عاش يتيم لاسرة فقيرة.. اشتغل مُدرس نحت لحد المعاش.. كرمه الرئيس أنور السادات.. وخرج من الحرم المكي بالبوليس.. محطات مهمة في حياة بابا عبده.. الراحل القدير عبد المنعم مدبولي..
بابا عبده
18 سنة مرت على وفاة واحد من أهم الوجوه التي عرفتها السينما المصرية.. واحد من الأشهر الآباء في السينما والدراما.. وأخفهم دم.. وبالرغم من مرور سنين طويلة على وفاة الفنان القدير عبد المنعم مدبولي إلا أن اسمه ليس ليه مكانته الخاصة وأعماله خالدة يعرفها جيل بعد جيل..
وحياة عبد المنعم مدبولي مكانتش سهله.. كان فيها محطات كتير صعبة وتحديات مش اي حد يقدر يكسبها.. ف عبد المنعم مدبولي اتولد في 1921.. لأسرة فقيرة جدا في حي باب الشعرية.. مكونه من 3 أبناء توفى والدهم وهما في سن صغير وكان مدبولي عنده 6 سنين.. وده اثر جدا على حياته وخلاه عايش بيقرب من كل طفل يتيم.. علشان هو عارف الالم الل هما حاسين بيه..
المسرح
رأس فريق التمثيل في المدرسة الابتدائية وتخرج من مليون الفنون التطبيقية.. اشتغل مدرس في قسم النحت لحد ما خرج على المعاش.. وفي المدرسة دي اكتشف مواهب كتير زي نبيل الهجرسي.. وهو بيشتغل دخلت المعهد العالي للفنون المسرحية سنة 1945.. واتخرج بترتيب التاني سنة 1949..
انضم لفرقة جورج أبيض المسرحية وبعدين فريق فاطمة رشدي.. شارك في التمثيل من خلال برامج الأطفال بالإذاعة ضمن حلقات برنامج بابا شارو.. و بدايته الحقيقية كانت من خلال برنامج ساعة لقلبك.. قبل ما ينضم لمسرح التلفزيون.. واسس مع فؤاد المهندس وأمين الهنيدي مدرسة كوميدية مستمدة من تراث على الكسار ونجيب الريحاني.. وشارك في تأسيس عدد من المسارح زي المسرح الحر ومسرح الكوميديا.. وقدم حوالي 120 مسرحية..
مكتشف نجوم الكوميديا
اكتشف مع فؤاد المهندس عدد من النجوم زي.. عادل إمام.. محمد صبحي.. يونس شلبي.. سعيد صالح.. والضيف أحمد وغيرهم..
بدايته السينمائية الحقيقية كانت في فيلم ايامي السعيد سنة 1958.. وتوالت أعماله وصلت لحوالي 150 فيلم أشهرها.. احنا بتوع الاتوبيس والحفيد وآخرها اريد خلعا في 2005.. وفي الدراما قدم أكثر من 80 مسلسل.. أشهرها ابنائي الاعزاء شكرا والمشهور فيه بشخصية بابا عبده.. واخرها الكلام المباح في 2005.. وقدم فوازير “جدو عبده زارع أرضه..
حصل على جوايز كتير منها جائزة أحسن ممثل في السينما عن الفيلم.. الحفيد.. أهلا يا كابتن.. مولد يا دنيا.. وكرمه الرئيس الراحل محمد أنور السادات سنة 1979 بشهادة تقدير خاصة في أكاديمية الفنون عن دوره في مسلسل “أبنائي الأعزاء.. شكراً”.. وسام العلوم والفنون من الطبقة الأولى سنة 1983.. وجائزة الدولة التقديرية عن مجمل أعماله سنة 1984.. جائزة تكريم في مهرجان زكى طليمات سنة 1986م.. وكرم اسمه المهرجان القومي للمسرح في 2006.. وهو أول فنان عربي كتبت عنه دائرة المعارف النمساوية..
مدرسة المشاغبين
اتجوز جارته.. نجاة وخلف منها 3 أبناء.. امل ومحمد واحمد.. واشتهر بحبه الكبير للأطفال.. علشان كد عمل مجموعة مميزة من الأغاني ليهم زي.. “توت توت” و “كان في واد اسمه الشاطر عمرو”..
واللى كتير ميعرفهوش ان مدبولي كان عضو اساسي لي مسرحية مدرسة المشاغبين.. وانسحب منها.. علشان الارتجال الزيادة من ابطالها.. وده اللي بيخلي المسرحية تطول زيادة عن اللزوم.. وفي يوم من أيام العرض حصلت خناقة بين زوجين وصلت للطلاق بسبب ان المسرحية خلصا في وقت متأخر ومبقاش فيه مواصلات.. ودي كانت اللحظة التي قرر فيها مدبولي أنه هيعتذر..
تواضع شديد
اتعرف عن بابا عبده تواضعه الشديد جدا.. وانه دايما قريب من الجمهور.. ف في مرة كان موجود في المحطة وكان وقتها رمضان.. وقت أذان المغرب.. اصر العمال انه يقعد ويفطر معاهم من اكلهم البسيط.. وفعلا قعد معاهم وفطر.. وكانوا مبسوطين بيه جدا..
ومن الحاجات الغريبة اللى حصل معاه.. كانت في الحرم المكي.. وعدد من الجمهور اتعرف عليه.. حصل تجمهر مش طبيعي لدرجة ان بعض الاجانب افتكروه ولي من اولياء الله الصالحين.. وده زود من الزحمة حواليه جدا.. واضطر ابنه يستدعي الأمن علشان يخرجوا والده.. وفعلا خرج من الحرم بالبوليس..
عاش مدبولي ايام صعبة مع المرض.. بعد ما تصاب بسرطان الكبد وخاض رحلة علاج طويلة وصعبة في لندن.. وتم استئصال أجزاء كبيرة من الكبد.. وتعافي من المرض وعاش بعدها 25 سنة.. قبل ما يتوفى بسبب التهاب رئوي حاد دخل ع إثره في غيبوبة اسبوع وبعدها توفى.. علشان يعيش محبين عبد المنعم مدبولي يوم حزين جدا في 9 يوليو 2006..
