظيمة عن النهايات وان المودة والرحمة لازم تبقى موجودة خاصة مع وجود أطفال.. أطفالهم اللي بيشاركوا كل لحظاتهم.. وبيعيشو معاهم كل مناسباتهم مع بعض.. وكأنهم لسه منفصلوش..