أصوله من المنيا.. وأهله هاجروا لـ أمريكا واتولد هناك.. فخور بجذوره المصرية.. ومبيعرفش يتكمل عربي.. أهله كان نفسهم يبقا محامي أو دكتور.. وخيب أملهم وطلع ممثل,, ووصل لـ الأوسكار بفيلم سيرة ذاتية.. وبقا واحد من أشهر نجوم هوليوود
تحول رامي مالك لـ واحد من أشهر نجوم هوليوود.. واللي قدر يوصل لـ جائزة الأوسكار بـ أول فيلم من بطولته.. فقدر رامي مالك ابن محافظة المنيا وصاحب الجنسية الأمريكية إنه يحقق انجاز كبير باسم مصر.. ولحد دلوقتي بيفخر الجمهور بيه في المهرجانات العالمية اللي بيمثل مصر فيها .. فيا ترى مين هو رامي مالك وازاي قدر يوصل للمكانة ده ؟ ..
https://www.facebook.com/share/v/ae7MSavx67ZeQWzy/?mibextid=oFDknk
أسرته من المنيا وهاجروا لـ أمريكا
رامي مالك شاب من أسرة مسيحية أصولها صعيدية.. وبالتحديد هما من مدينة “سمالوط” في محافظة المنيا.. وقرروا يهاجروا لـ أمريكا عشان يوفروا مستقبل لولادهم هناك.. واتولد رامي مالك هناك في كاليفورنيا وبقا معاه الجنسية الأمريكية.. وعاش هناك حياته كلها.. وكانوا أهله بيحاولوا يتكلموا معاه بالعربي وهو لسة 4 سنين.. لكن مع الوقت بدأ ينسي كلمات كتير وبقا بيتكلم عربي مكسر.. كمان “رامي” كان مجتهد جدًا وكان نفسه يحقق حلم والده ووالدته بإنه يطلع دكتور أو محامي.. لكن وقت دراسته للقانون لاحظ الدكتور بتاعه موهبة رامي مالك في التمثيل والربط الدرامي.. وطلب منه يشارك في مسرحية.. وبعدها قرر “رامي” يدرس المسرح ووافق والده..
اتحول لـ نجم بمسلسل مستر روبوت
واتخرج رامي مالك بشهادة بكالوريوس في المسرح.. لكنه كان حاسس بالتخبط في البداية خاصة إنه “مهاجر” وأصوله مصرية لكنه عايش في أمريكا.. ومع الوقت بدأ رامي مالك يتصالح مع أصوله ويحس بالفخر بمصريته.. خاصة بعد ما بقت نقطة إضافية ليه في إن المنتجين بيستخدموا ملامحه وأصوله في لعب أدوار مصرية في أفلامهم.. وفعلا رامي مالك حقق نجاح في البداية بالأدوار الصغيرة.. وبعدها تم اختياره إنه يلعب دور البطولة في مسلسل “مستر روبوت”.. واللي حقق نجاح كبير جدًا في العالم كله.. وبقا اسم “رامي مالك” معروف ..
فاز بـ الأوسكار بـ فيلم الملحمة البوهيمية
وبعدها اترشح رامي مالك إنه يلعب بطولة فيلم “الملحمة البوهيمية”.. وهو فيلم سيرة ذاتية تحكي قصة حياة المطرب “فريدي ميركوري”.. واللي قدر”رامي مالك” يمثل دوره ببراعة.. وفاز بالأوسكار كأفضل ممثل عن الدور اللي أداه في الفيلم.. وأثناء خطابه بعد فوزه بالأوسكار.. افتخر بأصوله المصرية.. وإنه يعتبر نفسه يمثل مصر والشرق الأوسط.. وقال في خطابه:
“أنا ابن مهاجرين من مصر وأمريكي من الجيل الأول،، وجزء من قصتي يتم كتابته الآن،، وأنا ممتن لكل شخص آمن بي،، لما كبرت أدركت جمال تراثي المصري،، والثروة والثقافة والسحر والموسيقى والجمال اللي بيجي من الشرق الأوسط،، وأنا فخور ومبسوط إني بمثلهم دلوقتي،، كوني مصري هو جزء من الحمض النووي الخاص بي،، وأنا حاسس بالفخر للسبب دا”..
مرتبط بـ ممثلة أكبر منها بـ 15 سنة
أما عن حياة “رامي مالك” العاطفية.. فـ “رامي” مرتبط بالفنانة إيما لويز كورين.. نجمة مسلسل “ذا كراون”.. واللي اتكلم عن العائلة الملكية البريطانية واتناول جزء من قصة الأميرة ديانا.. فسبق وصورتهم الصحافة أكتر من مرة وهما بيبوسوا بعض وبيتكلموا بحميمية وحب أثناء تواجدهم مع بعض في الأماكن العامة.. لكن لحد دلوقتي رامي مالك مالناش عن جوازه منها..
شاركنا وقولنا أيه اكتر دور بتحبه لـ رامي مالك ..وايه هو الدور اللي نفسك يعمله ؟
