بداية مي كساب مع مجد القاسم.. دموع حمادة هلال.. وبعد العو دياب مش عارف يغني.. نجوم فضلوا التمثيل على الغنا وبقوا نجوم صف أول..
على الرغم من أن الاغنية نجاحها بيكون اسرع من أي عمل فني تاني.. لكن أضواء السينما والتلفزيون.. مفعولها وتأثيرها بيكون اقوى.. وتجذب حتى النجوم في مجالات تانية زي الغنا.. وبيحاولوا انهم ياخدوا الفرصة الل تخلد ذكراهم عند المشاهدين..
وعدد كبير من النجوم نجح في النقلة من الغناء للتمثيل.. وفي منهم اللى جمع بين الاثنين ومكمل فيهم.. وفي لاتنسى انه كان مغنى اصلا.. ونجاحهم في التمثيل غطى على نجاحهم كمطربين..
مي كساب
مثلا مش كتير يعرف أن مي كساب في الأصل كانت مطربة ناجحة جدا.. وكان ليها اغاني مميزه ومعروفه.. لكن قطاع كبير من الجيل الحالي ميعرفش ده.. واتفاجأوا لما طلعت من فترة أغنية غمض عينيك مع مجد القاسم تريند على تويتر.. واستغربوا من وجود مي.. فاضطرت مي انها توضح أنها في الأصل مطربة.. وبدأت مشوارها الغنائي ونجحت فيه جدا قبل ما يسرقها التمثيل.. وأشهر أغانيها واللى اتعملت فيديو كليب كسر الوطن العربي كله.. كانت أغنية شيل ده من ده يرتاح ده عن ده..
قبل ما يكلمها الفيشاوي علشان تشاركوا بطولة مسلسل تامر وشوقية.. والل منه انطلقت لعالم التمثيل ونسيت الغنا.. ومؤخرا وبعد نجاحها الساحق في عالم التمثيل قررت ترجع تاني للغناء بألبوم جديد.. بعنوان حبيبي وعدني..
https://www.facebook.com/share/v/o6eHuDNVWDa4btaw/?mibextid=oFDknk
حمادة هلال
وتقريبا جدا المداح حمادة هلال نسي أنه مطرب.. وكان مكسر الدنيا بأغانيه.. الل بدأها من وهو في مرحلة المراهقة.. وقبل ما يدخل عالم التمثيل من خلال المخرج محسن فكري في مسلسل بدارة.. علشان يبقى نجم كممثل.. ونجوميته في التمثيل زادت وبقاله اسم كبير لما عمل فيلم عيال حبيبة مع غادة عادل.. واستمر لفترة في الجمع بين الغنا والتمثيل.. قبل ما يأخذه عالم الدراما تماما..
ومن اغاني حماده هلال اللى كسرت الدنيا.. واشتهر بيها كمطرب.. اغنية دايما دموع.. واغانيه في الأفلام بعد كد.. ساعات.. ليه مستنتيش.. هاتوا الفلوس اللي عليكو.. وغيرها كتير..
دياب
الفنان دياب الل دلوقتي تقريبا محدش شايفه غير غول تمثيل.. اصلا بدأ حياته كمغني من وهو صغير جدا.. في الافراح قبل ما يكتشفوا نصر محروس ويعملوا اغانيه كانت من الافضل في تاريخ الغناء الشعبي.. زي العو.. الل اصلا اشتهر بيها وبقى معروف باسم دياب العو.. قبل ما تجيله فرصة المشاركة في مسلسل ساحرة الجنوب.
ومن هنا ولحد النهاردة مفيش عمل شارك فيه دياب وجلى منه.. بالعكس كل عمل يكون مبهر فيه اكتر من اللي قبله كممثل.. حتى لو طالع ضيف شرف في مشهد واحد.. يفضل معلق في دماغ الجمهور.. وقال دياب أنه مسابتش الغنا.. لكن لحد دلوقتي مالقيش اغنية يحس انه عاوز يغنيها..
أحمد فهمي
أما النجم أحمد فهمي اللي وصل بالتمثل للانتاج المشترك في أعمال عربية مش بس مصرية.. كانت بدايته كمغني في فريق واما.. مع محمد نور ونادر حمدي وأحمد الشامي.. وعملوا عدد من الالبومات الناجحة.. قبل ما ينطلق فهمي لعالم التمثيل من خلال الفيلم اللى جمع فيه بين الغناء والتمثيل.. خليج نعمة.. في 2007.. وغنى فيه مجموعة اغاني مميزة جدا بالاشتراك مع محمود العسيلي.. وكانت ابرزهم اغنية غابت شمسنا..
واشهر اغنية اتشهر بيها فهمي مع فريق واما.. اغنية كانت اغنية تحلفلي اصدق.. واللى اتشهر بها الفريق وبعدها كل واحد فيهم بقى ليه أعماله الخاصة بجانب الفرقة.. وانجحهم واشهر حاليا أحمد فهمي.. لأنه بقي أحد نجوم الصف الأول في التمثيل..
هاني عادل
ومن الفنانين المعروفين جدا في عالم التمثيل.. الفنان هاني عادل.. واللى شارك في بطولات عدد من الأعمال المميزة.. زي مسلسل ليه لأ.. والبحث عن علا وسابع جار وغيرها من الأعمال المميزة..
لكن مش كتير يعرف ان هاني عادل اصلا مطرب وحقق نجاح كبير في الغنا من خلال فرقة وسط البلد.. الل خاض من خلالها تجربة التمثيل في فيلم عودة الندلة وزي النهاردة.. ومنها حلق منفردا في عالم التمثيل..
