انفصلت عن مراتي عشان ودنية.. وأنا وخطيبتي رجعنا لبعض من غير ما نقول لحد.. وبحب اللبس جدًا.. وقاعد 24 ساعة في زارا.. وبحب البس الحاجات الغريبة.. وروحت لـ أحمد السبكي في بداياتي عشان يكتشفني.. وكسفني ورفض يسلم عليا..
خرج مطرب المهرجانات الشعبية “مسلم”.. بـ تصريحات واعترافات جريئة جدًا عن حياته الشخصية.. خاصة إنه من أكتر مطربين المهرجانات الإثارة للجدل على الساحة الفنية.. فيا ترى ايه اللي كشفه “مسلم” عن حياته .. وايه هو سبب انفصاله عن طليقته ميكا البغدادي .. وهل فعلا حصل خيانة منه ؟ ..
انفصلت عن ميكا عشان ودانية
البداية كانت بكلام “مسلم” عن انفصاله عن طليقته الميكب ارتيست ميكا البغدادي.. وإن كل الكلام اللي قالته عن خيانته ليها مش حقيقي.. وإن هو اللي خد قرار الانفصال عنها بسبب إنها ودانية.. وقال “مسلم”: “أنا مخنتهاش،، وهي قالت كده غيرة عليا،، أي واحدة هتعمل كده هتطلع اللي قدامها وحش عشان بس كل الناس تتعاطف معاها،، المشكلة إنها اهتمت بموضوع تبقى تريند، ما اهتمتش إنها تظلم حد وهي ظلمتني في ده بس، وانا مظلمتهاش،،
“إحنا ظلمنا بعضنا لما أخذنا بعض من غير ما يكون على اقتناع،، واتجوزنا جواز صالونات، بقيت أعيش حياتي طبيعي بنزل وبروح وأشوف صحابي وأخرج مع ده ودي،، أنا مش بخونها وعدم الاهتمام وحش، هي كانت مهتمة بشغلها جدًا،، لأنها كانت فاتحة أتيليه مع صحبتي،، ويمكن هي سبب المشاكل اللي حصلت في حياتنا لأنها ودنية جدًا،، وصحبتي كانت بتسخن ميكا عليا،، وتقولها خليه يعمل كذا عشان كذا، وأنا قبل ما أخطب حاولت أرد ميكا عشان خاطر ابني،، لكن صحبتي كانت بتقولها حاجات غريبة ،، زي مينفعش يرجع لك غير لما يكتب حاجة باسمك”..
أنا وخطيبتي رجعنا لبعض
مش بس كدا.. كمان “مسلم” كشف مفاجأة للجمهور.. وهو إنه رجع لـ خطيبته الجديدة “يارا”.. لكنه رفض يعلن ده عشان الجمهور ميفتكرش إنهم سابوا بعض عشان اللقطة أو التريند: “‘حنا رجعنا لبعض لكن ما حبيناش نقول، علشان الناس ممكن تفتكرها لقطة وتريند،، ولما فسخنا الخطوبة كان الغلط من عندي أنا الأول، اتقمصت وزعلت في موقف، لكن في عز ما أنا غلطان هي صالحتني،، وناوي إننا نكبر ونعقل ومنتسرعش في أي قرار، وكانت حاجة مش حلوة قدام الناس نفسخ الخطوبة بعد 18 يوم، الناس لها حق تصدق إن كل ده تريند”..
مدمن لبس وقاعد في زارا
كمان “مسلم” اتكلم عن استايلات لبسه الغريبة.. وقال إنه مدمن لبس وإنه بيحب يلبس على الموضة حتى لو كان شكل اللبس غريب.. “كان نفسي في حاجات قبل ما اتشهر، وبقيت مدمن لبس و24 ساعة في زارا، وروحي فيه، وفي حاجات بجيبها من بره، وزارا بجيب منه لبس اجمد من جوتشي وديور، وانا بعشق اللبس، وبشتري ب 200 ألف في الشهر لبس،، يوم الخطوبة لبست شيفون عشان مختلف وبحب الحاجة الغريبة”..
https://www.facebook.com/share/v/sBBkPibeyPdeFdxr/?mibextid=oFDknk
السبكي قهرني وخلاني أعيط
كمان “مسلم” اتكلم عن العلاقة اللي جمعته بـ المنتج الفني أحمد السبكي.. وإن “مسلم” أول ما نزل القاهرة راح المحل بتاعه ولجأله عشان يحاول يكتشف.. لكن اتفاجئ برد فعل السبكي اللي قهره..”كنت صغير ونزلت القاهرة رحت للسبكي، دخلت سلمت ورفض السلام عليا، وبصلي من فوق لتحت وقالي يلا يا ابني على اسكندرية مساعدش حد هنا، ومشيت من الدقي لصلاح سالم بعيط ومنهار، لكن بشكره دلوقتي لانه اداني طاقة وغل للشغل، ووصلت للي بحلم بيه بس عمري ما انسى الموقف ده”..
وأثارت تصريحات “مسلم” جدل كبير على السوشيال ميديا.. فمنهم اللي اتعاطف معاه.. وشافوا إنه نجح يوصل للي هو عاوزه.. وفي منهم اللي شاف إن الفلوس غيرته.. فيا ترى ايه رأيك في تصريحات مسلم ؟
