بعد نجاح ألبومه الأخير.. حمزة نمرة: أنا انطوائي وماشي عكس التيار بس ربنا أداني أكتر من حقي
كتبت: أميمة أحمد
عبر الفنان حمزة نمرة عن سعادته بنجاح ألبومه الأخير.
وكتب حمزة نمرة كلمات مؤثرة لجمهوره عبر حسابه الرسمي بـ فيسبوك حيث قال:” زمان، لما كان حد يسألني في أي لقاء، هل حاسس إنك مش واخد حقك فنياً؟ كنت باقعد أفكر شوية وأبقى مش متأكد من الإجابة، وغالباً بأكون أقرب لفكرة إني فعلاً كده”.
وتابع:” لحد ما في يوم قعدت بيني وبين نفسي وسألت نفسي السؤال ده بجد، واكتشفت إن ربنا إداني أكتر مما أستحق، ووصلني لأبعد مما يفترض إني أوصل له بحسابات الدنيا وبالورقة والقلم، واحد ماشي عكس التيار، لا بيغني مواضيع شبه الرائج، ولا بيعمل موسيقى شبه الرائج، ولا بيلبس شبه الرائج، ولا بيفرض نفسه بالزنّ على الودان، وفوق ده كله انطوائي وما بيعرفش يخلق علاقات ومعارف في مجاله”.
وأشار:” بالورقة والقلم وقوانين الطبيعة، المفروض يبقى بالكتير على هامش الفن ويبقى مسموع في دوائر ضيقة جداً، لكن إن اللي بأقدمه ينتشر بالشكل ده، وإن ألبوماتي تنزل في موسم الصيف ف تنافس فئات البوب وتبقى رائجة في كل المنصات، فده فضل من ربنا كبير أوي، ده مش حقي ده أكتر من حقي بمراحل”.
واختتم:” الحمد لله رب العالمين، باشكركم إنكم كنتم سبب في النجاح ده، كل واحد سمعني واتأثر، اتكلم عني وسط صحابه، نشر أغنية ليا، حضر لي حفلة، ربنا جعلكم سبب في إن فني يفضل عايش. وسامحوني على أي تقصير أو حاجة كانت أقل من توقعاتكم، ده اللي ربنا يسره لي لتقديمه وربنا يرزقنا حسن النوايا، وأخيراً أشكركم من قلبي، ماشي على الله.. يتكعبل لو بص وراه”.
ومن جانب آخر طرح حمزة نمرة أحدث ألبوماته الفنية بعنوان ” قرار شخصي” والذي حقق نجاحاً كبيراً من خلاله.
