نسخة طبق الأصل منهم.. وعاملين زي الفولة اللي انقسمت نصين.. شبهم في الشكل والملامح والصوت.. ويقلدونهم في اللبس وطريقة الكلام.. وعايزين يمثلوا بدالهم .. وبقي عندهم جمهور بيحبهم ويتابع أخبارهم ..
كتير بنسمع جملة “يخلق من الشبه أربعين”.. واللي بنقولها دايمًا لما بيبقى في شخص ليه أشباه كتير.. ما بالك بقى لما يبقى الشخص دا فنان أو فنانة.. وليهم جمهور بيحبوها ومتابعين أخبارهم.. هيكون موقف الشبيه ايه.. تعالوا نعرف مين النجوم اللي كان ليهم شبيه وكان رد فعلهم ايه ؟
شبيهة عبلة كامل
البداية كانت مع “هند”.. بنت مصرية بسيطة من طنطا.. ظهرت كـ شبيهة الفنانة عبلة كامل.. واللي تعتبر من أكثر الفنانات اللي ليها شعبية كبيرة عند الجمهور.. فجأة ظهر لـ “عبلة كامل” شبيهة نسخة منها في الملامح.. وتقلدها في الحركات بالضبط.. فبدأت “هند” تستغل الشبه اللي بينها وبين الفنانة عبلة كامل وتعمل فيديوهات على التوك توك تقلدها فيها.. وكمان تعمل مشاهد من الافلام بتاعتها.. وبقت فيديوهاتها تجيب ملايين.. وفي كتير يتابعوها وبيحبها لأنها بتفكرهم بالفنانة عبلة كامل.. لكن الفئة الثانية من المتابعين شافت إن “هند” بتحاول تقلد عبلة كامل مش أكتر.. ومش شبهها ولا حاجة ..
شبيه تامر حسني ظهر في حفلة معاه
كمان نجم الجيل تامر حسني ظهر له هو كمان شبيه.. ونسخة طبق الأصل منه.. فعمل ذقنه وشعره زيه بالظبط.. وظهر مع نجم الجيل في حفلة كان بيعملها وكمان اتصور معاه.. وبقا يستغل الشبه اللي بينهم في أنه يعمل هو كمان فيديوهات على التيك توك والسوشيال ميديا.. ويقدر يعمل مشاهدات يحقق منها مكاسب مادية.. لكن “تامر” لما شافه اتصور معاه.. وطلب منه ميشتغلش الشبه بينهم لأنه دا مش هيضر نجم الجيل لكن هيضر هو في حياته.. وهي خليه يفقد شخصيته وهويته ..
شبيه الزعيم عادل إمام
أما بقا الزعيم عادل إمام فهو كمان مسلمش من ظاهر شبيه النجوم.. وظهر له هو كمان شبيه في منتصف الثمانينات.. واسمه “نصر حمادة”.. وحاول وقتها إنه يظهر بقوة على الساحة من خلال استغلال الشبه بينهم.. خاصة إنه وقتها ماكنش فيه سوشيال ميديا.. فكان سبيله الوحيد إنه يظهر في وسائل الإعلام.. لكن مع الوقت اختفى نصر حمادة ومقدرش يحقق أي حاجة من الشبه للي بينه وبين “الزعيم”.. وهاجر لـ “الخليج” عشان يدور على فرصة عمل.. واختفى عن مصر وقتها.. لكن “نصر حمادة” ماكنش الشبيه الوحيد للزعيم وظهرله أشباه كتير جدًا بعدها .. لكن كلهم ماكنوش بيحققوا أي حاجة ويختفي مع الوقت ..
شبيه نمبر وان محمد رمضان
أما بقا محمد رمضان في حكايته حكاية مع أشباه الفنانين.. فمن وقت ظهوره وشهرته وهو كل يوم بيظهر ليه شبيه جديد.. مرة يظهر له شبيه ويعمل فيها “الأسطورة” ويتكلم زيه ويقلده في حركته “نمبر وان”.. وشبيه تاني يقلدوا في مسلسل “ابن حلال” ويعمل نفسه “حبيشة”.. والغريبة إن عكس ما الموضوع بيضايق الفنانين.. لكن ظهور أشباه ليه كان مفرحه جدًا.. وزي ما قال كان شايف نفسه موجود في كل بيت وشارع في مصر.. وإن كل دول بيقلدوه عشان بيحبوه ..
شبيه ويجز عمل إعلانات
كمان الرابر “ويجز” ظهر له هو كمان شبيه .. شبه في الشكل والجسم بالظبط.. واللي بقا يقلده في تسريحة شعره وكمان شكل حواجبه.. واستغل الشبه بينهم في إنه يعمل فيديوهات.. والمفاجأة إن شبيه “ويجز” الوحيد هو اللي طاقة القدر اتفتحت ليه.. خاصة بعد ما اتعرض عليه يعمل إعلان مع “ويجز” يكون هو بطل الإعلان فيه مع شركة مياه غازية معروفة.. وفعلا عملوا الإعلان مع بعض وحقق نجاح كبير جدًا..
لما مامتك تعمل عمرو دياب في البيت
أما بقا الهضبة عمرو دياب فهو كمان مسلمش من ظاهرة الشبيه.. فمؤخرًا بدأت تظهر فيديوهات لـ “شاب” يطلع على التيك توك.. ويغني أغاني عمرو دياب.. وعامل نفس تصريحاته وقصة شعره.. و يلبس زيه و يحاول يقلده.. ومش بس كدا دا كمان يغني بصوته.. ودا اللي عرضه لسخرية كبيرة من المتابعين.. واللي بيقولوله في التعليقات: “لما أمك تعملك عمرو دياب في البيت”.. “دا بديل عمرو دياب في المقاطعة”.. وكلها تعليقات ساخرة عليه..
وشبيه عمرو دياب هو مش أول ولا اخر واحد هيظهر من أشباه النجوم.. اللي بيحاولوا يعملوا ثروة لنفسهم.. و يصنعوا تاريخ على حسابهم.. فيا ترى هيقدرو يستغلوا الشبه ويعملوا ده ولا هيكون صعب ؟
