اتنين من بطن واحدة.. كل واحد بطريقته.. علشان يكسب الفرصة.. الل بتيجي في العمر مرة واحدة.. واحد شرير.. وواحد ما بين الطيبة والشر.. متدين بتجبره الظروف انه يدير امبراطورية مخدرات..
سلفي يدير امبراطورية مخدرات
جمهور الدراما في الوطن العربي على معاد مع واحد من اكتر الأعمال تشويقا.. والل ناس كتير مستنياه من زمان.. والل بيبدأ عرضه على منصة شاهد.. مسلسل بطن الحوت.. والل بتدور احداثه حولين الصراع بين الخير والشر.. مستلهمه من قصة قابيل وهابيل.. في دراما اجتماعية معاصرة..
المسلسل قصة واخراج أحمد فوزي صالح.. وسيناريو محمد بركات.. بطولة النجم محمد فراج والنجم باسم سمرة.. اسماء ابو اليزيد و عصام عمر.. المسلسل بيتكلم عن قصة شاب ملتزم دينيا.. بيلاقي نفسه.. في مواجهة مجموعة من العداوات.. لما بيضطر يستلم شغل اخوه الكبير.. ويعدي بالعيلة بر الامان.. لكن بيكتشف انه قدام امتحان خطير ومضطر يدير امبراطورية غامضة.. ويبدأ يطرح تساؤلات عن الاخلاق والمبادئ في ظل الظروف الصعبة المحيطة..
فهل هيقدر يحافظ على مبادئه واخلاقه.. لما تفرض عليه طبيعة العمل.. انه يحيد عن الصراط المستقيم.. وازاي هيقدر يواجه عيلته بعد المفاجآت الل هيكتشفها.. ده الل المفروض تجاوب عليه احداث المسلسل..
محمد فراج : المسلسل جزء من شخصيتي
ومن ناحيته بيقول بطل العمل محمد فراج.. ان الحكاية الأساسية هي الصراع بين الاخين.. بنكهة مصرية خالصة.. وان العمل بيبين الصراع الحقيقي بين الجماعات السلفية وتجار المخدرات والبني ادمين.. الل بيعيشوا تحت خط الفقر..
وكشف فراج جزء من شخصيته.. وقال.. أنا بقدم.. شخصية ضياء العمري.. وهو اخو هلال العمري والل بيقدمه باسم سمرة.. وهيكون ابن الفنانه سماح انور.. واكد فراج ان القصة واقعية.. بيزيد فيها التشويق تباعا خلال الاحداث.. والصراع بين الاخين هيبقى مستمر طول الوقت.. بيضطر كمان ضياء انه خلال الاحداث يتجوز ورد طليقة اخوه هلال والل بتقدمها اسماء ابو اليزيد.. علشان يقدر يمشي الشغل واخوه موجود في السجن..
كمان فراج اكد ان المخرج ابدع في اختيار اماكن التصوير.. وتحديدا في الحارات الشعبية الل بيتصور فيها لاول مرة.. والاماكن الل اتنقل فيها الشخصيات وسط زحمة الشارع المصري والاحياء الشعبية.
