انفجار الزايدة.. لأول مرة تامر حسني يكشف عن الحالة الصحية لنجله آدم
آثار مرض نجل الفنان تامر حسني الساعات الماضية تساؤلات الجمهور للاطمئنان عليه .
وظهر الفنان تامر حسني لأول مرة منذ مرضه لكي يطمئن جمهوره وكتب من خلال حسابه الشخصي بموقع التواصل الإجتماعي “فيسبوك ” “أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا و على تليفوني و تليفونات كل المحيطين بيا هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس”.
وأضاف: بقولكم كده عشان تبقوا حريصين مع نفسكم أكتر ولولادكم و مش كل سخونية تقولوا ده شوية برد و خلاص لا روحوا اكشفوا كويس و اعملوا سونار على البطن و الزايدة مرة و٢ عشان برضو ساعات مش بيبان و لازم الدكتور يضغط بطريقة معيّنة، تقريباً أقوى شوية عشان يعرف.
وتابع : “لإني سمعت كتير اليومين دول إن الزايدة خادعة ،اطمنوا كذا مرة قبل لحظة انفجارها عشان بجد مشاكل بتحصل بعدها كبيرة و محزنة أوي ،و حبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب و يعدي مرحلة الخطر يارب، بحق “كن فيكون” اشفيه وعافيه، هو و كل ولادنا بس هو راجل و هيتحمل وإن شاء الله ربنا يكرمه و يعافيه و يحفظه هو و إخواته و يحفظ كل ولادكم يارب وأحب أقول تاني شكراً من كل قلبي على دعواتكم.
واختتم حديثه بتوجية الشكر قائلًا: أنا شايف قلب كل حد فيكم و هو بيدعي بصدق متشكر أوي يا جماعة شكراً لكل اللي اهتم وسأل عن ابني و دعاله هنا أو على التليفون.
واللي طلعوله صدقات لشفائه من غير ما يعرفونا شخصياً أنا مش لاقي كلام أشكركم بيه و أنا برضو بدعيلكم و بقول لكم مثلها وأضعاف أضعافها و ربنا يحفظكم ويحفظ أولادكم قادر يا كريم.
