ناصب عليا وسارق بيتي أجروا لشركة صورت فيه اعلان من ورايا.. ومزور عقد إيجار بـ 59 سنة مقابل ألف جنيه.. تجدد الأزمات بين علا غانم وطليقها..
تصوير إعلان
تجددت الأزمات من تاني بين الفنانة علا غانم وطليقها.. وده بعد ما اكتشفت انه اجر الفيلا الخاصة بها لشركة علشان تصوير اعلان بدون إذنها.
وفي أول إجراء قانوني اخدته.. حررت محضر اتهمت فيه طليقها بتأجير الفيلا الموجودة في شبرامنت أبو النمرس.. بدون وجه حق لتصوير إعلان.. من غير موافقتها.. وطالبت باتخاذ الاجراءات القانونية اللازمة وباشرت النيابة المختصة التحقيق..
وقالت انها مش هتسكت على حقها.. خاصة انه مش ساكت ومكمل في اذيتها رغم انهم انفصلوا.. ويستغل بيتها وبيكسب منه فلوس كتير.. خاصة انها مش مقيمه فيه.. وقالت علا.. طليقي مغتصب الحيازة الخاصة بالفيلا.. وعندها أمر نيابة بطرده من البيت..
عملية نصب
وقالت علا إنها تتعرض لعملية نصب من سنة واربع شهور.. ومش عارفه تدخل بيتها.. وكل حاجتها جواه وتحاول توقف عملية السرقة دي ومش عارفه.. خاصة انه معاه عقد ايجار بـ 59 سنة مقابل ألف جنيه في الشهر.. واللى أكدت أنه مزور.. وقالت علا.. هل يعقل أني أجر بيتي بألف جنيه في الشهر 59 سنة.. ما كنت ابيعه احسن..
وكانت علا غانم حصلت على حكم من المحكمة الاقتصادية ببراءتها من تهمة الاعتداء على طليقها بالسب والقذف.. على مواقع التواصل الاجتماعي.. وده طبعا بعد خناقة كبيرة حصلت بينها وبينه قبل الانفصال.. وبدأت القصة ببوست منها تستغيث.. على انستجرام من تعرضها للعنف والقهر وانها اطردت من بيتها..
https://www.facebook.com/share/v/dZ8VeCFoHCQm6dCr/?mibextid=oFDknk
بداية القصة
وقالت في تصريحات صحفية ان جوزها سرق تليفونها وخواتم ايديها منها ومن والدتها واعتدى عليهم بالضرب وطردها من بيتها في نص الليل..
وكانت المشاكل دي بسبب انها رفعت عليه قضية خلع لرفضها انه يطلقها.. وبسبب سفرها للولايات المتحدة الأمريكية القضية مكانتش خلصت.. قبل ما تظهر رواية تاني طليقها رجل الأعمال عبد العزيز لبيب..
ورد وقتها في تصريحات تلفزيونية.. قال فيها.. ان اللى اتهمته بيه علا غانم مش صحيح.. وانه راح الفيلا اتفاجئ بوجود بلطجية ضربوه.. وبقى متكسر وعنده قطع في ايده.. وقال.. علا مكانتش على طبيعتها وضربتني بقزازة النبيت في عيني.. ووالدتها ضربتني بحديدة في ايدي والبلطجية هاتولى ورموني على الأبواب وجروني على الأرض.. واتهمها بتعاطي المخدرات والمشروبات الكحولية..
قبل ما يخرج المحامي الخاص بيه ويقول..الأستاذ عبد العزيز زوج الفنانة علا غانم تعرض للضرب بالشوم منها ومن والدتها.. وتوجه للمستشفى بعد إصابته بجرح قطعي في الوجه والأيدي بطول 6 سنتيمترات..
علا غانم تدافع عن نفسها
وكان لازم تخرج علا غانم تدافع عن نفسها اكتر وحكت تفاصيل مكانش حد يعرفها.. وقالت.. يوم الجمعة بعد الصلاة أحد غفراء بيتي نبهني لوجود عدد كبير من العربيات والناس خارج البيت.. فطلبت منه يصحى الغفير الثاني.. وخرجت لمبنى اقدر اشوف منه البوابة بشكل واضح.. وبعد خروجي للبلكونة لقيت ستات كتير وعربيات وناس غريبة بتحاول تدفع بوابة البيت وبيقولوا عندنا حفلة تنظيف.. فحذرتهم إني هتصل بالبوليس ومحدش سمعني.. وكلموني بطريقة حقيرة.. وضربوني..
واستمرت الأزمة بين علا وطليقها وتبادل التصريحات المسيئة لحد ما اعلن طليقها في سبتمبر 2023 أنه الانفصال تم رسميا في مصر.. وكان وقتها لسه متمش في أمريكا لاختلاف القوانين لكن الاتفاق كان تم على الانفصال رسميا على أي حال.. واستأنفت علا غانم حياتها ورجعت تاني للتمثيل من خلال فيلم أولاد حريم كريم.. قبل ما تتجدد المشاكل بينهم تاني..
