أول رد من وفاء عامر بعد أزمتها الأخيرة: أنا ست عنيدة ومش هسيب حقي

كتبت: أميمة أحمد 

علقت الفنانة وفاء عامر لأول مرة عن أزمتها الأخيرة بعد اتهامها بتجارة الأعضاء.

وقالت وفاء خلال مكالمة هاتفية عبر برنامج “الستات” من تقديم سهير جودة ومفيدة شيحة:” أنا مبظهرش مع ناس دون المستوى، ودول ناس كتير بتشتري منهم وبتتعامل معاهم، وبعاملهم علشان أكبر مشروعاتهم”.

وتابعت:” واحده كانت بتقول إن هي بتشتغل في بيت، وبتشتغل داده، ودول شريحة كبيرة في المجتمع، وبعتبر كل ست شريفة بتشتغل من غير ما تقول ساعدوني ومش بتمد إيدها للناس ومش بتشحت رقبتي ليها، وأتحدى واحدة جاتلي البيت أو خدت منها حاجة أو طلعت معاها في إعلان أكل، أخدت منها حاجة ببلاش، ومش بقولك إني ملاك، في زي كتير”.

وأضافت:” هي مش عايزة مني حاجة، هي نقت أعلى واحده في منطقة السوشيال ميديا، أنا أكبر نجمة على التيك توك، ومش بظهر مع أي حد، وآخر حاجه بنجمع 150 مليون جنيه لحد، وده تحت رعاية وزارة التضامن، وفكرت في أعلى واحده موجوة وبدأت تخبط فيه”.

وأكملت:” كفاية عليا اللي عملوا الدكتور أشرف زكي، واتحاد النقابات الفنية، وزملائي، وده ضرب في القوة الناعمة، وإحنا مش ضعاف، لو دخلتوا على أسر الفنانين، إحنا مش ضعاف، عندنا نقيب قوي، واتحاد نقابات قوية، ونقابات تنمية عظيمة، ومحدش هيقدر يسكتنا غير بالموت، ولماذا كل هذا الصمت من الفنانة إيمان الظوخي، ولازم تطلع تتكلم تقول مش بنتي، حتى لو هي محجبة أو معتزلة لازم تطلع تقول، ومش هتواصل معاها، هي يعني مش عارفه، وأكيد لها حد في العيلة شاف الموضوع، وهي متجوزتش، والبنت بتطلع تسئ الدولة”.

واختتمت:” أنا ست عنيدة ومش هسيب حقي، وديه مش 5 جنيه حد ناصب عليا، وأنا بنت راجل محترم، وجوزي راجل محترم، وعيلتي فيها رجالة محترمين، ومبسوطين من موقفي، وقولتلهم محدش ليه دعوة، علشان يتقال ست جابت حقها، وزمايلي في منتهى الإحترام، ومحدش يجي على القوة الناعمة، وبشكر كل النقابات والدكتور أشرف زكي، وهكون عايزه إيه أكتر من كده، أنا بعد الإشاعة ديه أقسم بالله أنا كل ست كبيرة بتحضني، والعيل بيجري عليا، وهفضل كده ومحدش يجي عليا، وبشكر كل جمهوري من قلبي بجد، وهي مش محنة ديه منحة إدهالي ربنا، ديه جايزة من عند ربي”.