10 سنين مطرية.. افطار 25 ألف صائم.. جمع الوزير والغفير.. النجوم والوزراء يفطرون مع الأهالي في الشارع.. علشان رمضان في المطرية حاجة تانية..
تقليد شعبي مصري
على مدار 10 سنين اصبح فطار المطرية تقليد شعبي مصري.. يتم تنفيذه كل سنة يوم 15 رمضان.. بيتجمع اهالي المنطقة على ترابيزة واحدة.. والاجواء في المطرية بتشكل صورة أيقونية للشهر الكريم واحتفالية بيستناها كل المصريين.
والسنادي الوضع كان مختلف شوية في المطرية.. لان مش بس شكل إفطار المطرية صورة حلوة وتقليد مميز.. كمان قرروا في احتفالاتهم بالسنة العاشرة على تقديم إفطار المطرية.. انهم يرسخ مبدأ الوزير زي الغفير.. كله على ترابيزة واحدة..
شخصيات عامة وفنانين
وحرص عدد كبير جدا من الشخصيات العامة والفنانين والوزراء على مشاركة أهالي المطرية عادتهم السنوية دي.. وعلى رأس الحضور كان وزير الشباب والرياضة أشرف صبحي والشيخ أسامة الازهري مستشار رئيس الجمهورية للشئون الدينية.. وعدد من علماء الأزهر.. ووزيرة الهجرة الحالية سها جندي.. والوزيرة السابقة نبيلة مكرم.. بجانب عدد من الفنانين..
وكان من ضمن الحضور.. محمد عبد الرحمن توتا… مراد مكرم وائل عبد العزيز.. بالاضافة لعدد من الإعلاميين من بينهم ايه عبد الرحمن وبسنت نور الدين..
فرحتنا بلمتنا
احتفال المطرية اللى شعاره فرحتنا في لمتنا.. بقى ماركة مسجلة عن التآلف الوطني ومحبة المصريين.. وقبل ما يجتمع كل الشخصيات العامة دي على الإفطار في المطرية السنادي.. ظهر أحمد عز في اعلان الرمضاني خلال تواجده في إفطار المطرية.. علشان يتصدر تقليد أهالي المطرية شاشات كل القنوات السنادي
وازينت منطقة المطرية كلها وترص الصائمين على الترابيزات وكأنها مائدة رمضان مفتوحة.. طولها يزيد عن 1000 متر مربع وحوالي 750 ترابيزة.. بامتداد 7 شوارع عليها كل ما تشتهي الأنفس من الاكل ده غير الحلويات الشرقية والغربية.. ويشارك في التحضير كل البيوت المشاركة والمحلات الموجودة في المنطقة.. وحضرت ستات البيوت اكتر من الف كيلو محشي.. وفطر في المطرية اكتر من 25 ألف صائم..
وكالعادة يتم تجهيز الفطار من خلال مطبخ يتم انشاءه مخصوص على مساحة كبيرة عشان يستوعب كميات الأكل اللي بتجهز.. واللى يتم الإعداد لها قبلها بشهرين.. وفي منظمي مسؤولين عن الموضوع..
وكان الملفت السنادي على ترابيزة فطار المطرية.. وجود وزراء مصر واشهر الشخصيات فيها على ترابيزة واحدة مع فقرائها ومساكينها في مشهد جمع الغفير بالوزير..
دعم اخواتنا
ومكانش ينفع كل دول يجتمعوا وينسى أهالي المطرية اخواتنا في غزة.. وقدموا الدعم من خلال الهتاف ليهم طول الوقت.. مع تزيين المكان بأعلام فلسطين.. ومش بس كده متنسيش المنظمين للافتار اخوتنا من اهالي غزة الموجودين في مصر.. ودعوهم على الفطار.. ولفتوا اطفال غزة الانظار على الفطار وحاول الجميع الترحيب بيهم وظهرت في واحد من الفيديوهات السفيرة نبيلة مكرم وهي بتحاول تتصور معاهم وظهر على الاطفال فرحتهم الكبيرة بالمشاركة..
