نسخة طبق الأصل منهم.. وبيعملوا المشاهد الصعبة.. والفنانين بيتنجموا على حسهم.. وأشهرهم دوبلير نمبر وان ودوبلير محمد إمام.. وغيرهم من نجوم الأكشن ..
مفيش شك إن “الدوبلير” في أفلام الأكشن بيبقا هو البطل الحقيقي في الفيلم.. هو اللي بيغامر بنفسه وبحياته عشان يطلع البطل في أحسن صورة.. ويأدي كل مشاهد الخطر والأكشن من غير ما الجمهور يشوفه ولا حد يسمع اسمه.. فالسينما العالمية والمصرية كمان بيعتمدوا على “الدوبلير” في تنفيذ كل المشاهد الصعبة.. فيا ترى مين الدوبليرات اللي بيلجأ ليهم نجوم الأكشن في مصر عشان يعملوا المشاهد الخطر بدالهم ؟ ..
دوبلير أحمد عز طلع فيك
البداية مع الفنان أحمد عز.. واللي يعتبر واحد من أشهر نجوم الأكشن في مصر حاليًا.. وكمان نجم شباك خاصة بعد النجاح الكبير اللي حققه فيلم ولاد رزق.. ففاجئ الفنان أحمد الفيشاوي الجمهور بفيديو ليه مع دوبلير احمد عز من فترة.. ونشر فيديو وهو معاه شخص شبه أحمد عز جدًا في الشكل والجسم.. وقال إنه دوبلير أحمد عز في فيلم ولاد رزق الجزء الثالث.. فافتكر المتابعين والجمهور إن أحمد عز بيلجأ لـ “دوبلير” عشان ينفذ المشاهد الصعبة في الفيلم.. لكن المفاجأة إن عمرو يوسف أكد إن الكلام دا مش حقيقي.. وإن الشاب مش دوبلير أحمد عز ولا حاجة وإن الفيشاوي كان بيهزر.. وإن أحمد عز بينفذ المشاهد بنفسه في الفيلم..
دوبلير نمبر وان في الأسطورة
أما نمبر وان فهو كمان ليه دوبلير معروف.. مش بس عشان المشاهد الصعبة اللي بيعملها.. لكن كمان لأنه معروف عنه إنه يظهر بأكثر من شخصية في الفيلم أو المسلسل.. ولازم يكون ليه دوبلير عشان المشاهد الحوارية.. والدوبلير بتاعه اسمه “محمد نصر”.. وأول ما ظهر معاه ظهر في مسلسل الأسطورة.. لأن “نمبر وان” عمل فيه دورين دور “رفاعي الدسوقي” ودور “ناصر”.. وكان محمود نصر هو بيلعب قدامه دور الدوبلير في أول 7 ساعات.. لما بيكون في حوار بين الشخصيتين اللي بيلعبهم محمد رمضان.. مش بس كدا.. كمان كان الدوبلير بتاعه في إعلان اتصالات لأن محمد رمضان ظهر فيه برضوا بأكتر من شخصية..
السقا بيرفض الدوبلير
أما الفنان أحمد السقا فبالرغم من إنه معروف عنه إنه مبيحبش يستعين بـ دوبلير.. وينفذ كل المشاهد الصعبة بنفسه من زمان.. لكن في مسلسل “ذهاب وعودة” أصر المخرج إنه يستعين بدوبلير عشان كان خايف على السقا من الإصابة.. وظهر الدوبلير في مشهد المفروض إنه السقا بينط فيه من فوق كوبري على مركب موجود في النيل.. ودا كان المرة الوحيدة اللي استعان فيها “السقا” بـ دوبلير.. خاصة إنه بيحب ينفذ المشاهد بنفسه وسبق وقال في لقاء ليه: “مبحبش أستعين بدوبلير في أي حاجة بتعمليها،، بحب اقدم كل المشاهد بنفسي عشان أحس بمتعة العمل اللي بقدمه،، ودايمًا بعمل المشهد بقلب جامد،، لكن دلوقتي بقيت بحسب الأمور الأول،، ولو لاقيت الموضوع مش مناسب لازم نحط كل سبل الأمان الأول”..
دوبلير محمد إمام في كوبرا
أما الفنان محمد إمام فمعروف عنه إن أغلب أفلامه كلها أكشن.. وعشان كدا بيستعين بـ “دوبلير”.. خاصة في مسلسله الأخيرة “كوبرا”.. فتفاجئ المتابعين والجمهور إن دوبلير “إمام” نشر فيديو ليه وهو بيعمل مشاهد الأكشن بدل محمد إمام.. مش بس كدا.. كمان كان متعور وتعب جدًا في المشاهد اللي نفذها.. ودا اللي عرض محمد إمام لانتقادات بأنه يستغل مجهود الدوبلير وبيتنجم على حسه.. وقالوا في تعليقاتهم: “جايب دوبلير آمال هو إيه لازمته في المسلسل”.. “ده سرقة مجهود،، يعني دا يمثل مشاهد أكشن ويتعب وهو ينسب مجهود ليه”..
كمان في غيرهم كتير من الفنانين اللي بيعتمدوا على الدوبلير في تنفيذ مشاهد الأكشن.. قولنا مين أكتر دوبلير اقتنعت بمشاهد الاكشن اللي نفذها ؟
