بيجامة تايجر بـ 180 ألف جنيه.. وتيشرت ماركة بـ 60 ألف جنيه.. وقميص شبك شفاف بـ 20 ألف جنيه بس.. دا غير الساعات والشنط اللي بتعدي الـ 50 ألف جنيه.. أسعار خيالية لـ لبس النجوم.. مش هتصدق الأرقام !
دايمًا ما بيطل الفنانين والفنانات على جمهورهم.. بأزياء أنيقة جدًا وبتخطف نظرهم.. سواء على الريد كاربت أو حتى في البرامج واللقاءات بتاعتهم.. لكن مش دايمًا بيكون لبسهم بسيط.. فأوقات كتير بيكون سعر التيشرت أو الفستان اللي لابسته الفنانة يتخطى سعرها الآلاف.. وأرقام لا يمكن تخطر على بال الجمهور..
بيجامة ياسمين عبدالعزيز 180 ألف جنيه
البداية كانت مع إطلالة الفنانة ياسمين عبدالعزيز في برنامج “صاحبة السعادة”.. مع الفنانة إسعاد يونس.. وطلت “ياسمين” ببدلة أو بيجامة مكونة من قطعتين على شكل التايجر.. فسعر القميص بتاعها حوالي 100 ألف جنيه.. أما سعر البنطلون فـ 83 ألف جنيه.. يعني سعر البدلة كامل اتخطى الـ 180 ألف جنيه..
وده مش أول مرة ياسمين عبدالعزيز تلفت نظر الجمهور بإطلالتها في البرامج.. فسبق وظهرت مع الإعلامية منى الشاذلي في برنامج “معكم”.. ولبست فستان منقوش باللونين الأحمر والأسود.. وكان سعره وقتها حوالي 125 ألف جنيه..
https://www.facebook.com/share/v/r1RJ51tiSbwLRSk6/?mibextid=oFDknk
تيشرت نمبر وان بـ 60 ألف جنيه
ومش بس الفنانات اللي بيظهروا بلبس سعره غالي ومبالغ فيه.. فـ الفنان محمد رمضان والمعروف عنه إطلالته الغريبة.. سبق ونشر ليه صورة أثناء سفرة لـ رومانيا.. وظهر في الصورة وهو لابس تيشرت كاجوال لونه أسود.. لكنه كان من ماركة HYPE.. سعره حوالي 60 ألف جنيه.. دا غير إنه دايمًا بيعتمد في إطلالته على الماركات العالمية.. فسبق وظهر بإطلالة غريبة في حفلة غنائية.. وكان لابس بدلة بيضة كلها كريستال ملفت.. وكانت من دار الأزياء العالمية Dolce & Gabbana.. وكان سعر التصميم 100 ألف جنيه.. دا غير النضاراات والساعات اللي أسعارها بتعدي الـ 50 ألف جنيه ويمكن أكتر..
فستان ياسمين صبري بـ 35 ألف جنيه
أما ياسمين صبري فمعروف عنها إطلالتها بفساتين أنيقة .. خاصة في جلسات التصوير المتعلقة بدعاية المنتجات اللي بتعلن عنها.. فسبق وظهرت بفستان بسيط من اللون النبيتي.. وكان مصمم بكم طويل.. ومفيش عليه أي تطريزات.. وسعره وصل لـ 35 ألف جنيه.. كمان خلال مشاركتها في حفل افتتاح موسم الرياض.. طلت بفستان أسود أنيق بتصميم مجسم وكان فيه ورود ذهبية للمصمم السعودي يوسف أكبر.. ووصل سعره لـ 92 ألف جنيه..
قميص أحمد سعد الشفاف بـ 20 ألف جنيه
كمان الفنان أحمد سعد كان ليه نصيب من اللبس الغالي الخاص بالنجوم.. فسبق وطل في واحدة من حفلاته.. بقميص شبك شفاف عمل جدل كبير على السوشيال ميديا.. وكان سعره 23 ألف جنيه.. ونسق معاه فيسبت كات وصل سعره لـ 52 ألف جنيه من دار الأزياء العالمية Dsquared2..
فستان منى زكي بـ 180 ألف جنيه
كمان الفنانة منى زكي سبق وطلت بفستان غالي جدًا في حفل توزيع جوائز جوي اوردز 2023.. فظهرت بفستان أورانج طويل ومميز باللون الأورنج.. وسعره اتخطى الـ 184 ألف جنيه.. لكن بسبب إطلالتها الانيقة فالجمهور أشاد بالفستان وخطف نظرهم..
كمان كان فيه كتير من النجوم سواء الفنانين أو الفنانات.. اللي بيعتمدوا في إطلالتهم على لبس الماركات.. واللي بتكون أسعارها خرافية.. فيا ترى اي أغلى إطلالة سمعت عنها لـ فنان أو فنانة ؟
