![](https://onetakeeg.com/wp-content/uploads/2024/05/IMG-20240514-WA01411.jpg)
رجعت للغناء تانى.. وأنتج لها أول أغنية رسمية لها رغم انفصالهم.. ودربها على الغناء في الاستديو.. وقالها الدنيا كلها متغلاش عليكي.. وهتبقي أنجح واحدة.. شكلهم رجعوا لبعض ..
جدل كبير أثاره نجم الجيل تامر حسني وطليقته الفنانة المغربية بسمة بوسيل.. بعد ما أعلنت عن صدور أول أغنية ليها بمناسبة عيد ميلادها.. والمفاجأة إن أغنيتها الجديدة كانت من إنتاج طليقها تامر حسني.. فالظاهر إن الماية بدأت ترجع لمجاريها بينهم.. فيا ترى ايه الحكاية.. وليه بسمة قررت ترجع للغناء مرة تانية ؟ ..
بسمة نجمة ستار أكاديمي
بسمة بوسيل ومن قبل ما تتعرف على “تامر” وهى تحب الغناء.. وموهوبة في الغناء الطربي.. وعشان كدا شاركت في برنامج “ستار أكاديمي” اللي يكتشف المواهب الغنائية .. وقدرت “بسمة” توصل فيه للنهائيات .. والجمهور العربي كله بقا عارفاها.. ولما خرجت “بسمة” من البرنامج.. اتعرفت وقتها على “تامر” في حفلة ليه في المغرب.. خاصة إن “بسمة” كانت معجبة بيه و بتحبه من زمان.. ولما حصل بينهم كلام.. اتفقت معاه بسمة إنها هتيجي على مصر ويساعدها إنها تعمل ألبوم لها.. لكن “بسمة” وبعد ما حضرت الألبوم وكان خلاص هينزل.. قررت هي و”تامر” يتجوزوا .
خايف عليها من الوسط الفني
لكن قبل ما بسمة وتامر يتجوزوا.. تامر اشترط عليها إنها تبعد عن الغنا .. وإن الالبوم بتاعها مينزلش.. لأنها كان خايف عليها من الوسط الفني.. وقالها إنه عايزها “ملكة متوجة” في بيتها.. ووافقت “بسمة” واشتغلت في حاجات تانية.. زي مجال التجميل والبشرة وكمان تصميم الازياء .. وبعدت تمامًا عن الغنا.. لحد ما انفصلت عن تامر.. وهنا قررت “بسمة” تغير كل حياتها .. وقررت ترجع للغنا مرة تانية عشان تثبت نفسها.. ولأنها كانت في حالة نفسية صعبة..
https://www.instagram.com/reel/C68u_RXgX9W/?igsh=Z2Q0c2lqNXJ5aGEy
إنتاج تامر أول أغنية لها
وفكرت “بسمة” أول أغنية تغنيها هي أغنية الفنانة اللبنانية هبة طوجي “مين اللي بيختار”.. لأن وقتها بسمة كانت في حالة نفسية صعبة بعد الطلاق وتحسنت بعد ما غنت الأغنية في الاستديو.. لكن كان بيحصلها مشاكل مع الفنانين لأن الأغاني مش ملكها.. وبدأت “بسمة” تفكر تعمل أغاني خاصة بها .. وهنا ادخل “تامر” اللي حس إنه عايز يدعم “بسمة” تحقق اللي هي عايزاه.. واتفق معاها ينتج لها أول أغنية لها .. مش بس كدا .. دا كمان دربها على الأغنية .. واهداها الأغنية اللي كان المفروض يغنيها هو..
هدية ليها بمناسبة عيد ميلادها
وأعلنت “بسمة” عن اصدار الأغنية يوم 10 مايو.. بمناسبة عيد ميلادها.. ومانسيتش تشكر تامر على تشجيعه ليها.. وإنتاجه للأغنية.. فعلقت على الأغنية وقالت:
“البدايات أجمل بص حواليك وأسأل.. اسمعوا أغنيتي الجديدة البدايات دلوقتي على يوتيوب وجميع منصات الاستماع.. إن شاء الله تعجبكم.. مستنية رأيكم،، وعلى فكرة الاغنية دي بتاعت تيمو، ولما قلتله إن أنا عايزة أعمل أغاني بتاعتي، على طول شجعني، وقالي طب أول أغنية ليكي أنا هعملهالك، وطلبت منه دي عشان كنت بحبها أوي، ومتترددش لحظة إنه يديهالى”..
وفرح “تامر” بتعليق “بسمة” وحس إنها مقدرة مجهوده معاها.. وكان فرحان بـ نجاحها.. وعلق على كلامها وكتب: “الدنيا كلها متغلاش عليكي يا بسوم،، الف مليون مبروك،، وغنيتيها غُنا عظيم بجد،، ايوة انا المدرب والمنتج،، بس احساسك هو الموضوع كله،، كل سنه وانتي طيبه،، ويارب من اليوم ده كل ايامك في نجاح وفرح وانتصارات،، شكرًا لصناع الاغنيه المؤلف الكبير أيمن بهجت قمر والملحن الكبير محمد يحيى والموزع الكبير فهد ومهندس الصوت الكبير مصطفى رؤوف، ومبروك يا بسوم”..
مش بس كدا.. كمان نشروا كواليس تصوير الأغنية.. فكانت “بسمة” بتسجيل الأغنية في الاستوديو.. و “تامر” كان معاها طول الوقت بيدربها ويدعمها.. وكل دا وهما لسة منفصلين.. لكن الجمهور أتوقع إن تامر وبسمة هيعلنوا قريب عن رجوعهم لبعض خلاص.. خاصة بعد ما “تامر” دعم بسمة في إنها تحقق حلم عمرها وتكون مغنية معروفة.. فيا ترى تامر وبسمة هيرجعوا لبعض فعلا.. والاتنين مصممين على الانفصال ؟