دمج صدام حسين مع يوسف شعبان.. وخلى أوباما وأشرف عبدالباقي في شكل واحد.. ودمج الشخصيات الفنية والسياسية.. ورجع الفنانين زمن الخمسينات.. وخلى نجوم الزمن الجميل يحضروا مهرجان الجونة.. مش هتصدق اللي عمله مصمم الجرافيك المصري محمد جعفر !
تصدر مصمم الجرافيك المصري محمد جعفر.. التريند على السوشيال ميديا.. بعد تداول المتابعين التصاميم الخاصة بيه عن دمج الشخصيات الفنية والسياسية.. فأبهر “جعفر” المتابعين بتصاميمه المميزة.. واللي كانت مفاجأة ليهم إنهم يشوفوا فنان وسياسي في شكل واحد.. فيا ترى قصة محمد جعفر.. وايه حكاية تصاميمه ؟ ..
خريج تجارة و بحب الرسم
محمد جعفر شاب مصري خريج كلية التجارة.. لكنه كان بيحب الرسم من وهو صغير وموهوب فيه.. ودا اللي خلاه يقرر يدرس تصميم الفوتشوب والجرافيك.. وبدأ يعمل شغل خاص بيا لإشباع هواية ليه.. لكنه مكانش بينشر تصاميمه ولا بيعملها دعاية.. لكن بعد ما عمل أكاونت الانستجرام بتاعه بدأ ينشر عليه شغله كله .. وبقا يجي عليه تعليقات واعجاب كتير من المتابعين.. خاصة بعد ما نشر صور خاصة بفنانين رحلوا عن العالم .
ورجعهم يحضروا مهرجان الجونة بتصاميم خاصة منهم.. زي الفنان محمود عبدالعزيز.. مش بس كدا.. دا كمان جمع الفنانين مع نفسهم في مرحلة شبابهم.. عن طريق الفوتوشوب والجرافيك.. زي الفنان أحمد حلمي والفنان سمير صبري وكمان فنانين كتير سواء من الزمن الجيل أو الجيل الجديد.. ومن هنا بدأ صيت محمد يزيد بين المتابعين.. وعلق وقال عن أفكاره الخاصة بالفن:
“أنا بدأت الفكرة من بدري،، بس لاقيت الفكرة اتعملت قبل كدا بالأبيض والأسود،، فاشتغلت عليها تاني وعملتها بطريقتي،، ولما نزلتها عملت صدى واسع وتفاعل من الناس،، وكان أغلبيتهم من 18 سنة لـ 40 سنة ولاقيت إعجاب كمان من الفنانين،، زي الفنانة إسعاد يونس اللي عرضت التصميم وشكرتني وكمان الفنانة نادية الجندي،، وكمان الفنانة نبيلة عبيد،، وكانوا كمان بيعتبوا رسائل شكر،، والذي يعتمد عليه دايمًا إنها تكون فكرة ملهاش علاقة بالواقع،، والمتابعين يتفاجئون لما يشوفوها” ..
دمج شخصيات فنية بشخصيات سياسية
وبعد نجاح فكرته الأولى.. قرر “محمد” يعمل أفكار تانية عن الفنانين.. فدمج الشخصيات السياسية بالشخصيات الفنية من خلال الجرافيك والفوتوشوب.. فجمع ملامح الرئيس العراقي الراحل صدام حسين بملامح الفنان يوسف شعبان.
وكمان ملامح الفنان أشرف عبدالباقي بالرئيس الأمريكي السابق باراك أوباما.. وجمع ملامح الفنانة الراحلة سناء جميل بملكة بريطانيا “إليزابيث”.. في فكرة خيالية وبعيدة تمامًا عن الواقع زي ما هو متعود.. وخلق شكل جديد الفنانين والسياسين فاجئ بيها الجمهور والمتابعين..
https://youtu.be/jQegDKhGatk?si=YH8pk1b9yMUc3IAH
رجع الجيل الجديد من الفنانين لـ الخمسينات
كمان محمد جعفر قرر يرجع الجيل الجديد من النجوم .. لـ فترة الخمسينات.. فعمل تصميمات للفنانين والفنانات من الجيل الحالي خلى فيهم شكلهم كلاسيكي فرجهم لفترة الخمسينات.. منهم الفنانة دنيا سمير غانم.. وآيتن عامر ومنة شلبي.. وكريم عبدالعزيز ومحمد رمضان وغيرهم كتير من الفنانين الذين تفاعلوا مع الصور وحبوها.. وخليتهم يحسوا إنهم رجعوا للزمن الجميل من تاني..
دا غير كمان إن محمد بقا بيعمل تصميمات للفنانين والنجوم مع أهلهم المتوفيين.. زي الفنانة هنا يسري.. واللي عملها تصميم ليها مع والدها إبراهيم يسري.. وكمان ولاد الفنان محمود عبدالعزيز.. واللي جمعهم في صور مع والدهم الراحل محمود عبدالعزيز.. تصميمات كتير خاصة بالفن أو الفوتوشوب والجرافيك بشكل عام..
قولنا ايه رأيك في تصميمات محمد جعفر وايه أكتر صورة فيهم عجبتك ؟
