أنا من الجميلات.. وأحلى من نانسي عجرم.. وفيا شبه من منى زكي.. وشفط خدودي 3 مرات.. وعايشة من خير أبويا والمحلات اللي سايبها ليا.. والفن مبيأكلش عيش.. ولا بيعيشني في المستوى اللي أنا فيه ..
تصدرت الفنانة غادة إبراهيم التريند على مواقع التواصل الاجتماعي.. بعد تصريحاتها الأخيرة.. واللي كشفت فيها مفاجأت وأسرار عن شخصيتها.. واللي مش كتير من الجمهور يعرفوها عنها.. فيا ترى غادة إبراهيم قالت ايه.. وليه تصريحاتها أثارت الجدل ؟ ..
انا احلى من نانسي عجرم
البداية كانت مع حديث غادة إبراهيم عن تقييم الجمال الخاص بالفنانات.. باعتبارها نفسها واحدة من جميلات الفن.. وإنها أحلى من فنانات كتير موجودين على الساحة عملوا عملية تجميل.. وقالت غادة إبراهيم:
“أنا من الجميلات، ودا ثقة في النفس مش غرور، وأنا بشوف أن الجاذبية أهم من الجمال، الجمال ممكن يختلف عليه الناس لكن الجاذبية أبقى، لو أنا جذابة هعجب معظم الناس لكن لو أنا جميلة بس هعجب جزء من الناس، ومش بحب يتقال عليا جميلة يتقال عليا جذابة وروحها حلوة وكاريزماتك،، وكمان بحب شكل منى زكي وهي بتشبهني، حتى أختي مرة جاية من المطار وكان في إعلان لمنى زكي على الكوبري لقيتها بتقولى مبروك الإعلان،، قلتلها مش أنا دي منى، نظرة العين شبه بعض، جزء عينينا شبه بعض”..
https://www.facebook.com/share/v/QvsPetNRCREd4Y8j/?mibextid=oFDknk
ولما اتسألت غادة إبراهيم عن مين جمالها أكتر هى ولا نانسي عجرم.. ردت غادة إبراهيم وقالت: “أنا أجمل من نانسي عجرم، من وجهة نظري، نانسي شفت صورها قبل العمليات لو حطينا صورتنا جمب بعض أنا أحلى، وأنا من ساعة ما طلعت شكلي متغيرش”..
شفط خدودي 3 مرات
كمان غادة إبراهيم أكدت إنها معملتش أي عمليات تجميل.. وإنها حاليًا بشكلها الطبيعي.. لكنها بتحب البوتوكس وشفط الخدود لأن حجم خدودها كبير: “أنا بعمل بوتكس كل 6 شهور عادي، شفايفي حاطه لمعة جديدة طالعة في السوق،، بقالها كذا شهر وبعد ساعات هيروح، أنا جايبه اللي بيعمل بومبيه، أنا شفطت خدودي 3 مرات عشان أنا عندي خدود”..
واتكلمت غادة إبراهيم كمان عن النجمات والفنانات اللي بتشوفهم حلوين على الساحة الفنية: “ياسمين صبري أحلى، هي قمر وبتتكلم حلو وإسكندرانية بنت بلدي، أنا متعصبة لأهل بلدي، وهيفاء وهبي أحلى مني أنا بعشقها انا شفتها من زمان قبل ما تكبر هي قمر من زمان وحلوة من قبل ما تعمل أي حاجة”..
الفن ميأكلش عيش
مش بس كدا.. كمان غادة إبراهيم اتكلمت على المستوى المعيشي اللي عايشة فيه.. وإنها عايشة في مستوى كويس مش من فلوس الفن.. لكن من محلات والدها لها.. وصدمت غادة إبراهيم الجمهور وقالت:
“هو المستوى اللي أنا عايشه فيه ده من الفن؟،، هو الفن بالشكل اللي أنا بشتغل بيه ده،، يقعدني على النيل وأركب عربيات، ويسفرني بروكسيل مرتين في السنة لأختي و أسافر لأهلي في لندن وباريس كل شوية، لا أنتوا فاهمين غلط،، أنا عايشة من قبل ما أدخل الفن من خير أبويا، عندنا محلات في الإسكندرية، وشغل خاص بعيد عن الفن في العقارات، أنا مصاريفي كتير، والمعدل اللي بشتغل بيه في الفن ميعيشنيش”..
وتفاجئ الجمهور من تصريحات غادة إبراهيم.. واللي عادة ما تكون تصريحاته المثيرة للجدل دائما.. قولنا ايه رأيك في تصريحاتها.. وشايفها احلى من نانسي عجرم فعلا ؟
